ନୂଆଦିଲ୍ଲୀ,୨୯।୫(ପି.ଟି.):କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ (ସିବିଏସ୍ଇ)ପରୀକ୍ଷା ବିବାଦକୁ ନେଇ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ମଧ୍ୟରେ କଥା କଟାକଟି ହୋଇଛି। ଏହି ପ୍ରସଙ୍ଗକୁ ରାହୁଲ ରାଜନୀତିକରଣ କରୁଥିବା ଓ ହତାଶ ହୋଇପଡ଼ିଥିବା ନେଇ ଧର୍ମେନ୍ଦ୍ର ଅଭିଯୋଗ କରିଛନ୍ତି। ଅନ୍ୟପକ୍ଷରେ କଂଗ୍ରେସ ନେତା ରାହୁଲ ଏହାର ପାଲଟା ଜବାବ ଦେବାକୁ ଯାଇ କହିଛନ୍ତି ଯେ, ତାଙ୍କୁ ଆକ୍ରମଣ କଲେ କେନ୍ଦ୍ର ମନ୍ତ୍ରୀ ନିଜ ଅପରାଧରୁ ମୁକ୍ତ ହୋଇପାରିବେ ନାହିଁ।
ସିବିଏସ୍ଇ ପରୀକ୍ଷା ବ୍ୟବସ୍ଥାରେ ଅନିୟମିତତା ହୋଇଥିବା ଅଭିଯୋଗ କରିବା ସହ ଏହି ଦୁର୍ନୀତି ପଛର ସତ୍ୟାସତ୍ୟ ସାମ୍ନାକୁ ଆଣିବା ପାଇଁ ଏକ ସ୍ବାଧୀନ ନ୍ୟାୟିକ ତଦନ୍ତ ଏବଂ ସ୍ବତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ଗଠନ କରିବାକୁ ରାହୁଲ ଦାବି କରିବା ପରେ ଧର୍ମେନ୍ଦ୍ର ତାଙ୍କୁ ସମାଲୋଚନା କରିଛନ୍ତି। ରାହୁଲ ଆହୁରି ଅଭିଯୋଗ କରିଛନ୍ତି ଯେ, ତେଲଙ୍ଗାନାରେ ଏକ ସନ୍ଦେହଜନକ ଅତୀତ ଥିବା ସଂସ୍ଥାକୁ ସିବିଏସ୍ଇ ଦ୍ୱାରା ଉତ୍ତରଖାତାଗୁଡ଼ିକର ଡିଜିଟାଲ ମୂଲ୍ୟାଙ୍କନ ପାଇଁ ଚୁକ୍ତି କରାଯାଇଥିଲା।
ରାହୁଲଙ୍କୁ ଲକ୍ଷ୍ୟକରି କରି ଧର୍ମେନ୍ଦ୍ର କହିଛନ୍ତି, କ୍ରମାଗତ ନିର୍ବାଚନୀ ପରାଜୟ ଯୋଗୁ ଲୋକ ସଭାର ବିରୋଧୀ ଦଳ ନେତା ହତାଶ ହୋଇପଡ଼ିଛନ୍ତି। ସେଥିପାଇଁ ସଂସ୍କାର ଓ ବୈଷୟିକ ପ୍ରଗତିକୁ ବିରୋଧ କରୁଥିବା ଧର୍ମେନ୍ଦ୍ର ଅଭିଯୋଗ କରିଛନ୍ତି। ସେ ପୂର୍ବରୁ ଏସ୍ଆଇଆର୍ ଓ ଇଭିଏମକୁ ବିରୋଧ କରୁଥିଲେ। ସେ ଡିଜିଟାଲ ଇଣ୍ଡିଆକୁ ମଧ୍ୟ ବିରୋଧ କରୁଛନ୍ତି। ସିବିଏସ୍ଇର ପଦକ୍ଷେପ ଭାରତ ସରକାରଙ୍କ କ୍ରୟ ନୀତି ଅନୁଯାୟୀ ହୋଇଛି ବୋଲି ମନ୍ତ୍ରୀ ଗୁରୁତ୍ୱ ଦେବା ସହ ଆଶ୍ୱାସନା ଦେଇ କହିଛନ୍ତି ଯେ, ଯଦି କୌଣସି ଅନିୟମିତତା ଜଣାପଡ଼େ, ତେବେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି ପ୍ରସଙ୍ଗରେ ଯେକୌଣସି ଅସଙ୍ଗତି ପାଇଁ ସେ ସରକାରଙ୍କ ତରଫରୁ ଦାୟିତ୍ୱ ଗ୍ରହଣ କରୁଛନ୍ତି ଏବଂ ସମସ୍ତଙ୍କୁ ଅନୁରୋଧ କରୁଛନ୍ତି ଯେ, ଏହାକୁ ନେଇ ରାଜନୀତି ନ କରନ୍ତୁ ବୋଲି ଧର୍ମେନ୍ଦ୍ର କହିଛନ୍ତି।
