ନୂଆଦିଲ୍ଲୀ,୧।୧୨: ନୂତନ ପିଢ଼ିର ଜିଏସ୍ଟି ଟିକସ ସଂସ୍କାରରେ ହାର ହ୍ରାସ ହେବା ପରେ ଏହାର ପ୍ରଭାବ ପରୋକ୍ଷ ଟିକସ ସଂଗ୍ରହ ଉପରେ ପଡ଼ିଛି। ନଭେମ୍ବର ମାସରେ ଜିଏସ୍ଟି ସଂଗ୍ରହରେ ମାତ୍ର ୦.୭ ପ୍ରତିଶତ ବୃଦ୍ଧି ହୋଇ ୧.୭୦ ଲକ୍ଷ କୋଟି ଟଙ୍କାରେ ପହଞ୍ଚିଛି, ଯାହା ଫେବୃଆରୀ ୨୦୨୪ ପରଠାରୁ ମାସିକ ସର୍ବନିମ୍ନ ସଂଗ୍ରହ ଅଟେ। ଏହି ସଂଗ୍ରହ ଅକ୍ଟୋବର ମାସରେ ଉପଭୋଗ କରାଯାଇଥିବା ସାମଗ୍ରୀ ଓ ସେବା ସହ ଜଡ଼ିତ।
ଅର୍ଥ ମନ୍ତ୍ରଣାଳୟର ତଥ୍ୟ ଅନୁଯାୟୀ, ନଭେମ୍ବର ୨୦୨୪ରେ ମୋଟ ଜିଏସ୍ଟି ସଂଗ୍ରହ ଧୀର ଗତିରେ ୦.୭ ପ୍ରତିଶତ ବଢ଼ି ୧,୭୦,୦୦୦ କୋଟିରୁ ଅଧିକ ରହିଛି। ତେବେ, ଏହି ସମୟରେ ଘରୋଇ ରାଜସ୍ୱ ୨.୩ ପ୍ରତିଶତ ହ୍ରାସ ପାଇ ୧.୨୪ ଲକ୍ଷ କୋଟିରୁ ଅଧିକ ହୋଇଛି।
ଅଧିକାରୀମାନେ କହିଛନ୍ତି ଯେ ସେପ୍ଟେମ୍ବର ୨୨ରୁ ୩୭୫ଟି ସାମଗ୍ରୀର ଜିଏସ୍ଟି ହାର କମିବା କାରଣରୁ ଏହି ହ୍ରାସ ଘଟିଛି। ତେବେ, ସାମଗ୍ରୀ ଆମଦାନୀରୁ ଟିକସ ରାଜସ୍ୱ ନଭେମ୍ବରରେ ୧୦.୨ ପ୍ରତିଶତ ବୃଦ୍ଧି ପାଇ ୪୫,୯୭୬ କୋଟି ଟଙ୍କା ହୋଇଛି।
ବିଶେଷଜ୍ଞ ମତ ଦେଇଛନ୍ତି ଯେ ଜିଏସ୍ଟି ହାର ହ୍ରାସ ହେତୁ ଏହି ସଂଗ୍ରହ କମିଛି। ଦୀପାବଳି ପରି ପର୍ବ ସମୟରେ ହାର କମିବା ଦ୍ୱାରା ଅଧିକ କ୍ରୟ ହେବ ଏବଂ ରାଜସ୍ୱ କ୍ଷତି ଭରଣା ହେବ ବୋଲି ଆଶା କରାଯାଉଥିଲା, କିନ୍ତୁ ତାହା ହୋଇନାହିଁ। ଅପରପକ୍ଷରେ, ସରକାର କହିଛନ୍ତି ଯେ ଟିକସ ହାର ସୁସଙ୍ଗତ କରିବା ଦ୍ୱାରା ଉପଭୋଗ ବଢ଼ାଇବାକୁ ଲକ୍ଷ୍ୟ ରଖାଯାଇଛି ଏବଂ ନୂତନ ସଂସ୍କାର ରାଜସ୍ୱ ସ୍ଥିରତାକୁ ବିଶୃଙ୍ଖଳିତ କରିନାହିଁ।
