ଓ୍ବାଶିଂଟନ/ନୂଆଦିଲ୍ଲୀ,୧୦।୯: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ରୁଷିଆ ବିରୁଦ୍ଧରେ ଏକ ମୋର୍ଚ୍ଚା ଖୋଲିଛନ୍ତି। ସେ ୟୁରୋପୀୟ ସଂଘ (EU)କୁ କହିଛନ୍ତି ଯେ ଯଦି ରୁଷିଆ ଉପରେ ଚାପ ପକାଇବାକୁ ହୁଏ, ତେବେ ଭାରତ ଉପରେ ୧୦୦ ପ୍ରତିଶତ ଶୁଳ୍କ ଲାଗୁ କରାଯିବା ଉଚିତ। ଏହା ପୁଣିଥରେ ଟ୍ରମ୍ପଙ୍କ ଦ୍ୱୈତ ଚରିତ୍ରକୁ ଦର୍ଶାଉଛି। ସେ ସମ୍ପ୍ରତି ଭାରତର ବନ୍ଧୁତା ବିଷୟରେ ଏକ ବିବୃତ୍ତି ଦେଇଛନ୍ତି। ଟ୍ରମ୍ପ ବୁଧବାର (ସେପ୍ଟେମ୍ବର ୧୦) ଦିନ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜଣେ ଭଲ ବନ୍ଧୁ ଏବଂ ଭାରତ-ଆମେରିକା ଖୁବ ଶୀଘ୍ର ବାଣିଜ୍ୟ ଆଲୋଚନା କରିବେ।
ଟ୍ରମ୍ପ ଟ୍ରୁଥରେ ଏକ ପୋଷ୍ଟ ଶେୟାର କରିଛନ୍ତି। ଏହା ମାଧ୍ୟମରେ ସେ କହିଛନ୍ତି, ‘ମୁଁ ଆପଣଙ୍କୁ କହିବାକୁ ଖୁସି ଯେ ଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ ସମ୍ବନ୍ଧୀୟ ବାଧା ଦୂର କରିବା ପାଇଁ ଆଲୋଚନା ଚାଲିଛି। ମୁଁ ଆଗାମୀ ସପ୍ତାହଗୁଡ଼ିକରେ ମୋର ବହୁତ ଭଲ ବନ୍ଧୁ ପ୍ରଧାନମନ୍ତ୍ରୀ ମୋଦିଙ୍କ ସହ କଥା ହେବାକୁ ଅପେକ୍ଷା କରିଛି। ମୁଁ ବିଶ୍ୱାସ କରୁଛି ଯେ ଏହି ଆଲୋଚନା ମାଧ୍ୟମରେ ଉଭୟ ଦେଶ ପାଇଁ ସମସ୍ୟାର ସମାଧାନ କରିବା ସହଜ ହେବ।’ ରଏଟର୍ସର ଏକ ରିପୋର୍ଟ ଅନୁଯାୟୀ, ରାଷ୍ଟ୍ରପତି ଟ୍ରମ୍ପ ୟୁରୋପୀୟ ସଂଘକୁ କହିଛନ୍ତି, ‘ଭାରତ ଏବଂ ଚାଇନା ରୁଷିଆରୁ ତେଲ କିଣିବା ବନ୍ଦ ନ କରିବା ପର୍ଯ୍ୟନ୍ତ ଲାଗୁ ହୋଇଥିବା ଶୁଳ୍କ ଜାରି ରଖନ୍ତୁ।’ ସେ ଭାରତ ଉପରେ ୧୦୦ ପ୍ରତିଶତ ଶୁଳ୍କ ଲାଗୁ କରିବାକୁ ପରାମର୍ଶ ଦେଇଛନ୍ତି। ଏହି ବିଷୟରେ ଟ୍ରମ୍ପଙ୍କ ଜଣେ ଅଧିକାରୀ କହିଛନ୍ତି, ଆମେ ସମ୍ପୂର୍ଣ୍ଣ ପ୍ରସ୍ତୁତ, କିନ୍ତୁ ଆମେ କେବଳ ସେତେବେଳେ ଏହା କରିବୁ ଯେତେବେଳେ ଆମର ୟୁରୋପୀୟ ଅଂଶୀଦାରମାନେ କାର୍ଯ୍ୟାନୁଷ୍ଠାନ ଗ୍ରହଣ କରିବେ।
