ଭାଇରସ୍ ବା ଭୂତାଣୁ ଜୀବଜଗତ ପାଇଁ ଯେତିକି ହାନିକାରକ ସେତିକି ଲାଭଦାୟକ ମଧ୍ୟ। ଭାଇରସ ବିନା ପୃଥିବୀରେ ଜୀବନ ଧାରଣ ଅସମ୍ଭବ। ଯଦି ଅଚାନକ ପୃଥିବୀରୁ ସମସ୍ତ ଭାଇରସ୍ ନଷ୍ଟ ହୋଇଯିବ ତେବେ ପୃଥିବୀରୁ ସମସ୍ତ ଜୀବ ମରିବା ପାଇଁ ମାତ୍ର ଦେଢ଼ ଦିନ ଲାଗିବ। ବିଶ୍ୱରେ ଏବେ କରୋନା ଭାଇରସ୍ କାୟା ବିସ୍ତାର କରିଚାଲିଛି। ସମଗ୍ର ବିଶ୍ୱରେ ବର୍ତ୍ତମାନ ସୁଦ୍ଧା ୧.୫କୋଟିରୁ ଅଧିକ ଲୋକ ଏହି ଭାରଇସ୍ ଦ୍ୱାରା ସଂକ୍ରମିତ ହୋଇଛନ୍ତି। ସାଢ଼େ ୫ ଲକ୍ଷରୁ ଅଧିକ ଲୋକଙ୍କ ଜୀବନ ଯାଇସାରିଲାଣି। ୬୦ ଲକ୍ଷରୁ ଅଧିକ ଲୋକ ଏହି ରୋଗରୁ ଭଲ ହୋଇଛନ୍ତି। ପ୍ରତ୍ୟେକ ଦେଶ ଏହି ଭାଇରସ୍ରୁ କେମିତି ମୁକୁଳିବେ ଚିନ୍ତା କରୁଛନ୍ତି। ଦିନରାତି ଏକ କରି ଏହାର ଟିକା ବାହାର କରିବାରେ ଲାଗିପଡ଼ିଛନ୍ତି। ବର୍ତ୍ତମାନ ସୁଦ୍ଧା କୌଣସି ସଫଳତା ମିଳିନାହିଁ।
ଭାଇରସ୍ ସମଗ୍ର ପୃଥିବୀରୁ ନଷ୍ଟ ହୋଇଯିବାକୁ ସମସ୍ତେ ଚାହୁଁଛନ୍ତି। ମାତ୍ର ପୃଥିବୀରୁ ଯଦି ସମସ୍ତ ଭାଇରସ୍ ନଷ୍ଟ ହୋଇଯିବ ତେବେ ସାରା ପୃଥିବୀ ଧ୍ୱଂସ ହେବାକୁ କମ୍ ସମୟ ଲାଗିବ।
ଆମେରିକା ୟୁନିଭର୍ସିଟି ଅଫ୍ ଉଇସୋକନ୍ସିନ୍ ମାଡିସନ୍ର ମହାମାରୀ ବିଶେଷଜ୍ଞ ଟୋନି ଗୋଲ୍ଡବର୍ଗଙ୍କ ମତରେ, ବିନା ଭାଇରସ୍ରେ ମଣିଷ ବଞ୍ଚିବା ସମ୍ଭବ ନୁହେଁ। ପୃଥିବୀରେ ବଞ୍ଚିବାକୁ ହେଲେ ଭାଇରସ୍ ରହିବା ଦରକାର। ଗୋଲ୍ଡବର୍ଗଙ୍କ କହିବା ଅନୁଯାୟୀ, ଯଦି ହଠାତ୍ ପୃଥିବୀରୁ ଭାଇରସ୍ ନଷ୍ଟ ହୋଇଯିବେ ତେବେ ସମସ୍ତ ଜୀବଙ୍କୁ ମରିବା ପାଇଁ ଏକରୁ ଦେଢ଼ଦିନ ଲାଗିବ। ତେଣୁ ସମସ୍ତ ଭାଇରସ୍ ନ ମରିବା ଦରକାର।
ଟୋନି କୁହନ୍ତି, ପୃଥିବୀରେ ବିଭିନ୍ନ ପ୍ରକାର ଭାଇରସ୍ ବା ଭୂତାଣୁ ଅଛନ୍ତି। ଯାହାକୁ ଗଣି ହେବ ନାହିଁ। ଏଥିମଧ୍ୟରୁ ଅଧିକାଂଶ ଭୂତାଣୁ ମଣିଷ ଶରୀରରେ ରୋଗ ସୃଷ୍ଟି କରନ୍ତି ନାହିଁ। ହଜାରେ ଭାଇରସ୍ ଏମିତି ଅଛନ୍ତି, ଯାହା ପୃଥିବୀର ଇକୋସିଷ୍ଟମ ଚଳାଇବାରେ ମୁଖ୍ୟ ଭୂମିକା ନିର୍ବାହ କରିଥାଏ।
ମେକ୍ସିକୋର ନ୍ୟାଶନାଲ ଅଟୋନମସ୍ ୟୁନିଭରସିଟିର ଭାଇରସ୍ ବିଶେଷଜ୍ଞ ସୁସାନା ଲୋପେଜ ଶୈରେଟନ୍ଙ୍କ କହିବା ଅସୁସାରେ, ପୃଥିବୀରେ ଭାଇରସ୍ ବା ଭୂତାଣୁ ଏବଂ ଅନ୍ୟ ଜୀବ ସମ୍ପୂର୍ଣ୍ଣ ଭାବେ ସନ୍ତୁଳିତ ବାତାବରଣରେ ରହିଥାନ୍ତି। ତେଣୁ ବିନା ଭାଇରସ୍ରେ ଆମେ ବଞ୍ଚିପାରିବା ନାହିଁ। ପୃଥିବୀ ପୃଷ୍ଠରେ ଜୀବନ ଧାରଣ କରିବାକୁ ହେଲେ ଭାଇରସ୍ର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଆମେ କେବଳ ଯେଉଁ ଭାଇରସ୍ ଦ୍ୱାରା ରୋଗ ସୃଷ୍ଟି ହେଉଛି ତା’ରି ସମ୍ପର୍କରେ ଅନୁସନ୍ଧାନ ବା ପରୀକ୍ଷା ନିରୀକ୍ଷା କରୁଛେ। କିନ୍ତୁ କେତେକ ଭାଇରସ୍ ଉପକାରୀ ଅଛନ୍ତି। ଯାହା ଦ୍ୱାରା ଜୀବଜଗତ ବଞ୍ଚିଛି। ଏହା ଉପରେ ମଧ୍ୟ ଅଧ୍ୟୟନ ହେବା ଜରୁରୀ।
