ଯାଜପୁର ଅଫିସ,୨୦ା୧: ଯାଜପୁର ଜିଲା ରନତ୍ଗର୍ଭା ସୁକିନ୍ଦା ଅଞ୍ଚଳରେ ଭୂତଳ ଖଣି କାର୍ଯ୍ୟରେ ଏବେ ପ୍ରଚୁର ପରିମାଣରେ ବାଲିର ଆବଶ୍ୟକ ପଡୁଛି। ଏଥିଯୋଗୁ ବେଆଇନ ବାଲି ଉତ୍ତୋଳନ ଓ ପରିବହନ କେତେଜଣ ବିଭାଗୀୟ ଅଧିକାରୀଙ୍କ ସୁରକ୍ଷାରେ ଅଣାୟତ ହୋଇଛି। କାଳିଆପାଣି ଖଣି ଅଞ୍ଚଳର ବିଭିନ୍ନ ଜଙ୍ଗଲ ଜମି ଓ ଓଡ଼ିଶା ଖଣି ନିଗମର ଜମିକୁ ବାଛି ପାହାଡ଼ ଭଳି ବାଲି ଗଦା କରି ରଖିଥିବା ଦେଖିବାକୁ ମିଳୁଛି। ସେଠାରେ ପୋଲିସ, ପ୍ରଶାସନକୁ ହାତ କରି ଏହି ବେଆଇନ କାର୍ଯ୍ୟ ଆଇନ ସଙ୍ଗତ ହେଉଥିବା ଅଭିଯୋଗ ହେଉଛି।
ମିଳିଥିବା ସୂଚନା ଅନୁଯାୟୀ, ଖଣିରେ କ୍ରୋମାଇଟ ଉତ୍ତୋଳନ ଅନୁଯାୟୀ ସମ ପରିମାଣର ବାଲିର ଆବଶ୍ୟକ ହେଉଥିବାରୁ ନକଲି କିମ୍ବା ବିନା ଟିପି(ଟ୍ରାନଜିଟ ପାସ୍)ରେ ବିଭିନ୍ନ ଖଣିକୁ ବାଲି ପରିବହନ ହେଉଛି। ଢେଙ୍କାନାଳ ଜିଲା ଭୁବନ ବ୍ରାହ୍ମଣୀ ନଦୀରୁ ଦୈନିକ ଏକାଧିକ ଟ୍ରିପ୍ ବାଲି ହାଇୱା ଯୋଗେ ବୁହା ଯାଉଥିବାବେଳେ ଦିନକୁ ଗୋଟିଏ ଟ୍ରିପ୍ର ରୟାଲଟି ପେପର କାଟି ବାକି ରୟାଲଟି ଅର୍ଥକୁ ଫାଙ୍କି ଦେଉଥିବା ଅଭିଯୋଗ ହେଉଛି। ଟ୍ରକ ମୁଖ୍ୟରାସ୍ତା ଭୁବନଠାରୁ ଭାୟା ମଙ୍ଗଳପୁର ଖଣି ଅଞ୍ଚଳକୁ ଆସିବା ନିୟମ ଥିବାବେଳେ ଓଭର ଲୋଡ଼ ଟ୍ରକ ଗ୍ରାମାଞ୍ଚଳ ରାସ୍ତାରେ ଯାତାୟତ କରୁଛି ା ଫଳରେ ସେହି ରାସ୍ତା ନଷ୍ଟ ହେବା ସହ ସରୁ ରାସ୍ତା ପାଇଁ ଜନସାଧାରଣ ନାହିଁ ନ ଥିବା ଅସୁବିଧା ସମ୍ମୁଖୀନ ହେଉଛନ୍ତି । ଦୀର୍ଘଦିନ ଧରି ଏହି ବେଆଇନ କାର୍ଯ୍ୟ ଚାଲୁ ରହିଥିବା ବେଳେ ସମ୍ପୃକ୍ତ ଆରଟିଓ କିମ୍ବା ସୁକିନ୍ଦା ତହସିଲଦାର ଜାଣି ଆଖିବୁଜି ଦେଉଛନ୍ତି। ଏନେଇ ସୁକିନ୍ଦା ତହସିଲଦାର କାବେରୀ ମୁଦୁଲିଙ୍କୁ ଯୋଗାଯୋଗ କରିବାରୁ ତାଙ୍କ ନିକଟରେ ଏପରି ବେଆଇନ ଭାବେ ବାଲି ଡିପୋ ହେଉଥିବା ଖବର ନାହିଁ। ଅଭିଯୋଗ ହେଲେ ସେ ତୁରନ୍ତ ପଦକ୍ଷେପ ନେବେ ବୋଲି ପ୍ରକାଶ କରିଛନ୍ତି।