ନୂଆଦିଲ୍ଲୀ,୨୮।୨ : ଝିଅମାନଙ୍କ ବିବାହର ବୟସ ବଢ଼ାଇବା ଇଚ୍ଛାକୃତ ଫଳାଫଳ ଦେଇ ନ ପାରେ ବୋଲି ଆର୍ଆର୍ଏସ୍ ମହିଳା ମୋର୍ଚ୍ଚା ପକ୍ଷରୁ କୁହାଯାଇଛି। ଆର୍ଆର୍ଏସ୍ର ସର୍ବୋଚ୍ଚ ନିଷ୍ପତ୍ତି ଗ୍ରହଣ କମିଟିର ବାର୍ଷିକ ବୈଠକ ପୂର୍ବରୁ ସେବିକା ସମିତି ରବିବାର କହିଛନ୍ତି ଯେ ଉପଯୁକ୍ତ ଶିକ୍ଷା ପାଇବା ପରେ ଝିଅମାନେ ବିବାହ କରିବା ଉଚିତ। କିନ୍ତୁ ବିବାହ ବୟସ ଲାଗୁ କରିବା ଉଚିତ ଫଳାଫଳ ଦେଇ ନ ପାରେ।
ସଂଗଠନର ପ୍ରତିନିଧିସଭାର ତିନି ଦିନିଆ ବୈଠକ ମାର୍ଚ୍ଚ ୧୧ ରୁ ଆରମ୍ଭ ହେବ। ଯେଉଁଠାରେ ଝିଅଙ୍କ ବିବାହ ବୟସକୁ ୧୮ରୁ ୨୧ ବର୍ଷକୁ ବଢ଼ାଇବାକୁ ପ୍ରସ୍ତାବ ସମେତ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହେବାର ସମ୍ଭାବନା ରହିଛି।
ଡିସେମ୍ବରରେ, ସଂସଦର ଶୀତକାଳୀନ ଅଧିବେଶନରେ କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ ଝିଅଙ୍କ ବିବାହ ବୟସକୁ ୧୮ ରୁ ୨୧ ବର୍ଷ ପର୍ଯ୍ୟନ୍ତ ବୃଦ୍ଧି କରିବାକୁ ପ୍ରସ୍ତାବ ଦେବା ପାଇଁ ଏକ ବିଲ ଆଗତ କରିଥିଲେ। କିନ୍ତୁ ପରେ ଲୋକସଭାରେ ଏହା ଉପରେ ବିସ୍ତୃତ ଆଲୋଚନା ପାଇଁ ବିଲକୁ ସଂସଦର ସ୍ଥାୟୀ କମିଟି ନିକଟକୁ ପଠା ଯାଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ତାଙ୍କ ସରକାର ଏହି ପ୍ରସ୍ତାବିତ ଆଇନକୁ ସମାଜର ବାଳିକାମାନଙ୍କୁ ସମାନ ସୁଯୋଗ ପ୍ରଦାନ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଉଲ୍ଲେଖ କରିଛନ୍ତି।
ରାଷ୍ଟ୍ର ସେବିକା ସମିତି ସୁନୀଲା ସୋହୱାନି କହିଛନ୍ତି ଯେ ଝିଅମାନଙ୍କର ଉପଯୁକ୍ତ ପାଳନ ଏବଂ ଶିକ୍ଷା ପରେ ବିବାହ କରାଯିବା ଉଚିତ। ଯାହା ଦ୍ୱ।ରା ସେମାନେ ଦକ୍ଷ ମଣିଷ ହୋଇପାରିବେ। ବିବାହର ବୟସ ବଢ଼ାଇବା ପାଇଁ ସରକାରଙ୍କ ବିଲ ବିଷୟରେ ପଚରାଯିବାରୁ ସୋହୱାନି କହିଛନ୍ତି ଯେ କମିଟି ସମାଜର ମତାମତ ସଂଗ୍ରହ କରିଛି ଏବଂ କେତେକ ଏହାକୁ ସମର୍ଥନ କରୁଛନ୍ତି । କେତେକ ଏହାକୁ ବିରୋଧ କରୁଛନ୍ତି।
ବିଚାର ବିମର୍ଷ ମାଧ୍ୟମରେ ଏହି ସମସ୍ୟାର ସମାଧାନ କରିବା ଭଲ। ସୋହୱାନି କହିଛନ୍ତି ଯେ ଆମ କାର୍ଯ୍ୟକର୍ତ୍ତାଙ୍କ ଦ୍ୱାରା ସଂଗୃହୀତ ମତ ଅନୁଯାୟୀ ଝିଇମାନଙ୍କର ବିବାହ ବୟସ ବଢ଼ାଇବା ଉପରେ ଉଭୟ ପ୍ରକାରର ମତ ରହିଛି। ସେ କହିଛନ୍ତି ଯେ ଏହା ଦେଖାଯାଇଛି ଯେ ଝିଅଙ୍କ ବିବାହ ବୟସ ପରି ସାମାଜିକ ପ୍ରସଙ୍ଗରେ କିଛି ରୋକ ଲଗାଇବା ଦ୍ୱାରା ଆଶା କରାଯାଉଥିବା ଫଳାଫଳ ମିଳି ନପାରେ। ଜନସଚେତନତା ଏବଂ ବ୍ୟାପକ ବିଚାର ବିମର୍ଷ ପରେ ଏହିପରି ସମସ୍ୟାର ସମାଧାନର ପଥ ଖୋଜିବା ଆବଶ୍ୟକ। ଭାଜପା ନେତୃତ୍ୱାଧୀନ କେନ୍ଦ୍ର ସରକାରଙ୍କ ପଦକ୍ଷେପକୁ ନେଇ ସୋହୱାନି ଏହାକୁ ଉପଯୁକ୍ତ ବୋଲି କହିଛନ୍ତି ଏବଂ ଏହି ପ୍ରସଙ୍ଗରେ ସରକାର ବ୍ୟାପକ ଆଲୋଚନା କରୁଛନ୍ତି ବୋଲି କହିଛନ୍ତି।
