ଢାକା,୨।୫: ଜମ୍ମୁ ଏବଂ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ, ଭାରତ ପାକିସ୍ତାନ ବିରୁଦ୍ଧରେ ଅନେକ କଠୋର କଟକଣା ଲଗାଉଛି ଏବଂ କାର୍ଯ୍ୟାନୁଷ୍ଠାନ ଜାରି ରହିଛି। ଏହି ସମୟରେ ଜଣେ ପୂର୍ବତନ ବାଂଲାଦେଶ ସାମରିକ ଅଧିକାରୀ ଏକ ବିବାଦୀୟ ବୟାନ ଦେଇଛନ୍ତି। ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ମୁଖ୍ୟ ମହମ୍ମଦ ୟୁନୁସଙ୍କ ଘନିଷ୍ଠ ସହଯୋଗୀ ଏଏଲ୍ଏମ୍ ଫଜଲୁର ରହମାନ କହିଛନ୍ତି ଯେ ଯଦି ଭାରତ ପାକିସ୍ତାନ ଉପରେ ଆକ୍ରମଣ କରେ, ତେବେ ଢାକାକୁ ଚାଇନା ସହିତ ହାତ ମିଳାଇ ଉତ୍ତର-ପୂର୍ବକୁ କବଜା କରିବା ଉଚିତ।
ବାଂଲାଦେଶର ଅବସରପ୍ରାପ୍ତ ମେଜର ଜେନେରାଲ ଏଏଲ୍ଏମ୍ ଫଜଲୁର ରହମାନ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଏକ ପୋଷ୍ଟରେ ଲେଖିଛନ୍ତି ଯେ ଆମକୁ ମିଳିତ ସାମରିକ ବ୍ୟବସ୍ଥା ବିଷୟରେ ଚାଇନା ସହିତ ଆଲୋଚନା ଆରମ୍ଭ କରିବା ଉଚିତ। ତେବେ ମହମ୍ମଦ ୟୁନୁସଙ୍କ ନେତୃତ୍ୱାଧୀନ ମଧ୍ୟବର୍ତ୍ତୀକାଳୀନ ସରକାର ଡିସେମ୍ବର ୨୦୨୪ ରେ ଫଜଲୁର ରେହମାନଙ୍କୁ ଜାତୀୟ ସ୍ବାଧୀନ କମିଶନର ଅଧ୍ୟକ୍ଷ ଭାବରେ ନିଯୁକ୍ତ କରିଥିଲେ।
ଅପରପକ୍ଷେ ବାଂଲାଦେଶ ବୈଦେଶିକ ମନ୍ତ୍ରଣାଳୟ ଫଜଲୁର ରହମାନଙ୍କ ସାମ୍ପ୍ରତିକ ବକ୍ତବ୍ୟରୁ ନିଜକୁ ଦୂରେଇ ରଖି କହିଛି ଯେ ତାଙ୍କ ବକ୍ତବ୍ୟ ସରକାରଙ୍କ ନୀତିକୁ ପ୍ରତିଫଳିତ କରେ ନାହିଁ ଏବଂ ସରକାର ଏପରି ବୟାନବାଜିକୁ ସମର୍ଥନ କରେ ନାହିଁ।
୨୦୦୯ ବାଂଲାଦେଶ ରାଇଫଲ୍ସ (BDR) ଗଣହତ୍ୟାର ତଦନ୍ତ କରୁଥିବା ଫଜଲୁର ରହମାନଙ୍କ ଏହି ବୟାନ ଏପରି ଏକ ସମୟରେ ଆସିଛି ଯେତେବେଳେ ଗତ ବର୍ଷ ଅଗଷ୍ଟରେ ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କୁ କ୍ଷମତାରୁ ବହିଷ୍କାର କରିବା ପରେ ଭାରତ ସହିତ ବାଂଲାଦେଶର ସମ୍ପର୍କ ତିକ୍ତ ହୋଇଛି। ବୈଦେଶିକ ମନ୍ତ୍ରଣାଳୟ କହିଛି ଯେ ବାଂଲାଦେଶ ସମସ୍ତ ଦେଶର ସାର୍ବଭୌମତ୍ୱ, କ୍ଷେତ୍ରୀୟ ଅଖଣ୍ଡତା, ପାରସ୍ପରିକ ସମ୍ମାନ ଏବଂ ଶାନ୍ତିପୂର୍ଣ୍ଣ ସହାବସ୍ଥାନର ନୀତି ପ୍ରତି ଦୃଢ଼ ଭାବରେ ପ୍ରତିବଦ୍ଧ।
ସୂଚନାଯୋଗ୍ୟ, ଏପ୍ରିଲ ୨୨ ତାରିଖରେ, ପହଲଗାମର ବୈସାରନ ଉପତ୍ୟକାରେ ଆତଙ୍କବାଦୀମାନେ ପର୍ଯ୍ୟଟକଙ୍କୁ ଟାର୍ଗେଟ କରି ଆଖିବୁଜା ଗୁଳିଚାଳନା କରିଥିଲେ। ଏହି ଆକ୍ରମଣରେ ଜଣେ ନେପାଳୀ ନାଗରିକଙ୍କ ସମେତ ୨୬ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଥିଲେ।
