ନୂଆଦିଲ୍ଲୀ,୨୭।୩: Hurun Global Rich List 2025 ପ୍ରକାଶିତ ହୋଇଛି। ଭାରତର ସବୁଠାରୁ ଧନୀ ବ୍ୟବସାୟୀ ମୁକେଶ ଅମ୍ବାନୀ ଏହି ତାଲିକାର ଶ୍ରେଷ୍ଠ ୧୦ରୁ ବାଦ ପଡ଼ିଛନ୍ତି। ଗତ ଗୋଟିଏ ବର୍ଷ ମଧ୍ୟରେ ତାଙ୍କର ସମ୍ପତ୍ତି ୧ ଲକ୍ଷ କୋଟି ଟଙ୍କା ହ୍ରାସ ପାଇଛି।
ଗତ ବର୍ଷ ତୁଳନାରେ ଋଣ ବୃଦ୍ଧି ଯୋଗୁ ମୁକେଶ ଅମ୍ବାନୀଙ୍କ ସମ୍ପତ୍ତି ୧ ଲକ୍ଷ କୋଟି ଟଙ୍କା ହ୍ରାସ ପାଇଛି। ଏହି କାରଣରୁ ସେ ବିଶ୍ୱର ଶ୍ରେଷ୍ଠ ୧୦ ଜଣ ଧନୀ ବ୍ୟକ୍ତିଙ୍କ ତାଲିକାରୁ ବାହାର ହୋଇଯାଇଛନ୍ତି। ଏହି ସୂଚନା ହୁରୁନ ଗ୍ଲୋବାଲ ରିଚ ଲିଷ୍ଟ ୨୦୨୫ରେ ଦିଆଯାଇଛି। ଏହି ତାଲିକା ଅନୁସାରେ, ଟେସଲାର ସିଇଓ ଏଲନ ମସ୍କ ବିଶ୍ୱର ସବୁଠାରୁ ଧନୀ ବ୍ୟକ୍ତି ରହିଛନ୍ତି। ତାଙ୍କର ସମ୍ପତ୍ତି ଆଶ୍ଚର୍ଯ୍ୟଜନକ ଭାବରେ ୮୨% କିମ୍ବା ୧୮୯ ବିଲିୟନ ଡଲାର ବୃଦ୍ଧି ପାଇ ୪୨୦ ବିଲିୟନ ଡଲାରରେ ପହଞ୍ଚିଛି। ତାଲିକାରେ ଆମାଜନର ପ୍ରତିଷ୍ଠାତା ଜେଫ ବେଜୋସ ଦ୍ୱିତୀୟ ସ୍ଥାନରେ ଏବଂ ମେଟାର ପ୍ରତିଷ୍ଠାତା ମାର୍କ ଜୁକରବର୍ଗ ତୃତୀୟ ସ୍ଥାନରେ ଅଛନ୍ତି। ମୁକେଶ ଅମ୍ବାନୀ ବିଶ୍ୱର ସବୁଠାରୁ ଧନୀ ବ୍ୟକ୍ତିଙ୍କ ତାଲିକାରେ ୧୮ତମ ସ୍ଥାନରେ ଅଛନ୍ତି ଏବଂ ତାଙ୍କର ସମ୍ପତ୍ତି ୯୧.୮ ବିଲିୟନ ଡଲାର। ଗୌତମ ଆଦାନୀ ୫୩.୫ ବିଲିୟନ ଡଲାରର ସମ୍ପତ୍ତି ସହିତ ତାଲିକାରେ ୨୭ ନମ୍ବରରେ ଅଛନ୍ତି।
ଅନ୍ୟପକ୍ଷରେ, HCLର ରୋଶନି ନାଦର, ଯାହାଙ୍କ ପରିବାରର ମୋଟ ସମ୍ପତ୍ତି ୩.୫ ଲକ୍ଷ କୋଟି ଟଙ୍କା, ସେ ବିଶ୍ୱର ପଞ୍ଚମ ସବୁଠାରୁ ଧନୀ ମହିଳା ହୋଇଛନ୍ତି। ସେ ପ୍ରଥମ ଭାରତୀୟ ମହିଳା ଯିଏ ବିଶ୍ୱର ଶ୍ରେଷ୍ଠ ୧୦ ଜଣ ଧନୀ ମହିଳାଙ୍କ ମଧ୍ୟରେ ସ୍ଥାନ ପାଇଛନ୍ତି। ତାଙ୍କ ପିତା ଶିବ ନାଦର ସମ୍ପ୍ରତି HCLର ୪୭% ଅଂଶଧନ ତାଙ୍କୁ ହସ୍ତାନ୍ତର କରିଥିଲେ।
ତାଲିକା ଅନୁସାରେ, ଯଦିଓ ଅମ୍ବାନୀ ବିଶ୍ୱର ୧୦ ଜଣ ଧନୀ ବ୍ୟକ୍ତିଙ୍କ ତାଲିକାରେ ସାମିଲ ହେବାରୁ ବଞ୍ଚିତ ହୋଇଥିଲେ, ତଥାପି ସେ ଏସିଆର ସବୁଠାରୁ ଧନୀ ବ୍ୟକ୍ତି।
ହୁରୁନ ଅନୁଯାୟୀ ବିଶ୍ୱର ୧୦ ଜଣ ଧନୀ ବ୍ୟକ୍ତିଙ୍କ ତାଲିକା
୧-ଏଲୋନ ମସ୍କ-ଟେସଲା-୪୨୦ ବିଲିୟନ ଡଲାର
୨-ଜେଫ ବେଜୋସ- ଆମାଜନ-୨୬୬ ବିଲିୟନ ଡଲାର
୩-ମାର୍କ ଜୁକରବର୍ଗ-ମେଟା-୨୪୨ ବିଲିୟନ ଡଲାର
୪-ଲାରି ଏଲିସନ- ଓରାକେଲ- ୨୦୩ ବିଲିୟନ ଡଲାର
୫-ୱାରେନ ବଫେଟ-ବର୍କଶାୟାର ହାଥାୱେ- ୧୬୭ ବିଲିୟନ ଡଲାର
୬-ଲାରି ପେଜ୍-ଆଲ୍ଫାବେଟ୍- ୧୬୪ ବିଲିୟନ ଡଲାର
୭-ବର୍ଣ୍ଣାର୍ଡ ଆର୍ନଲ୍ଟ- LVMH-୧୫୭ ବିଲିୟନ ଡଲାର
୮-ଷ୍ଟିଭ ବଲ୍ମର୍-ମାଇକ୍ରୋସଫ୍ଟ-୧୫୬ ବିଲିୟନ ଡଲାର
୯-ସର୍ଗେ ବ୍ରିନ-ଆଲ୍ଫାବେଟ୍-୧୪୮ ବିଲିୟନ ଡଲାର
୧୦ ବିଲ ଗେଟ୍ସ-ମାଇକ୍ରୋସଫ୍ଟ-୧୪୩ ବିଲିୟନ ଡଲାର
