ବୈଧ ବାଲାନ୍ସ ଥାଇ ମଧ୍ୟ KYC ସମ୍ପୂର୍ଣ୍ଣ ହୋଇ ନ ଥିଲେ ଜାନୁଆରୀ ୩୧ ପରେ ବ୍ୟାଙ୍କଗୁଡ଼ିକ ଫାସ୍ଟାଗ୍କୁ ଅକାମୀ କରିଦେବେ କିମ୍ବା ଏହାକୁ କଳା ତାଲିକାଭୁକ୍ତ କରିବେ। ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ପକ୍ଷରୁ ସୋମବାର ଏହା ଘୋଷଣା କରାଯାଇଛି। ଏହି ଅସୁବିଧାରୁ ବର୍ତ୍ତିବା ପାଇଁ ହେଲେ ୟୁଜରମାନେ ସେମାନଙ୍କର ସଦ୍ୟତମ ଫାସ୍ଟାଗ୍ର KYC ସମ୍ପୂର୍ଣ୍ଣ ହୋଇଥିବା ନେଇ ନିଶ୍ଚିତ ହେବାକୁ ପରାମର୍ଶ ଦିଆଯାଇଛି। ୟୁଜରମାନେ ‘ଗୋଟିଏ ଗାଡ଼ି, ଗୋଟିଏ ଫାସ୍ଟାଗ୍’ ନିୟମ ଅନୁପାଳନ କରିବାକୁ ବାଧ୍ୟ। ପୂର୍ବରୁ ଜାରି ହୋଇଥିବା ଅନ୍ୟ ସମସ୍ତ ଫାସ୍ଟାଗ୍କୁ ବ୍ୟାଙ୍କ ଜରିଆରେ ବାତିଲ କରିଦେବାକୁ ମନ୍ତ୍ରଣାଳୟ କହିଛି। ୨୦୨୪ ଜାନୁଆରୀ ୩୧ ପରେ ପୂର୍ବ ଟ୍ୟାଗ୍ଗୁଡ଼ିକ ଡିଆକ୍ଟିଭେଟ୍ କିମ୍ବା କଳା ତାଲିକାଭୁକ୍ତ ହେବ ଏବଂ କେବଳ ସଦ୍ୟତମ ଫାସ୍ଟାଗ୍ ଆକାଉଣ୍ଟ ସଚଳ ରହିବ ବୋଲି କୁହାଯାଇଛି। ଏ ସମ୍ପର୍କରେ ଅଧିକ ଜାଣିବା ପାଇଁ ଫାସ୍ଟାଗ୍ ୟୁଜରମାନଙ୍କୁ ନିକଟବର୍ତ୍ତୀ ଟୋଲ୍ ପ୍ଲାଜାରେ ପହଞ୍ଚତ୍ବାକୁ କିମ୍ବା ସମ୍ପୃକ୍ତ ବ୍ୟାଙ୍କର ଦେୟମୁକ୍ତ କଷ୍ଟମର କେୟାର ନମ୍ବରରେ ଯୋଗାଯୋଗ କରିବାକୁ ପରାମର୍ଶ ଦିଆଯାଇଛି। ଏକ ନିର୍ଦ୍ଦିଷ୍ଟ ଯାନ ପାଇଁ ଏକାଧିକ ଫାସ୍ଟାଗ୍ ଇସ୍ୟୁ ହେବା ଏବଂ ରିଜର୍ଭ ବ୍ୟାଙ୍କ ନିର୍ଦ୍ଦେଶର ଉଲ୍ଲଂଘନ କରାଯାଇ ବିନା KYCରେ ଫାସ୍ଟାଗ୍ ଜାରି ହେଉଥିବା ଜଣାପଡ଼ିବା ପରେ ଭାରତର ଜାତୀୟ ରାଜପଥ କର୍ତ୍ତୃପକ୍ଷ (ଏନ୍ଏଚ୍ଏଆଇ) ଉପରୋକ୍ତ ପଦକ୍ଷେପ ନେଇଛନ୍ତି। ଏହା ବ୍ୟତୀତ ବେଳେବେଳେ ଜାଣିଶୁଣି ଯାନର ଓ୍ବିଣ୍ଡସ୍କ୍ରିନ୍ରେ ଫାସ୍ଟାଗ୍କୁ ଲଗାଯାଉ ନାହିଁ। ଫଳରେ ଟୋଲ୍ ପ୍ଲାଜାରେ ଅଯଥା ବିଳମ୍ବ ହେଉଛି ଓ ଅନ୍ୟମାନେ ଅସୁବିଧାର ସମ୍ମୁଖୀନ ହୋଇଛନ୍ତି।
ଟୋଲ୍ ପ୍ଲାଜାଗୁଡ଼ିକରେ ପ୍ରବେଶ ହାର ୯୮ ପ୍ରତିଶତ ରହିଥିବାବେଳେ ୮ କୋଟି ୟୁଜର ଅଛନ୍ତି। ଦେଶରେ ଇଲେକ୍ଟ୍ରେନିକ୍ ଭାବେ ଟୋଲ୍ ସଂଗ୍ରହ ବ୍ୟବସ୍ଥାରେ ଫାସ୍ଟାଗ୍ ବିପ୍ଳବ ଆଣିଛି। ‘ଓ୍ବାନ୍ ଭେହିକିଲ୍, ଓ୍ବାନ୍ ଫାସ୍ଟାଗ୍’ବ୍ୟବସ୍ଥା ଟୋଲ୍ ସଂଗ୍ରହକୁ ଅଧିକ ପ୍ରଭାବୀ ଏବଂ ସହଜ କରିବା ସହ ଜାତୀୟ ରାଜପଥ ବ୍ୟବହାରକାରୀମାନଙ୍କ ଯାତ୍ରାକୁ ଆରାମଦାୟକ କରିଛି। ଦେଶର ବର୍ଦ୍ଧିତ ଜାତୀୟ ରାଜପଥ ନେଟ୍ଓ୍ବର୍କ ପାଇଁ ଏକ ‘ଗ୍ରୀନ୍ କଭର ଇଣ୍ଡେକ୍ସ’ର ବିକାଶ ନିମନ୍ତେ ଏନ୍ଏଚ୍ଏଆଇ ନ୍ୟାଶନାଲ ରିମୋଟ୍ ସେନ୍ସିଂ ସେଣ୍ଟର (ଏନ୍ଆର୍ଏସ୍ସି) ସହ ଚୁକ୍ତି ସ୍ବାକ୍ଷର କରିଥିଲା। ଏନ୍ଏଚ୍ଏଆଇ ବ୍ୟବହାର କରୁଥିବା ଟେକ୍ନୋଲୋଜିର ସାମର୍ଥ୍ୟକୁ ଉପଯୋଗ କରି ଏନ୍ଆର୍ଏସ୍ସି ହାଇ ରିଜଲ୍ୟୁଶନ ସାଟେଲାଇଟ୍ ପରିକଳ୍ପନା ସହାୟତାରେ ଗ୍ରୀନ୍ କଭରର ଏକ ବିସ୍ତୃତ ପାନ୍-ଇଣ୍ଡିଆ ଆକଳନ ପ୍ରସ୍ତୁତ କରିବ ବୋଲି ଏକ ବିବୃତିରେ କୁହାଯାଇଛି।