ଏହାର ପାଲଟା ଜବାବ ଦେଇ ରାହୁଲ କହିଛନ୍ତି, ‘ଧର୍ମେନ୍ଦ୍ର ବାବୁ ଆପଣ ଯେତେ ମୋତେ ସମାଲୋଚନା କରନ୍ତୁ, କିନ୍ତୁ ଏହା ଆପଣଙ୍କୁ ଅପରାଧରୁ ମୁକ୍ତ କରିବ ନାହିଁ। ଏହା ମୋତେ ୧୮.୫ ଲକ୍ଷ ପିଲାଙ୍କ ପାଇଁ ଜବାବ ମାଗିବାରୁ ଅଟକାଇ ପାରିବ ନାହିଁ। ‘X’ ରେ ଏକ ପୋଷ୍ଟରେ ରାହୁଲ ପଚାରିଛନ୍ତି ଯେ, ସିବିଏସ୍ଇ ଓଏସ୍ଏମ୍ (ଅନ୍ ସ୍କ୍ରିନ୍ ମାର୍କିଂ) ଚୁକ୍ତି କାହିଁକି ‘କୋଏମ୍ପଟ୍’କୁ ଦିଆଗଲା, ଯେଉଁ କମ୍ପାନୀ ନିଜ ପୁରୁଣା ନାମ ’ଗ୍ଲୋବରେନା’ ଅଧୀନରେ ଆଗରୁ ହିଁ ବିବାଦ ଘେରରେ ରହିଛି। ଏହା କାହା ନିର୍ଦ୍ଦେଶରେ କରାଯାଇଥିଲା। କାହିଁକି କୌଣସି ପୃଷ୍ଠଭୂମି ଯାଞ୍ଚ କରାଯାଇ ନ ଥିଲା। କୋଏମ୍ପଟ୍ ପରିଚାଳନା ଓ ମୋଦି ସରକାରଙ୍କ ମଧ୍ୟରେ କ’ଣ ସମ୍ପର୍କ ଅଛି ବୋଲି ରାହୁଲ ପଚାରିଛନ୍ତି। ଅନ୍ୟପକ୍ଷରେ ଧର୍ମେନ୍ଦ୍ର କହିଛନ୍ତି, ସିବିଏସ୍ଇ ଦ୍ୱାଦଶ ଶ୍ରେଣୀ ପରୀକ୍ଷା ମୂଲ୍ୟାଙ୍କନ ପ୍ରକ୍ରିୟାକୁ ନେଇ କେତେକ ସମସ୍ୟା ସାମ୍ନାକୁ ଆସିଛି ଏବଂ ଏବେ ଏକ ପୁନଃ-ମୂଲ୍ୟାଙ୍କନ ପ୍ରକ୍ରିୟା ଆରମ୍ଭ ହେବ। ପ୍ରାୟ ୧୭ ଲକ୍ଷ ବିଦ୍ୟାର୍ଥୀ ପରୀକ୍ଷା ଦେଇଥିଲେ ଓ ପ୍ରତ୍ୟେକଙ୍କ ଉତ୍ତରଖାତାକୁ ସୁରକ୍ଷିତ ଭାବେ ରଖାଯାଇଛି। ସେ କହିଛନ୍ତି, ମୋଟ ୯୮ ଲକ୍ଷ ଉତ୍ତରଖାତା ରହିଛି, ଯେଉଁଥିରେ ପ୍ରତ୍ୟେକ ଖାତାରେ ପ୍ରାୟ ୪୦ଟି ପୃଷ୍ଠା ରହିଛି। ଏହାର ଅର୍ଥ ହେଉଛି ସିବିଏସ୍ଇ ଦ୍ୱାରା ପ୍ରଥମ ଥର ପାଇଁ ଓଏସ୍ଏମ୍ ପ୍ରକ୍ରିୟା ମାଧ୍ୟମରେ ପ୍ରାୟ ୪୦ କୋଟି ସ୍କାନ୍ ହୋଇଥିବା ପୃଷ୍ଠାର ମୂଲ୍ୟାଙ୍କନ କରାଯାଇଥିଲା। ଓଏସ୍ଏମ୍କୁ ଏକ ଛାତ୍ରକୈନ୍ଦ୍ରିକ ବ୍ୟବସ୍ଥା ଭାବରେ ବର୍ଣ୍ଣନା କରି ସେ କହିଛନ୍ତି ଯେ, ମୂଲ୍ୟାଙ୍କନରେ ଅଧିକ ସ୍ବଚ୍ଛତା ପାଇଁ ଏଭଳି ବ୍ୟବସ୍ଥା ଆପଣାଯାଇଛି। ଫଳରେ ଛାତ୍ରୀଛାତ୍ର ସ୍ବଚ୍ଛତାର ସହ ସେମାନଙ୍କ ମାର୍କ ବିଷୟରେ ସୂଚନା ପାଇପାରିବେ ଏବଂ ସ୍କାନ୍ କପି ମାଧ୍ୟମରେ ସେମାନେ ସିଧାସଳଖ ସେମାନଙ୍କର ଉତ୍ତରଖାତା ଦେଖିପାରିବେ। ତେବେ ସିବିଏସ୍ଇ ପ୍ରଥମ ଥର ପାଇଁ ଏହି ବ୍ୟବସ୍ଥା କାର୍ଯ୍ୟକାରୀ କରିଛି ଏବଂ କେତେକ ତ୍ରୁଟି ନଜରକୁ ଆସିଥିବା ମନ୍ତ୍ରୀ ସ୍ବୀକାର କରିଛନ୍ତି।
