ନୂଆଦିଲ୍ଲୀ: ଚଳିତ ବର୍ଷ ସେପ୍ଟେମ୍ବରରେ ଓଡ଼ିଶାରେ ସାମଗ୍ରୀ ଓ ସେବା ଟିକସ (ଜିଏସ୍ଟି) ସଂଗ୍ରହ ୧୮% ବୃଦ୍ଧି ପରିଲକ୍ଷିତ ହୋଇଛି। ଗତ ବର୍ଷ ସେପ୍ଟେମ୍ବରରେ ରାଜ୍ୟରେ ୨୦୧୫ କୋଟି ଟଙ୍କାର ଜିଏସ୍ଟି ଆଦାୟ ହୋଇଥିବା ବେଳେ ଚଳିତ ବର୍ଷ ସମାନ ମାସରେ ଏହା ୨୩୮୪ କୋଟି ଟଙ୍କା ରହିଛି। ସେହିଭଳି ସାରା ଦେଶର ଜିଏସ୍ଟି ସଂଗ୍ରହ ସେପ୍ଟେମ୍ବର ମାସରେ ୪% ବଢ଼ି ୯୫,୪୮୦ କୋଟି ଟଙ୍କା ରହିଛି। ୨୦୧୯ ସେପ୍ଟେମ୍ବରରେ ୯୧,୯୧୬ କୋଟି ଟଙ୍କାର ଜିଏସ୍ଟି ଆଦାୟ କରିବାକୁ ସରକାର ସକ୍ଷମ ହୋଇଥିଲେ। ଅର୍ଥ ମନ୍ତ୍ରଣାଳୟ ସୂଚନା ମୁତାବକ, ସେପ୍ଟେମ୍ବରରେ ଆଦାୟ ହୋଇଥିବା ମୋଟ ଜିଏସ୍ଟି ମଧ୍ୟରେ ରାଜ୍ୟ ଜିଏସ୍ଟି(ଏସ୍ଜିଏସ୍ଟି) ବାବଦକୁ ୨୩,୧୧୩ କୋଟି, କେନ୍ଦ୍ର ଜିଏସ୍ଟି (ସିଜିଏସ୍ଟି)ବାବଦକୁ ୧୭,୭୪୧ କୋଟି ଏବଂ ୪୭,୪୮୪ କୋଟି ସମନ୍ବିତ ଜିଏସ୍ଟି(ଆଇଜିଏସ୍ଟି) ଏବଂ ୭,୧୨୪ କୋଟି ଟଙ୍କାର ସେସ୍ ସାମିଲ ରହିଥିବା ଜଣାପଡିଛି। ସରକାର ଏପ୍ରିଲରେ ୩୨,୧୭୨ କୋଟି ଟଙ୍କାର ଜିଏସ୍ଟି ଆଦାୟ କରିଥିଲେ। ସେହିଭଳି ମେ’ରେ ୬୨,୧୫୧ କୋଟି, ଜୁନରେ ୯୦,୯୧୭ କୋଟି, ଜୁଲାଇରେ ୮୭,୪୨୨ କୋଟି ଏବଂ ଅଗଷ୍ଟରେ ୮୬,୪୪୯ କୋଟି ଟଙ୍କାର ଜିଏସ୍ଟି ସଂଗ୍ରହ ହୋଇଛି।
