ବେଙ୍ଗାଲୁରୁ,୧୫।୪ : ଜନତା ଦଳ (ସେକୁଲାର) ମୁଖ୍ୟ ତଥା ପୂର୍ବତନ ପ୍ରଧାନମନ୍ତ୍ରୀ ଏଚଡି ଦେବ ଗୌଡା କହିଛନ୍ତି, ସେ ୨୦୨୪ ଲୋକସଭା ନିର୍ବାଚନରେ ବାମପନ୍ଥୀ ଦଳ ସହ ଛିଡା ହେବେ। ବାମ ଦଳଙ୍କୁ ସମର୍ଥନ କରୁଥିବା ଲୋକଙ୍କୁ ଜେଡିଏସ ମଧ୍ୟ ସମର୍ଥନ କରିବ। ବେଙ୍ଗାଲୁରୁରେ ଖବରଦାତାଙ୍କ ସହିତ କଥାବାର୍ତ୍ତା ବେଳେ ଏଚଡି ଦେବ ଗୌଡା ଏହା କହିଛନ୍ତି। ବାମପନ୍ଥୀ ଦଳକୁ ସମର୍ଥନ କରି ସେ ସେମାନଙ୍କୁ ଏହି ଉପାୟରେ ଅନୁକମ୍ପା ଦେଖାଉଛନ୍ତି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।
୧୯୯୬ ମସିହାରେ, ଯେତେବେଳେ ହଠାତ ଦେବ ଗୌଡା ଦେଶର ଏକାଦଶ ପ୍ରଧାନମନ୍ତ୍ରୀ ହୋଇଥିଲେ, ସେତେବେଳେ ସେ ମଧ୍ୟ ଏହା ବିଷୟରେ ଚିନ୍ତା କରି ନ ଥିଲେ। ସେ କହିଛନ୍ତି, ଯେତେବେଳେ ଅଟଳ ବିହାରୀ ବାଜପେୟୀଙ୍କ ସରକାରଙ୍କର ପତନ ହେଲା, ବାମପନ୍ଥୀ ନେତା ଜ୍ୟୋତି ବସୁ ପ୍ରଧାନମନ୍ତ୍ରୀ ହେବାକୁ ଯାଉଥିଲେ କିନ୍ତୁ ଆଶ୍ଚର୍ଯ୍ୟର କଥା ସେ ପ୍ରଧାନମନ୍ତ୍ରୀ ପଦ ପାଇଲେ। ଜ୍ୟୋତି ବସୁ ହିଁ ଦେବ ଗୌଡାଙ୍କ ନାମ ପ୍ରସ୍ତାବ ଦେଇଥିଲେ।
ତେଣୁ ଦେବ ଗୌଡା ୨୦୨୪ରେ ବାମପନ୍ଥୀ ଦଳଙ୍କ ସହ ଠିଆ ହେବା କଥା କହୁଛନ୍ତି। ଏଭଳି କରି ହୁଏତ ସେ ତାଙ୍କ ପଦକ୍ଷେପ ଦ୍ୱାରା ବାମପନ୍ଥୀ ଦଳର ଅନୁଗ୍ରହ ଫେରସ୍ତ କରିବାକୁ ଚାହୁଁଥିବା ଚର୍ଚ୍ଚା ହେଉଛି।
ବର୍ତ୍ତମାନ ୨୦୨୪ ଲୋକସଭା ନିର୍ବାଚନ ପାଇଁ ପ୍ରାୟ ଏକ ବର୍ଷ ବାକି ଅଛି। ଏଭଳି ପରିସ୍ଥିତିରେ ବିରୋଧୀ ଦଳ ଭାଜପା ବିରୋଧରେ ଏକ ମେଣ୍ଟ ଗଠନ କରିବାରେ ସକ୍ରିୟ ହୋଇଛନ୍ତି। ନିକଟରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏବଂ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ନୂଆଦିଲ୍ଲୀରେ ରାହୁଲ ଗାନ୍ଧୀ ଏବଂ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେଙ୍କୁ ଭେଟିଛନ୍ତି। ଏହା ବ୍ୟତୀତ ନୀତୀଶ କୁମାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କୁ ମଧ୍ୟ ଭେଟିଥିଲେ। ଏହି ବୈଠକ ପରେ ବିରୋଧୀ ଦଳର ଆଲୋଚନା ପୁଣି ଜୋରଦାର ହୋଇଛି। ଆଦାନୀ-ହିଣ୍ଡନବର୍ଗ ମାମଲାରେ ବିରୋଧୀଦଳଙ୍କ ଦ୍ୱାରା ଜେପିସି ଗଠନ ଦାବି କରାଯାଉଛି ଏବଂ ଏହି ଦାବିରେ ବିରୋଧୀ ଦଳ ମଧ୍ୟ ଏକଜୁଟ ହୋଇଛନ୍ତି।
