ପରିବେଶ ଭଲ ରହିଲେ ଆମେ ଭଲ ରହିବା। ଏକଥା ସମସ୍ତେ ଜାଣନ୍ତି, କିନ୍ତୁ ବ୍ୟକ୍ତିଗତ ସ୍ତରରେ କିଛି କରିବା ପାଇଁ କଷ୍ଟକର ମନେକରନ୍ତି। ହେଲେ ଏଭଳି ଆହ୍ବାନକୁ କେତେକ ଜୀବନର ଲକ୍ଷ୍ୟଭାବେ ଗ୍ରହଣ କରି ଏକ ବୈପ୍ଳବିକ ପରିବର୍ତ୍ତନ ଆଣିଥାନ୍ତି। ଦରକାର ହେଲେ ଅନ୍ୟ ସମସ୍ତଙ୍କୁ ଛାଡି ଦିଅନ୍ତି ପଛେ ଲକ୍ଷ୍ୟରୁ ଓହରନ୍ତି ନାହିଁ। ଠିକ୍ ଏମିତି ଏକ ଉଦାହରଣ ସୃଷ୍ଟି କରିଛନ୍ତି ରାଜସ୍ଥାନ ଭରତପୁରର ବଚ୍ଚୁ ସିଂ। ପରିବେଶ ସୁରକ୍ଷା ଦିଗରେ କାମ କରିବା ପାଇଁ ସେ ତାଙ୍କ ଜୀବନକୁ ସମ୍ପୂର୍ଣ୍ଣ ସମର୍ପିତ କରିଦେଇଛନ୍ତି। ଏବେ ସୁଦ୍ଧା ଦେଢ ଲକ୍ଷ ଗଛ ଲଗାଇ ଜଙ୍ଗଲ ସୃଷ୍ଟି କରି ସାରିଲେଣି। ଏବେ ବି ପ୍ରତିଦିନ ସେ ଗଛ ଲଗାଇବା, ତା’ର ଯତ୍ନ ନେବା ଆଦି ବିଭିନ୍ନ ପ୍ରକାର କାମ କରୁଛନ୍ତି। ଏମିତି କି ଗଛକୁ ସୁରକ୍ଷା ଦେବା ପାଇଁ ସେ ଆମ୍ବୁଲାନ୍ସ ସେବା ମଧ୍ୟ ସୃଷ୍ଟି କରିଛନ୍ତି। ମଣିଷଙ୍କ ଦେହ ଖରାପ ହେଲେ ଯେପରି ଆମ୍ବୁଲାନ୍ସ ସେବା ମିଳେ ଠିକ୍ ସେହିପରି ଗଛର କୌଣସି ଅସୁବିଧା ହେଲେ ସେ ତୁରନ୍ତ ସୁରକ୍ଷା ଦେବା ପାଇଁ ଏଭଳି ଏକ ସେବା ସୃଷ୍ଟି କରିଛନ୍ତି। ତାଙ୍କ ମତରେ ପରିବେଶ ସୁରକ୍ଷା ଓ ଜଙ୍ଗଲ ରକ୍ଷା କରିବା କେବଳ ସରକାର ବା କୌଣସି ଅନୁଷ୍ଠାନର କାମ ନୁହେଁ, ପ୍ରତ୍ୟେକ ବ୍ୟକ୍ତି ଏଥିପାଇଁ ସଚେତନ ହେବା ଜରୁରୀ। ତେବେ ସବୁ ସମୟରେ ଗଛର ଯତ୍ନ ନେବା ପାଇଁ ସେ ନିଜ ଚାକିରିରୁ ସ୍ବେଚ୍ଛାକୃତ ଅବସର ମଧ୍ୟ ନେଇଥିଲେ। ଏହାପରେ ସବୁ ସମୟ ଗଛର ଯତ୍ନ ନେବାରେ ସେ କଟାଇ ଦେଉଛନ୍ତି। ଗଛକୁ ନିଜର ସନ୍ତାନ ଭଳି ସେ ଦେଖନ୍ତି, ସବୁ ସମୟରେ ନିରନ୍ତରଭାବେ ଏହି କାମ କରି ସେ ଏବେ ଜଙ୍ଗଲ ସୃଷ୍ଟି କରିବାରେ ସକ୍ଷମ ହୋଇଛନ୍ତି। ଏଭଳି କାମ ପାଇଁ ତାଙ୍କୁ ଏବେ ରାଜ୍ୟ ସରକାରଙ୍କଠାରୁ ସମ୍ମାନ ମଧ୍ୟ ମିଳିପାରିଛି।
