ଭୁବନେଶ୍ୱର, ୧୨।୭(ସୁନିତ୍ ମିଶ୍ର):ପହଣ୍ଡି ସମୟରେ ଚାରମାଳ ଉପରେ ବଳଭଦ୍ର ପଡ଼ିଯିବା ଘଟଣାକୁ ନେଇ ରାଜନୀତି ଥମିବାର ନାଁ ଧରୁନାହିଁ। ଏହି ଘଟଣାରେ ବାରମ୍ବାର ଶାସକ ଏବଂ ବିରୋଧୀ ମୁହାଁମୁହିଁ ହେବାରେ ଲାଗିଛନ୍ତି। ବିଜେଡି ଓ କଂଗ୍ରେସ ଏହି ବିଭ୍ରାଟ ଲାଗି ସରକାରକୁ ଟାର୍ଗେଟ କରିଥିବା ବେଳେ ଭାଜପା ଏହାର ପାଲଟା ଜବାବ ରଖିଛି।
ବିଜେଡି ନେତା ଅମର ପ୍ରସାଦ ଶତପଥୀ କହିଛନ୍ତି, ଏଥିରେ କୌଣସି ରାଜନୈତିକ କଥା ନାହିଁ। ଏହା ଭକ୍ତଙ୍କ ଭାବାବେଗର କଥା। ଏହାକୁ ନେଇ କୁହାଗଲା ପ୍ରଥମେ ଏହା ହେଉଛି ଲୀଳାମୟଙ୍କ ଇଚ୍ଛା, ଏଭଳି ବିବୃତି ଶୋଭନୀୟ କି ଗ୍ରହଣୀୟ ନୁହେଁ। ସବୁ ଯଦି ଲୀଳାମୟଙ୍କ ଇଚ୍ଛା, ତେବେ ପ୍ରଶାସନ ପକ୍ଷରୁ ଏତେ ପ୍ରସ୍ତୁତି କରିବାର ଆବଶ୍ୟକତା କ’ଣ ଅଛି ବୋଲି ଅମର କହିଛନ୍ତି।
କଂଗ୍ରେସ ନେତା ପ୍ରସାଦ ହରିଚନ୍ଦନ କହିଛନ୍ତି, ଏହା ପ୍ରଭୁଙ୍କ ଇଚ୍ଛା ବୋଲି ଉଲ୍ଲେଖ କରାଯାଉଛି, ଏହାକୁ କିଭଳି ସମାଲୋଚନା କରାଯିବ। ଏହା ଉପରେ କାହିଁକି ବି ସମାଲୋଚନା କରିବେ। ଏଥିଲାଗି ନିଜକୁ ଦାୟୀ କରୁଛି, ଆମେ ଏଭଳି ଏକ ଅଭାବନୀୟ ଅଘଟଣର ପଶ୍ଚାତାପ ଏବଂ ଆତ୍ମଶୁଦ୍ଧି ପାଇଁ ନବମୀ ସନ୍ଧ୍ୟା ଦର୍ଶନ ଅବସରରେ ଗୋଟିଏ ଓଳି ଉପବାସ କରନ୍ତୁ। ମୁଖ୍ୟମନ୍ତ୍ରୀ ଏବଂ ବିରୋଧୀ ଦଳ ନେତା ଚାହିଁିଲେ ମଧ୍ୟ ଏନେଇ ଅନ୍ୟମାନଙ୍କୁ ପାଳନ କରିବା ଲାଗି କହିପାରିବେ। ଏହା ଅତ୍ୟନ୍ତ ଅଭାବନୀୟ, ଅତିବ ଶୋଚନୀୟ ଘଟଣା। କୋଟି କୋଟି ଭକ୍ତଙ୍କୁ ମାର୍ମିକ ଭାବେ ସେମାନେ ମଧ୍ୟ ମର୍ମାହତ ବୋଲି ପ୍ରସାଦ କହିଛନ୍ତି।
ଭାଜପା ନେତା ବିରଞ୍ଚି ତ୍ରିପାଠୀ କହିଛନ୍ତି, ଗତବର୍ଷ ରଥ ସମୟରେ ସମାନ ଭାବେ ଯେଉଁ ବିଭ୍ରାଟ ଘଟିଲା ତା’ର ତଦନ୍ତ କରିବା ପରେ ଏନେଇ ଯିଏ ଦୋଷୀ ଥିଲେ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନେଇଥାଆନ୍ତେ ହୁଏତ ଆଜି ଏ ପ୍ରକାର ଘଟଣା ଦେଖିବା ଲାଗି ମିଳି ନ ଥାଆନ୍ତା। ଯେତେବେଳେ ବି ବ୍ରହ୍ମ ଏବଂ ଦାରୁ ବିଭ୍ରାଟ ହେଲା ସେତେବେଳେ ତା’ ଉପରେ କି କାର୍ଯ୍ୟାନୁଷ୍ଠାନ ନିଆଯାଇଥିଲା ବୋଲି ବିରଞ୍ଚି ପ୍ରଶ୍ନ କରିଛନ୍ତି।
