ଦୁବାଇ,୭।୩: ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଚାମ୍ପିଅନ୍ସ ଟ୍ରଫିର ଫାଇନାଲ ମାର୍ଚ୍ଚ ୯ରେ ଖେଳାଯିବ। ଏହା ପୂର୍ବରୁ ଗୋଲଡେନ୍ ବ୍ୟାଟ ଏବଂ ବଲ ଜିତିବା ରେସ୍ରେ ଥିବା ଖେଳାଳିଙ୍କୁ ନେଇ ଚର୍ଚ୍ଚା ବଢିବାରେ ଲାଗିଛି।
ଚାମ୍ପିଅନ୍ସ ଟ୍ରଫିରେ ଯେଉଁ ବ୍ୟାଟସମ୍ୟାନ ସର୍ବାଧିକ ରନ କରନ୍ତି। ତାଙ୍କୁ ଗୋଲଡେନ୍ ବ୍ୟାଟ ଦିଆଯାଏ। ଯେଉଁ ବୋଲର ସର୍ବାଧିକ ଉଇକେଟ ନେଇଥାନ୍ତି, ସେ ଗୋଲଡେନ୍ ବଲ ପାଆନ୍ତି। ଇଂଲଣ୍ଡର ବେନ ଡକେଟ ଗୋଲ୍ଡେନ ବ୍ୟାଟ ଜିତିବା ରେସ୍ରେ ଆଗରେ ଅଛନ୍ତି।
ଡକେଟ ଚାମ୍ପିଅନ୍ସ ଟ୍ରଫିର ୩ଟି ମ୍ୟାଚରେ ୨୨୭ ରନ କରିଛନ୍ତି। ଇଂଲଣ୍ଡ ଟୁର୍ନାମେଣ୍ଟରୁ ବାଦ୍ ପଡ଼ିଛି। ଏପରି ପରିସ୍ଥିତିରେ, ଏବେ ଭାରତ ଏବଂ ନ୍ୟୁଜିଲାଣ୍ଡର ଖେଳାଳିମାନଙ୍କ ପାଖରେ ଡକେଟକୁ ପଛରେ ପକାଇ ଗୋଲ୍ଡେନ ବ୍ୟାଟ କବଜା କରିବାର ସୁଯୋଗ ରହିବ। ନ୍ୟୁଜିଲାଣ୍ଡର ରାଚିନ ରବିନ୍ଦ୍ର ଡକେଟଙ୍କଠାରୁ ମାତ୍ର ଗୋଟିଏ ରନ ପଛରେ ଅଛନ୍ତି। ସେ ୩ଟି ମ୍ୟାଚ୍ରେ ୨୨୬ ରନ କରିଛନ୍ତି।
ବିରାଟ କୋହଲି ୪ଟି ମ୍ୟାଚ୍ରେ ୨୧୭ ରନ ସହିତ ଏହି ରେସ୍ରେ ଅଛନ୍ତି। ଏହା ସହିତ ଶ୍ରେୟସ ଆୟରଙ୍କ ପାଖରେ ମଧ୍ୟ ରନ ଦୃଷ୍ଟିରୁ ପ୍ରଥମ ସ୍ଥାନ ପାଇବାର ସୁଯୋଗ ରହିବ। ସେ ୪ଟି ମ୍ୟାଚ୍ରେ ୧୯୫ ରନ କରିଛନ୍ତି। ଏହା ପରେ କେନ ୱିଲିୟମ୍ସନ ଏବଂ ଟମ ଲାଥାମ ମଧ୍ୟ ସମସ୍ତଙ୍କୁ ପଛରେ ପକାଇ ପାରିବେ। ଲାଥାମ ଏବଂ ୱିଲିୟମସନ ଯଥାକ୍ରମେ ୧୯୧ ଏବଂ ୧୮୯ ରନ କରିଛନ୍ତି।
ଗୋଲ୍ଡେନ ବଲ ବିଷୟରେ କହିବାକୁ ଗଲେ, ନ୍ୟୁଜିଲାଣ୍ଡର ଦ୍ରୁତ ବୋଲର ମ୍ୟାଟ ହେନରୀ ଏହି ରେସ୍ରେ ଆଗରେ ଅଛନ୍ତି। ହେନରୀ ଏପର୍ଯ୍ୟନ୍ତ ୪ଟି ମ୍ୟାଚ ଖେଳି ସର୍ବାଧିକ ୧୦ଟି ଉଇକେଟ ନେଇଛନ୍ତି। ଏହି ତାଲିକାରେ ମହମ୍ମଦ ଶାମି ଦ୍ୱିତୀୟ ସ୍ଥାନରେ ଅଛନ୍ତି। ସେ ୪ଟି ମ୍ୟାଚ୍ରେ ୮ଟି ଉଇକେଟ ନେଇଛନ୍ତି।
ଏହା ସହିତ, ସ୍ପିନର ବରୁଣ ଚକ୍ରବର୍ତ୍ତୀଙ୍କ ନାମ ମଧ୍ୟ ତାଲିକାରେ ଅଛି। ସେ ଏପର୍ଯ୍ୟନ୍ତ ମାତ୍ର ୨ଟି ମ୍ୟାଚ ଖେଳି ୭ଟି ଉଇକେଟ ନେଇଛନ୍ତି। ସେହି ସମୟରେ, ନ୍ୟୁଜିଲାଣ୍ଡ ଅଧିନାୟକ ମିଚେଲ ସାଣ୍ଟନରଙ୍କ ପାଖରେ ମଧ୍ୟ ଫାଇନାଲରେ ସମସ୍ତଙ୍କୁ ପଛରେ ପକାଇ ଗୋଲ୍ଡେନ ବଲ ହାସଲ କରିବାର ସୁଯୋଗ ରହିବ। ସାଣ୍ଟନର ଏପର୍ଯ୍ୟନ୍ତ ୪ଟି ମ୍ୟାଚ ଖେଳି ୭ଟି ଉଇକେଟ ନେଇଛନ୍ତି।
