ଗୋପାଳପୁର,୨୦ା୧୧(ନବୀନ ରାଜ ଆଚାରୀ): ଗଞ୍ଜାମ ଜିଲା ଗୋଳନ୍ଥରା ଥାନା ଅନ୍ତର୍ଗତ କୁସୁମି ଅଞ୍ଚଳରେ କାର୍ଯ୍ୟରତ ବିଦ୍ୟୁତ ବିଭାଗ ସୁପରଭାଇଜରଙ୍କୁ କାତିରେ ଆକ୍ରମଣ ମାମଲାରେ ସମ୍ପୃକ୍ତ ଯୁବକଙ୍କୁ ବୁଧବାର ପୋଲିସ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଜଣଙ୍କ ଜଣେ ଅଭ୍ୟାସ ଗତ ଶିକାରୀ ସିଙ୍ଗିବାଡିର ବୁଡୁ ଦାସ ବୋଲି ପୋଲିସ ପ୍ରେସ୍ ରିଲଜରେ ସୂଚନା ଦେଇଛି। ଅଭିଯୋଗ ଅନୁଯାୟୀ, ଏହି ଥାନା ଅଧିନସ୍ଥ ୧୮ ତାରିଖ ରାତିରେ ମହୁଡ଼ା ଫିଡରରେ ବାରମ୍ବାର ଟ୍ରିପ୍ ହେବାରୁ ବିଦ୍ୟୁତ୍ ବିଭାଗ ସୁପରଭାଇଜର ପ୍ରଦ୍ୟୁମ୍ନ କୁମାର ଜେନା ଓ ଅନ୍ୟ ୩ ଜଣ କର୍ମଚାରୀ ପାଟ୍ରୋଲିଂ କରୁଥିବା ସମୟରେ ଝାଡ଼ବାଙ୍କଠାରେ ବାର୍ହା ଶିକାର ପାଇଁ ୧୧ କେଭି ବିଦ୍ୟୁତ୍ ଲାଇନରୁ ତାର ଟାଣି ବିଛାଇ ଥିବା ଦେଖିବାକୁ ପାଇଥିଲେ। ଏହି ତାର କିଏ ବିଛାଇଛି ଜାଣିବା ପାଇଁ ଜେନାଙ୍କ ସମେତ ଅନ୍ୟ କର୍ମଚାରୀମାନେ ସେଠାରେ ଛପି ରହିଥିଲେ। ରାତି ପ୍ରାୟ ସାଢ଼େ ୨ଟା ବେଳେ ବୁଡୁ ସେଠାରେ ପହଞ୍ଚିଥିଲେ। ଏନେଇ ଜେନା ବୁଡ଼ୁଙ୍କୁ ପଚାରିବା ସମୟରେ ବୁଡୁ ଉତ୍ତ୍ୟକ୍ତ ସୋଇ ଗାଳିଗୁଲଜ କରିବା ସହ ପାଖରେ ରଖିଥିବା ଏକ ଧାରୁଆ କଟୁରିରେ ବିଦ୍ୟୁତ୍ କର୍ମଚାରୀମାନଙ୍କୁ ଆକ୍ରମଣ କରିବା ଆରମ୍ଭ କରି ଦେଇଥିଲା। ଏଥିରେ ଜେନାଙ୍କ ବାମହାତକୁ ଚୋଟ ବାଜିବା ସହ ସେ ଆହତ ହୋଇଥିଲେ। ଘଟଣା ପରେ ବୁଡୁ ସେଠାରୁ ଚମ୍ପଟ ମାରିବାରେ ସକ୍ଷମ ହୋଇଥିଲେ। ଘଟଣା ପରେ ସେଠାରେ ଉପସ୍ଥିତ ଥିବା ଅନ୍ୟ କର୍ମଚାରୀମାନେ ଆହତ ଜେନାଙ୍କୁ ବ୍ରହ୍ମପୁର ବଡ଼ ମେଡିକାଲ ସ୍ଥାନାନ୍ତର କରିଥିଲେ। ଘଟଣା ନେଇ ଜେନାଙ୍କ ପକ୍ଷରୁ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରାଯାଇଥିଲା। ଅଭିଯୋଗକୁ ଆଧାର କରି ପୋଲିସ ବୁଧବାର ବୁଡୁଙ୍କୁ ସିଙ୍ଗିବାଡ଼ିରୁ ଗ୍ରାମରୁ କାବୁ କରିବା ସହ ଆକ୍ରମଣରେ ବ୍ୟବହୃତ କଟୁରିକୁ ଜବତ କରାଯାଇଥିଛି। ଅପରାହ୍ନରେ ବୁଡ଼ୁଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଥିବା ନେଇ ବିବେକାନନ୍ଦ ସ୍ବାଇଁ କହିଛନ୍ତି।
