କଲମ୍ବୋ, ୨୪।୫ : ଏକ ଐତିହାସିକ ଅର୍ଥନୈତିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କାରେ ମଙ୍ଗଳବାର ପେଟ୍ରୋଲ ଏବଂ ଡିଜେଲ ଦର ଆକାଶ ଛୁଆଁ ହୋଇଛି। ପେଟ୍ରୋଲର ମୂଲ୍ୟ ୨୪.୩ ପ୍ରତିଶତ ଏବଂ ଡିଜେଲର ମୂଲ୍ୟ ୩୮.୪ ପ୍ରତିଶତକୁ ବୃଦ୍ଧି କରାଯାଇଛି।
ବୈଦେଶିକ ମୁଦ୍ରା ଭଣ୍ଡାରରେ ହ୍ରାସ ଯୋଗୁ ଶ୍ରୀଲଙ୍କା ଏକ ଗୁରୁତର ଅର୍ଥନୈତିକ ସଙ୍କଟ ଦେଇ ଗତି କରୁଛି। ଏହି କାରଣରୁ ଏହି ବୃଦ୍ଧି ଘଟିଛି। ଏହା ସହ ପେଟ୍ରୋଲ ଏବଂ ଡିଜେଲର ମୂଲ୍ୟ ଦେଶରେ ସର୍ବୋଚ୍ଚ ସ୍ତରରେ ପହଞ୍ଚିଛି। ଏପ୍ରିଲ ୧୯ ପରେ ଶ୍ରୀଲଙ୍କାରେ ଇନ୍ଧନ ମୂଲ୍ୟରେ ଏହା ଦ୍ୱିତୀୟ ବୃଦ୍ଧି। ଏହା ସହିତ ସାଧାରଣତଃ ବ୍ୟବହୃତ ଅକ୍ଟେନ-୯୨ ପେଟ୍ରୋଲର ମୂଲ୍ୟ ଲିଟର ପିଛା ୪୨୦ ଟଙ୍କାକୁ ବୃଦ୍ଧି ପାଇଛି । ସେହିପରି ଡିଜେଲର ଲିଟର ପିଛା ଦାମ ୪୦୦ ଟଙ୍କା ହୋଇଛି। ଯାହା ଏପର୍ଯ୍ୟନ୍ତ ସର୍ବାଧିକ ବୋଲି କୁହାଯାଉଛି।
ଭାରତର ଅଗ୍ରଣୀ ତୈଳ କମ୍ପାନୀ ଭାରତୀୟ ତୈଳ ନିଗମର ଶ୍ରୀଲଙ୍କାର ସହାୟକ କମ୍ପାନୀ ଲଙ୍କା ଆଇଓସି ମଧ୍ୟ ଇନ୍ଧନର ଖୁଚୁରା ମୂଲ୍ୟ ବୃଦ୍ଧି କରିଛି। ଲଙ୍କା ଆଇଓସି ସିଇଓ ମନୋଜ ଗୁପ୍ତା କହିଛନ୍ତି ଯେ ସିଲନ ପେଟ୍ରୋଲିୟମ କର୍ପୋରେଶନ (ସିପିସି) ସହିତ ସମାନସ୍ତରରେ ପହଞ୍ଚିବା ପାଇଁ ଆମେ ମୂଲ୍ୟ ବୃଦ୍ଧି କରିଛୁ। ସିପିସି ହେଉଛି ଶ୍ରୀଲଙ୍କାର ଏକ ସରକାରୀ କ୍ଷେତ୍ରୀୟ ତୈଳ କମ୍ପାନୀ।
ଦେଶର ଶକ୍ତି ମନ୍ତ୍ରୀ କାଞ୍ଚନା ବିଜସେକରା ଟୁଇଟ କରି କହିଛନ୍ତି ଯେ କ୍ୟାବିନେଟ ସ୍ଥିର କରିଥିବା ସୂତ୍ର ଅନୁଯାୟୀ ଇନ୍ଧନର ମୂଲ୍ୟ ବୃଦ୍ଧି କରାଯାଇଛି। ପରିବହନ ଏବଂ ଅନ୍ୟାନ୍ୟ ସେବା ମୂଲ୍ୟରେ ପରିବର୍ତ୍ତନକୁ ମଧ୍ୟ କ୍ୟାବିନେଟ ଅନୁମୋଦନ କରିଛି ବୋଲି ସେ କହିଛନ୍ତି। ଇଟିର ରିପୋର୍ଟ ଅନୁଯାୟୀ, ଇନ୍ଧନର ଅତ୍ୟଧିକ ଅଭାବ ଏବଂ ପେଟ୍ରୋଲ ଏବଂ ଡିଜେଲର ମୂଲ୍ୟ ହେତୁ ଶ୍ରୀଲଙ୍କାରେ ଯାତାୟାତ ମଧ୍ୟ ମହଙ୍ଗା ହୋଇଛି।
ଅଟୋ ରିକ୍ସା ଅପରେଟରମାନେ କହିଛନ୍ତି ଯେ ସେମାନେ ବର୍ତ୍ତମାନ ପ୍ରଥମ କିଲୋମିଟର ପାଇଁ ୯୦ ଟଙ୍କା ଏବଂ ତା’ପରେ ପ୍ରତ୍ୟେକ କିଲୋମିଟର ପାଇଁ ୮୦ ଟଙ୍କା ଭଡ଼ା ନେବେ। ଲୋକଙ୍କ ଯାତ୍ରା ହ୍ରାସ କରିବା ପାଇଁ ସରକାର କମ୍ପାନୀଗୁଡିକୁ ଘରୁ କାମ କରିବାକୁ ଅନୁମତି ମଧ୍ୟ ଦେଇଛନ୍ତି।
୧୯୪୮ରେ ସ୍ବାଧୀନତା ପରଠାରୁ ଶ୍ରୀଲଙ୍କା ସବୁଠାରୁ ଖରାପ ଆର୍ଥିକ ସଙ୍କଟ ଦେଇ ଗତି କରୁଛି। ବୈଦେଶିକ ମୁଦ୍ରା ଭଣ୍ଡାରର ଅଭାବ ଯୋଗୁ ଇନ୍ଧନ, ରନ୍ଧନ ଗ୍ୟାସ ଏବଂ ଅନ୍ୟାନ୍ୟ ଜରୁରୀ ସାମଗ୍ରୀର ଘୋର ଅଭାବ ଦେଖାଦେଇଛି। ବ୍ୟାପକ ବିଦ୍ୟୁତ୍ କାଟ ଏବଂ ଖାଦ୍ୟ ମୂଲ୍ୟ ବୃଦ୍ଧି ଲୋକଙ୍କୁ ସଙ୍କଟରେ ପକାଇଛି।
