ଗୁଣପୁର,୭ା୩(ସୁଜାତା ପାଢ଼ୀ): ରାୟଗଡ଼ା ଜିଲା ଗୁଣପୁର ଉପଜିଲାପାଳ ଦୁଧାଲ ଅଭିଷେକ ଦିଲ୍ଲୀପଙ୍କ ନେତୃତ୍ୱରେ ବେଆଇନ ବାଲିଚାଲାଣ ଓ ଧରପଗଡ଼ ହୋଇଥିଲା। ଭୋର୍ ସମୟରେ ହଠାତ୍ ଉପଜିଲାପାଳଙ୍କ ନେତୃତ୍ୱରେ ଦୁଇ ଡେପୁଟି କଲେକ୍ଟର ଶୁଭ୍ରସ୍ନାତ ରାଉତ, ଯୋହନ ବଡ଼ଭୂୟାଁ, ଦୁଇ ଅତିରିକ୍ତ ତହସିଲଦାର ଅଭିଳାଷ ଶତପଥୀ, ଦୀପାରାଣୀ ବେହେରା, କନିଷ୍ଠ ଖଣି ଅଧିକାରୀ ରାଜେନ୍ଦ୍ର ବିଶୋୟୀଙ୍କ ସହ ବାଲିଖାଦାନ ଚଢ଼ାଉ କରି ୭ଟି ଟ୍ରାକ୍ଟର ଜବତ କରିଥିଲେ। ଟ୍ରାକ୍ଟରଗୁଡ଼ିକର କାଗଜପତ୍ର ଅବୈଧ ଥିବା ସହ ଚାଳକମାନଙ୍କ ଲାଇସେନ୍ସ ନ ଥିଲା ଓ ଅନୁମତିଠାରୁ ଅଧିକ ବାଲି ଉଠାଣ ହୋଇଥିବା ନଜରକୁ ଆସିଥିଲା। ପ୍ରତିଦିନ ବେଆଇନ ବାଲି ଚାଲାଣ ହେଉଥିବା ଖବର ବାରମ୍ବାର ଉପଜିଲାପାଳଙ୍କ ନଜରକୁ ଆସିବା ପରେ ଓ ଇସ୍ପାତ ଓ ଖଣି ବିଭାଗ ଦ୍ୱାରା ଜାରି ହୋଇଥିବା ନୂତନ ମାନକ କାର୍ଯ୍ୟାନୁଷ୍ଠାନ ପ୍ରଣାଳୀ (SOP)ନଂ: ୨୩୪୫ ତା:୦୨-୦୩-୨୦୨୬ ଅନୁଯାୟୀ ଚଢ଼ାଉ କରାଯାଇଥିଲା।
ଶନିବାର ମୋଟ୍ ୭ଟି ଟ୍ରାକ୍ଟରରୁ ୩,୫୬,୫୫୨ ଟଙ୍କା ଖଣି ବିଭାଗ ତରଫରୁ ଫାଇନ କରାଯାଇଥିଲା ଓ ଚାଲାଣ ମାଧ୍ୟମରେ ଅଦାୟ କରାଯାଇଥିଲା। ଗତ ୫ ତାରିଖରେ ବେଆଇନ ବାଲି ଚାଲାଣ ହେଉଥିବା ଏକ ଟିପ୍ପର ଖଣି ବିଭାଗ ଓ ପୋଲିସ ବିଭାଗ ଦ୍ୱାରା ଜବତ କରି ସେହି ଟିପ୍ପର ମାଲିକଙ୍କଠାରୁ ୪,୦୧,୨୯୬ ଟଙ୍କା ଖଣି ବିଭାଗ ତରଫରୁ ଜରିମାନା ଆଦାୟ କରାଯାଇଥିଲା। ଆଗାମୀ ଦିନରେ ବେଆଇନ ବାଲି ଚାଲାଣ, ଅବୈଧ କାଗଜପତ୍ର ସହ ବାଲି ଉଠାଣ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ ସୂଚନା ଦେଇଛନ୍ତି।