ନୂଆଦିଲ୍ଲୀ,୨୯।୬: ୧ ଜୁଲାଇ ୨୦୨୬ରୁ ଅନେକ ଗୁରୁତ୍ୱପୂର୍ଣ୍ଣ ଆର୍ଥିକ ପରିବର୍ତ୍ତନ ଲାଗୁ ହେବାକୁ ଯାଉଛି। ଏହାର ପ୍ରଭାବ ଟ୍ୟାକ୍ସପେୟର (କରଦାତା), ବ୍ୟାଙ୍କ ଗ୍ରାହକ, କ୍ରେଡିଟ୍ କାର୍ଡ ବ୍ୟବହାରକାରୀ, ପାସପୋର୍ଟ ଆବେଦନକାରୀ ଏବଂ ଆଧାର କାର୍ଡଧାରୀଙ୍କ ଉପରେ ପଡ଼ିବ। ଆସନ୍ତୁ ଜାଣିବା ଜୁଲାଇରୁ ଲାଗୁ ହେବାକୁ ଥିବା ୬ଟି ବଡ଼ ପରିବର୍ତ୍ତନ ବିଷୟରେ:
ଆଧାରରେ ଇମେଲ୍ ଅପଡେଟ୍ ଏବେ ମାଗଣା
୧ ଜୁଲାଇରୁ ଭାରତୀୟ ବିଶିଷ୍ଟ ଚିହ୍ନଟ ପ୍ରାଧିକରଣ (UIDAI) ଆଧାର କାର୍ଡରେ ପଞ୍ଜୀକୃତ ଇମେଲ୍ ଆଇଡି ଅପଡେଟ୍ କରିବା ପାଇଁ ଲାଗୁଥିବା ୭୫ ଟଙ୍କାର ଶୁଳ୍କକୁ ସାମୟିକ ଭାବେ ହଟାଇ ଦେଇଛି। ଏହି ସୁବିଧା ୧ ଜୁଲାଇରୁ ୩୧ ଡିସେମ୍ବର ୨୦२୬ ପର୍ଯ୍ୟନ୍ତ ସମ୍ପୂର୍ଣ୍ଣ ମାଗଣା ରହିବ। UIDAI ଅନୁଯାୟୀ, ଆଧାର ମୋବାଇଲ୍ ଆପ୍ ଜରିଆରେ ଇମେଲ୍ ଅପଡେଟ୍ କଲେ ଆଗାମୀ ଛଅ ମାସ ପର୍ଯ୍ୟନ୍ତ କୌଣସି ଶୁଳ୍କ ନିଆଯିବ ନାହିଁ।
SBI କ୍ରେଡିଟ୍ କାର୍ଡର ନିୟମ ବଦଳିବ
SBI Card ପକ୍ଷରୁ ‘PhonePe SBI Credit Card PURPLE’ ଏବଂ ‘PhonePe SBI Credit Card SELECT BLACK’ ପାଇଁ ରିୱାର୍ଡ ପଏଣ୍ଟ ସହ ଜଡ଼ିତ ନିୟମରେ ପରିବର୍ତ୍ତନ କରାଯାଇଛି। ୧ ଜୁଲାଇରୁ ଏହି କାର୍ଡଗୁଡ଼ିକରେ ରିୱାର୍ଡ ପଏଣ୍ଟ ଅର୍ଜନ କରିବାର ଏକ ସୀମା ସ୍ଥିର କରାଯିବ ଏବଂ କିଛି ଅତିରିକ୍ତ କାରବାର (Transactions) ଉପରେ ଏବେ ଆଉ ରିୱାର୍ଡ ପଏଣ୍ଟ ମିଳିବ ନାହିଁ।
HDFC କ୍ରେଡିଟ୍ କାର୍ଡରେ ଏୟାରପୋର୍ଟ ଲାଉଞ୍ଜ ଆକ୍ସେସ୍ର ନୂଆ ନିୟମ
୧ ଜୁଲାଇ ୨୦୨୬ରୁ HDFC Bank ର କେତେକ ନିର୍ଦ୍ଦିଷ୍ଟ କ୍ରେଡିଟ୍ କାର୍ଡଧାରୀଙ୍କୁ ପ୍ରତି କ୍ୟାଲେଣ୍ଡର ତ୍ରୈମାସିକରେ (Quarter) ୩ଟି ମାଗଣା ଡୋମେଷ୍ଟିକ୍ ଏୟାରପୋର୍ଟ ଲାଉଞ୍ଜ ଭିଜିଟ୍ କେବଳ ସେତିକିବେଳେ ମିଳିବ, ଯଦି ସେମାନେ ପୂର୍ବ ତ୍ରୈମାସିକରେ ଅତିକମରେ ୬୦,000 ଟଙ୍କା ଖର୍ଚ୍ଚ କରିଥିବେ। ଏହି ନିୟମ ପ୍ରତି ତ୍ରୈମାସିକ ଉପରେ ଲାଗୁ ହେବ।
ପାସପୋର୍ଟ ପ୍ରସ୍ତୁତ କରିବା ହେବ ମହଙ୍ଗା
୧ ଜୁଲାଇରୁ ସାଧାରଣ (Normal) ଏବଂ ତତ୍କାଳ (Tatkal) ଦୁଇ ପ୍ରକାରର ପାସପୋର୍ଟ ପ୍ରସ୍ତୁତ କରିବାର ଫିସ୍ ବୃଦ୍ଧି ପାଇବ। ବୈଦେଶିକ ବ୍ୟାପାର ମନ୍ତ୍ରଣାଳୟ ଭାରତ ଏବଂ ବିଦେଶ ଉଭୟ ସ୍ଥାନରେ ପାସପୋର୍ଟ ସେବା ପାଇଁ ନୂଆ ଫିସ୍ ଲାଗୁ କରିବାକୁ ନିଷ୍ପତ୍ତି ନେଇଛି।
RBI ର କଡ଼ା ନିୟମ
ଭାରତୀୟ ରିଜର୍ଭ ବ୍ୟାଙ୍କ (RBI) ୧ ଜୁଲାଇରୁ ବ୍ୟାଙ୍କଗୁଡ଼ିକ ଦ୍ୱାରା ଗ୍ରାହକମାନଙ୍କୁ ଭୁଲ୍ ତଥ୍ୟ ଦେଇ ଆର୍ଥିକ ଉତ୍ପାଦ ବିକ୍ରି କରିବା (Mis-selling) ଉପରେ ନୂଆ ନିୟମ ଲାଗୁ କରିବ। ଏହି ନୂଆ ନିୟମ ଅନୁଯାୟୀ, ଯଦି କୌଣସି ଗ୍ରାହକଙ୍କୁ ଭୁଲ୍ ସୂଚନା ଦେଇ କୌଣସି ପ୍ରଡକ୍ଟ ବିକ୍ରି କରାଯାଇଛି, ତେବେ ତାଙ୍କୁ ସମ୍ପୂର୍ଣ୍ଣ ଟଙ୍କା ଫେରସ୍ତ ମିଳିବ। ଏହାସହ ହୋଇଥିବା କ୍ଷତିର ସ୍ପେଶାଲ୍ କ୍ଷତିପୂରଣ ମଧ୍ୟ ଦିଆଯିବ। ଏହାଦ୍ୱାରା ବ୍ୟାଙ୍କ ଗ୍ରାହକମାନଙ୍କର ଅଧିକାର ପୂର୍ବ ଅପେକ୍ଷା ଅଧିକ ମଜବୁତ ହେବ।
