ହାରାରେ,୪।୭ : ଆଇସିସି ବିଶ୍ୱକପ ୨୦୨୩ ରେ ସ୍ଥାନ ପାଇବା ପାଇଁ ଖେଳାଯାଇଥିବା ଯୋଗ୍ୟତା ପର୍ଯ୍ୟାୟରେ ଜିମ୍ବାୱେର ଆଶା ଏକ ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଛି। ସ୍କଟଲାଣ୍ଡ ବିପକ୍ଷରେ ପରାଜୟ ସହିତ ଭାରତରେ ଅନୁଷ୍ଠିତ ହେବାକୁ ଥିବା ବିଶ୍ୱକପରେ ସ୍ଥାନ ପାଇବା ପାଇଁ ଦଳର ସମ୍ଭାବନା ଦୁର୍ବଳ ଦେଖାଯାଉଛି। ମଙ୍ଗଳବାର ସ୍କଟଲାଣ୍ଡ ବିପକ୍ଷରେ ଖେଳାଯାଇଥିବା ମ୍ୟାଚରେ ୨୩୫ ରନର ଟାର୍ଗେଟର ପିଛା କରି ଦଳ୨୦୩ ରନ କରି ଅଲ ଆଉଟ ହୋଇଛି।
ଜିମ୍ବାୱେ ସ୍କଟଲାଣ୍ଡ ବିପକ୍ଷ କର ବା ମର ମ୍ୟାଚରେ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ସାଂଘାତିକ ବୋଲିଂ କରୁଥିବାବେଳେ ଶିନ ୱିଲିୟମ୍ସ ୧୦ ଓଭରରେ ୪୧ ରନରେ ତିନୋଟି ୱିକେଟ ନେଇଥିବାବେଳେ ତେନ୍ଦାଇ ଚାଟାରା ଦୁଇଟି ୱିକେଟ ନେଇଥିଲେ। ମାଇକେଲ ଲିସ୍କ ସ୍କଟଲାଣ୍ଡ ପାଇଁ ଶେଷରେ ଆସି ୪୮ ରନର ଚମତ୍କାର ଇନିଂସ ଖେଳିଥିବାବେଳେ ୱିକେଟ କିପର ମାଥ୍ୟୁ କ୍ରସ ୩୮ ରନ ସଂଗ୍ରହ କରିଥିଲେ। ଦଳ ୮ ୱିକେଟ ହରାଇ ୨୩୪ ରନରେ ପହଞ୍ଚିବାରେ ସଫଳ ହୋଇଥିଲା। ଫଳରେ ଜିମ୍ବଓ୍ବେ ପାଇଁ ବିଜୟ ଲକ୍ଷ୍ୟ ୨୩୫ ରନ ରହିଥିଲା।
ସୁପର ସିକ୍ସରେ କ୍ରମାଗତ ଦୁଇଟି ପରାଜୟ ଯୋଗୁ ଜିମ୍ବାୱେ ଦଳ ବିଶ୍ୱକପରେ ପହଞ୍ଚିବା କଷ୍ଟକର ହୋଇପଡିଛି। ଶ୍ରୀଲଙ୍କା ଏବଂ ସ୍କଟଲାଣ୍ଡ ବିପକ୍ଷରେ ହାରିବାର ଅର୍ଥ ହେଉଛି ସେମାନେ ଆଉ ୬ ପଏଣ୍ଟରୁ ଆଗକୁ ଯାଇ ପାରିବେ ନାହିଁ। ଯଦି ସ୍କଟଲାଣ୍ଡ ଦଳ ନେଦରଲାଣ୍ଡ ବିପକ୍ଷରେ ଏକ ବିଜୟ ପଞ୍ଜିକରଣ କରେ, ତେବେ ଏହା ସିଧାସଳଖ ଟିକେଟ ପାଇବ, ଯଦି ନେଦରଲାଣ୍ଡ ଜିତିବ ତେବେ ନେଟ ରନ ହାରରେ ଜିମ୍ବାୱେଠାରୁ ମଧ୍ୟ ଆଗରେ ରହିବ।
