ନୂଆଦିଲ୍ଲୀ,୫।୧: ଭେନେଜୁଏଲାର କ୍ଷମତାଚ୍ୟୁତ ଶାସକ ନିକୋଲାସ ମାଦୁରୋ ସୋମବାର ପ୍ରଥମ କରି ଆମେରିକାର ଏକ କୋର୍ଟରେ ହାଜର ହୋଇଛନ୍ତି। ନାର୍କୋ-ଟେରରିଜିମ୍ (ମାଦକ ଦ୍ରବ୍ୟ କାରବାର ଓ ଆତଙ୍କବାଦ) ଅଭିଯୋଗରେ ଗିରଫ ହୋଇଥିବା ମାଦୁରୋ କୋର୍ଟରେ ନିଜକୁ ନିର୍ଦ୍ଦୋଷ ବୋଲି ଦାବି କରିବା ସହ ତାଙ୍କୁ “ଅପହରଣ” କରାଯାଇଥିବା ଅଭିଯୋଗ କରିଛନ୍ତି।
ମ୍ୟାନହାଟନ୍ କୋର୍ଟରେ ବିଚାରପତିଙ୍କ ସମ୍ମୁଖରେ ମାଦୁରୋ କହିଛନ୍ତି, “ମୁଁ ନିର୍ଦ୍ଦୋଷ। ମୁଁ ଜଣେ ଭଦ୍ର ବ୍ୟକ୍ତି ଏବଂ ମୋ ଦେଶର ରାଷ୍ଟ୍ରପତି।” ସେ ତାଙ୍କ ବିରୋଧରେ ଲାଗିଥିବା ସମସ୍ତ ଡ୍ରଗ୍ସ ଚୋରା ଚାଲାଣ ଅଭିଯୋଗକୁ ପ୍ରତ୍ୟାଖ୍ୟାନ କରିଛନ୍ତି।
ନୀଳ ରଙ୍ଗର ଜେଲ ପୋଷାକ ପିନ୍ଧି ମାଦୁରୋ ଓ ତାଙ୍କ ପତ୍ନୀ ସିଲିଆ ଫ୍ଲୋରେସ୍ କୋର୍ଟରେ ପହଞ୍ଚିଥିଲେ। ବ୍ରୁକଲିନ୍ ଜେଲରୁ ହେଲିକପ୍ଟର ଏବଂ ପରେ ସଶସ୍ତ୍ର ଗାଡ଼ି କନଭେୟ ମାଧ୍ୟମରେ ତାଙ୍କୁ ମ୍ୟାନହାଟନ୍ କୋର୍ଟକୁ ଅଣାଯାଇଥିଲା।
ଟ୍ରମ୍ପ ପ୍ରଶାସନ ଦ୍ୱାରା କାବୁ କରାଯାଇଥିବା ମାଦୁରୋଙ୍କ ଓକିଲମାନେ ଏହି ଗିରଫଦାରୀର ବୈଧତାକୁ ଚ୍ୟାଲେଞ୍ଜ କରିବାକୁ ଯୋଜନା କରୁଛନ୍ତି। ସେମାନଙ୍କ ଯୁକ୍ତି ହେଉଛି ଯେ ଜଣେ ରାଷ୍ଟ୍ରମୁଖ୍ୟ ଭାବରେ ମାଦୁରୋଙ୍କୁ ଆଇନଗତ ସୁରକ୍ଷା ମିଳିବା କଥା। ମାତ୍ର ଆମେରିକା ସରକାର ତାଙ୍କୁ ଭେନେଜୁଏଲାର ବୈଧ ଶାସକ ଭାବେ ସ୍ୱୀକୃତି ଦେଉନାହାନ୍ତି।
୧୯୯୦ ମସିହାରେ ପାନାମାର ଶାସକ ମାନୁଏଲ ନୋରିଏଗାଙ୍କୁ ମଧ୍ୟ ସମାନ ଭାବେ ଗିରଫ କରାଯାଇଥିଲା, ଯିଏକି ଆଇନଗତ ସୁରକ୍ଷା ପାଇବାରେ ବିଫଳ ହୋଇଥିଲେ। ଏହି ମାମଲାର ଶୁଣାଣି ଆଗକୁ ଏକ ବଡ଼ ଆଇନଗତ ଲଢ଼େଇରେ ପରିଣତ ହେବାର ସମ୍ଭାବନା ରହିଛି।
