ନୂଆଦିଲ୍ଲୀ: କରୋନା ଯୋଗୁ ଦେଶରେ ବିଭିନ୍ନ ବର୍ଗର ଔଷଧ ବିକ୍ରି ଯଥେଷ୍ଟ ପରିମାଣରେ ବୃଦ୍ଧି ପାଇଛି। ଏପରିକି ଗତବର୍ଷ ଏପ୍ରିଲ ମାସ ତୁଳନାରେ ଚଳିତ ବର୍ଷ ଏପ୍ରିଲରେ ଏହା ପ୍ରାୟ ୫୧% ବୃଦ୍ଧି ପାଇଥିବା ଜଣାପଡ଼ିଛି। ଫଳରେ ମହାମାରୀରୁ ନିଜକୁ ସୁରକ୍ଷିତ ରଖିବା ପାଇଁ ଭାରତୀୟମାନେ ମେଡିସିନ ବ୍ୟବହାରକୁ ଅଧିକ ଗୁରୁତ୍ୱ ଦେଇଛନ୍ତି। ଗତବର୍ଷ ଏପ୍ରିଲରେ ସରକାରଙ୍କ ପକ୍ଷରୁ ଦେଶବ୍ୟାପୀ ଲକ୍ଡାଉନ ଓ ଶଟ୍ଡାଉନ ଭଳି କଠୋର କଟକଣା ଜାରି କରାଯାଇଥିଲା। ଏହାର ପ୍ରଭାବ ମଧ୍ୟ ଔଷଧ ବିକ୍ରୟ ଉପରେ ପଡ଼ିଥିଲା। ଫଳରେ ଗତ ବର୍ଷ ବହୁ ପରିମାଣରେ ଔଷଧ କାରବାର ମାନ୍ଦା ରହିଥିବା ବେଳେ ଚଳିତ ବର୍ଷ କରୋନାର ୨ୟ ଲହର ସଂକ୍ରମଣ ଯୋଗୁ ଔଷଧ ବିକ୍ରି ବଢ଼ିବା ସହିତ କାରବାର ଭଲ ହୋଇଥିବା ଜଣାପଡିଛି। ତେବେ କରୋନାର ୨ୟ ଲହର ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ଔଷଧ ବିକ୍ରୟକୁ ଯଥେଷ୍ଟ ପରିମାଣରେ ବୃଦ୍ଧି କରିଛି। ଏହି ସମୟରେ ଆଣ୍ଟି-ଇନ୍ଫେକ୍ଟିଭ୍ ୧୩୪% ବିକ୍ରି ହୋଇଥିବା ଜଣାପଡିଛି। ଗତ ବର୍ଷ ଏପ୍ରିଲ ତୁଳନାରେ ଏହା ଯଥେଷ୍ଟ ଅଧିକ ବୋଲି କୁହାଯାଉଛି। ସେହିଭଳି ପୁଷ୍ଟିକର ଖାଦ୍ୟ ୭୬% ଅଭିବୃଦ୍ଧି ଦେଖାଇଛି। କୋଭିଡ୍ ଟ୍ରିଟ୍ମେଣ୍ଟ ଥେରାପି ସେଗ୍ମେଣ୍ଟରେ କାର୍ଯ୍ୟ କରୁଥିବା କମ୍ପାନୀଗୁଡିକ ଏପ୍ରିଲ ମାସରେ ଆଶାଠାରୁ ଅଧିକ ବିକ୍ରୟ ସହ ଯଥେଷ୍ଟ ଭଲ କାରବାର କରିଛନ୍ତି ବୋଲି ବଜାର ଅନୁସନ୍ଧାନକାରୀ ସଂସ୍ଥା ଏ ସମ୍ପର୍କରେ ସବିଶେଷ ତଥ୍ୟ ଦେଇଛି। ଗତ ବର୍ଷ ଏପ୍ରିଲରେ କରୋନା କଟକଣା ଯୋଗୁ ଔଷଧ ବିକ୍ରୟ ୧୧% କମିଥିବା ବେଳେ ସମାନ ଅବସ୍ଥା ମେ ମାସରେ ମଧ୍ୟ ରହିଥିଲା। ଏହି ମାସରେ ପ୍ରାୟ ୯% ବିକ୍ରୟ କମ୍ ହୋଇଥିଲା ତେବେ ଚଳିତ ବର୍ଷ ଔଷଧ ଉତ୍ପାଦନକାରୀ କମ୍ପାନୀଗୁଡିକ କରୋନା ସଂକ୍ରମଣର ୨ୟ ଲହର ସମୟରେ ଔଷଧର ଉତ୍ପାଦନ ଏବଂ ବିତରଣ ଲାଗି ପୂର୍ବରୁ ପ୍ରସ୍ତୁତ ଥିବା ବେଳେ ସରକାର ମଧ୍ୟ ଆବଶ୍ୟକ ସହାୟତା ସାଙ୍ଗକୁ ଅତ୍ୟାବଶ୍ୟକ ସାମଗ୍ରୀ ଏବଂ ସେବା ଯୋଗାଣକୁ କଟକଣା ମୁକ୍ତ କରିଛନ୍ତି।
