ଭୁବନେଶ୍ୱର,୪।୭: ଭାରତୀୟ ଷ୍ଟେଟ୍ ବ୍ୟାଙ୍କ୍ (ଏସବିଆଇ)ର ୬୮ ତମ ବ୍ୟାଙ୍କ୍ ଦିବସ ନିକଟରେ ପାଳିତ ହୋଇଯାଇଛି। ଏସବିଆଇର ଡିଜିଟାଲ୍ ବ୍ୟାଙ୍କିଙ୍ଗ୍ ଆପ୍ ‘ୟୋନୋ’ରେ କେତେକ ନୂତନ ସୁବିଧାର ଶୁଭାରମ୍ଭ କରାଯାଇଥିବାବେଳେ ଇଣ୍ଟରଅପରେବଲ୍ କାର୍ଡଲେସ୍ ନଗଦ ଉଠାଣ (ଆଇସିସିଡବ୍ଲ୍ୟୁ) ସୁବିଧା ମଧ୍ୟ ଏସବିଆଇ ପକ୍ଷରୁ ଆରମ୍ଭ କରାଯାଇଛି। ବିଶେଷ କରି ‘ସବୁ ଭାରତୀୟଙ୍କ ପାଇଁ ୟୋନୋ’ ସହିତ ବ୍ୟାଙ୍କର ଗ୍ରାହକମାନେ ବର୍ତ୍ତମାନ ‘ସ୍କାନ ଆଣ୍ଡ୍ ପେ’, ପେ ବାଏ କଣ୍ଟାକ୍ଟ, ଅର୍ଥରାଶି ପାଇଁ ଅନୁରୋଧ ଆଦି ସୁବିଧାକୁ ନୂଆ ୟୁନୋ ଆପ୍ରେ ପାଇପାରିବେ। ଅପରପକ୍ଷରେ ଇଣ୍ଟରଅପରେବଲ୍ କାର୍ଡଲେସ୍ ନଗଦ ଉଠାଣ ସୁବିଧା ସହିତ ଉଭୟ ଏସବିଆଇ ଓ ଅଣ-ଏସବିଆଇ ଗ୍ରାହକମାନେ ଆଇସିସିଡବ୍ଲ୍ୟୁ ସକ୍ଷମ ଥିବା ଯେକୌଣସି ବ୍ୟାଙ୍କର ଏଟିଏମ୍ରୁ ‘ୟୁପିଆଇ କ୍ୟୁଆର୍ କ୍ୟାଶ୍’କୁ ବ୍ୟବହାର କରି ନିରବଚ୍ଛିନ୍ନ ଭାବେ ନଗଦ ଟଙ୍କା ଉଠାଇପାରିବେ। ଏଟିଏମ୍ ସ୍କ୍ରିନ୍ରେ ଥିବା କ୍ୟୁଆର୍ କୋଡ୍ ଜରିଆରେ ଏହି କାରବାର ସମ୍ପାଦିତ ହେବ। ଗ୍ରାହକମାନେ ସେମାନଙ୍କ ୟୁପିଆଇ ଆପ୍ରେ ଉପଲବ୍ଧ ଥିବା ସ୍କାନ୍ ଆଣ୍ଡ୍ ପେ’କୁ ବ୍ୟବହାର କରି ସୁବିଧାରେ ଟଙ୍କା ଉଠାଇପାରିବେ। ଏହା ଟଙ୍କା ଉଠାଣକୁ ସହଜ କରିବା ସହ ସୁରକ୍ଷିତ ମଧ୍ୟ କରିବ, କାରଣ ଗ୍ରାହକମାନଙ୍କୁ ପିନ୍ କିମ୍ବା ପ୍ରତ୍ୟକ୍ଷ ଡେବିଟ୍ କାର୍ଡ ଦରକାର ପଡ଼ିବନି। ଗ୍ରାହକମାନେ ବ୍ୟବହାରକାରୀ ମିତବ୍ୟୟୀ ଓ ସୁରକ୍ଷିତ ଡିଜିଟାଲ୍ ମାଧ୍ୟମ ଜରିଆରେ ତୁରନ୍ତ ଟଙ୍କା ଉଠାଣର ସୁବିଧା ଉପଭୋଗ କରିପାରିବେ। ଏ ସମ୍ପର୍କରେ ଏସବିଆଇର ଅଧ୍ୟକ୍ଷ ଦୀନେଶ ଖାରା କହିଛନ୍ତି, ଭାରତୀୟମାନଙ୍କୁ ଆର୍ଥିକ ସ୍ବାଧୀନତା ଓ ସୁବିଧା ମାଧ୍ୟମରେ ସଶକ୍ତ କରିବା ପାଇଁ ଉନ୍ନତ ଡିଜିଟାଲ୍ ବ୍ୟାଙ୍କିଙ୍ଗ ସମାଧାନ ପ୍ରଦାନ କରିବାକୁ ଏସ୍ବିଆଇ ପ୍ରତିବଦ୍ଧ ରହିଛି।
