ଅବୁଜା,୧୭।୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କର ତିନି ଦେଶ ଗସ୍ତର ପ୍ରଥମ ପର୍ଯ୍ୟାୟରେ ରବିବାର ସକାଳେ ନାଇଜେରିଆରେ ପହଞ୍ଚିଥିଲେ। ଆବୁଜା ବିମାନବନ୍ଦରରେ ନାଇଜେରିଆ ରାଷ୍ଟ୍ରପତି ବୋଲା ଅହମ୍ମଦ ଟିନୁବୁ ତାଙ୍କୁ ସ୍ବାଗତ କରିଥିଲେ। ସେଠାରେ ଥିବା କେନ୍ଦ୍ରୀୟ ରାଜଧାନୀ ଅଞ୍ଚଳର ମନ୍ତ୍ରୀ ତାଙ୍କୁ ସାଙ୍କେତିକ ଭାବରେ ଆବୁଜା ‘ସହରର ଚାବି’ ଉପସ୍ଥାପନ କରିଥିଲେ।
ଗତ ୧୭ ବର୍ଷ ମଧ୍ୟରେ ଏହି ଦେଶକୁ ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରଥମ ଗସ୍ତ। ଏହାପୂର୍ବରୁ ୨୦୦୭ରେ ତତ୍କାଳୀନ ପ୍ରଧାନମନ୍ତ୍ରୀ ମନମୋହନ ସିଂ ନାଇଜେରିଆ ଗସ୍ତ କରିଥିଲେ।
ପ୍ରଧାନମନ୍ତ୍ରୀ ମୋଦିଙ୍କୁ ସ୍ବାଗତ କରିବାକୁ ଭାରତୀୟ ସମ୍ପ୍ରଦାୟର ବହୁ ସଂଖ୍ୟକ ଲୋକ ଅବୁଜା ବିମାନବନ୍ଦରରେ ପହଞ୍ଚିଥିଲେ। ଲୋକମାନେ ଏହି ଅବସରରେ ‘ଭାରତ ମାତା କି ଜୟ’ ଏବଂ ‘ବନ୍ଦେ ମାତାରାମ’ର ସ୍ଲୋଗାନ ଦେଇଥିଲେ।
ତାଙ୍କୁ ସ୍ବାଗତ କରିଥିବାରୁ ନାଇଜେରିଆର ଭାରତୀୟ ସମ୍ପ୍ରଦାୟକୁ ଧନ୍ୟବାଦ ଜଣାଇ ପ୍ରଧାନମନ୍ତ୍ରୀ ମୋଦି ଇନଷ୍ଟାଗ୍ରାମରେ ଏକ ପୋଷ୍ଟରେ ଲେଖିଛନ୍ତି, ନାଇଜେରିଆରେ ଭାରତୀୟ ସମ୍ପ୍ରଦାୟ ଦ୍ୱାରା ଏପରି ଉଷ୍ମ ଏବଂ ଉତ୍ସାହଜନକ ସ୍ବାଗତ ହୃଦୟସ୍ପର୍ଶୀ!
ସେ ନାଇଜେରିଆରେ ରହୁଥିବା ଭାରତୀୟ ସମ୍ପ୍ରଦାୟକୁ ମଧ୍ୟ ପ୍ରଶଂସା କରିଥିଲେ। ପ୍ରଧାନମନ୍ତ୍ରୀ ପଶ୍ଚିମ ଆଫ୍ରିକା ଦେଶରେ ରହୁଥିବା ବହୁ ସଂଖ୍ୟାରେ ଭାରତୀୟ ମହିଳା, ଶିଶୁ ଏବଂ ପୁରୁଷଙ୍କ ସହ ଯୋଗାଯୋଗ କରିଥିଲେ ଏବଂ ସେମାନଙ୍କ ସହ ଫଟୋଗ୍ରାଫ ମଧ୍ୟ ଅପଲୋଡ କରିଥିଲେ।
୧୬ ଏବଂ ୧୭ ନଭେମ୍ବରରେ ନାଇଜେରିଆ ଗସ୍ତ ପରେ ପ୍ରଧାନମନ୍ତ୍ରୀ ମୋଦି ଜି -୨୦ ଶିଖର ସମ୍ମିଳନୀ ପାଇଁ ବ୍ରାଜିଲ ଗସ୍ତ କରିବେ। ପ୍ରଧାନମନ୍ତ୍ରୀ ମୋଦୀଙ୍କର ଶେଷ ଗନ୍ତବ୍ୟସ୍ଥଳ ହେଉଛି ଗୁୟାନା।
