ମାଲକାନଗିର,୨।୭(ଦୁର୍ଯ୍ୟୋଧନ ପାତ୍ର)ମାଲକାନଗିରି ପୋଲିସ ଓ ବିଏସ୍ଏଫ୍ ବାହିନୀ ଦ୍ୱାରା ଚିତ୍ରକୋଣ୍ଡା ବ୍ଲକ ଜଡାମ୍ବ ଥାନା ଆନ୍ଧ୍ର-ଓଡ଼ିଶା ସୀମାନ୍ତ ଅଞ୍ଚଳରୁ ବିପୁଳ ପରିମାଣର ମାଓବାଦୀ ସାମଗ୍ରୀ ଗତ ୨୯ ତାରିଖରେ ଜବତ କରାଯାଇଥିଲା। ଏ ସମ୍ପର୍କରେ ମାଲକାନଗିରି ଏସ୍ପି ନୀତୀଶ୍ ଓ୍ବାଧଓ୍ବାନି ଶନିବାର ଦେଇଥିବା ସୂଚନା ଅନୁସାରେ ଅପରେଶନ ଖୋଜ୍ ଯୋଜନାରେ ଜିଲା ପୋଲିସ ଓ ବିଏସ୍ଏଫ୍ ମିଳିତ ଭାବେ ଜଡାମ୍ବ ଥାନା ଅଞ୍ଚଳରେ କୋମ୍ବିଂ ସମୟରେ ଜଡ଼ାମ୍ବ ଥାନା ନିକଟ ଡାବୁଗୁଡ଼ା ଓ ଅରିଙ୍ଗିପଡ଼ା ଗ୍ରାମ ଜଙ୍ଗଲର ଗୋଟିଏ ସ୍ଥାନରେ ବିପୁଳ ପରିମାଣର ମାଓବାଦୀ ସାମଗ୍ରୀ ଥିବା ଜାଣି ଜବତ କରିଛନ୍ତି। ଜବତ ସାମଗ୍ରୀ ମଧ୍ୟରେ ଦୁଇଟି କଣ୍ଟ୍ରି ମେଡ୍ ଗନ୍, ୧୨ଟି ବୋର୍ ଇମ୍ୟୁନେଶନ, ଗୋଟିଏ ଏସ୍ଏଲ୍ଆର୍ ଇମ୍ୟୁନେଶନ, ତିନୋଟି ଆଇଡି, ୫୫ଜିଲୋଟିନ୍ ଷ୍ଟିକ୍, ବିଦ୍ୟୁତ୍ ତାର, ମୋବାଇଲ ଚାର୍ଜର, ମହିଳାଙ୍କ ବ୍ୟବହୃତ ହେୟାର ପିନ୍, ରବର ବ୍ୟାଣ୍ଡ, ପାନିଆ, ପେନ୍ ଓ ପେନ୍ସିଲ ଇତ୍ୟାଦି ସହ ୬୨ଟି ସାମଗ୍ରୀ ଜବତ କରିଛନ୍ତି। ସାମଗ୍ରୀଗୁଡ଼ିକ ଆନ୍ଧ୍ର-ଓଡ଼ିଶା ବୋର୍ଡର ଜୋନାଲ କମିଟି ତରଫରୁ ଜନସାଧାରଣ ଓ ପୋଲିସକୁ ଟାର୍ଗେଟକରି ରଖାଯାଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି ବୋଲି ଓ୍ବାଧଓ୍ବାନି ଏକ ପ୍ରେସ୍ ବିଜ୍ଞପ୍ତିରେ ସୂଚନା ଦେଇଛନ୍ତି।
ସେ ଆହୁରି ମଧ୍ୟ ସୂଚନା ଦେଇଛନ୍ତି, ପୂର୍ବରୁ ଅପରେଶନ ଘର ଓ୍ବାପ୍ସି ଯୋଜନାରେ ବିଗତ ଦିନରେ ବହୁ ମାଓବାଦୀ ଆତ୍ମସମର୍ପଣ କରିଛନ୍ତି। ଜୁନ୍ ୨, ୨୦୨୨ରେ ୪୭ଜଣ ମିଲିସିଆ ଯନ୍ତ୍ରୀଠାରେ ଆତ୍ମସମର୍ପଣ କରିଥିବା ବେଳେ ଜୁନ୍ ୧୧, ୨୦୨୨ରେ ୧୮୦ ଓ ଅଗଷ୍ଟ ୨୨, ୨୦୨୨ରେ ଜାନବାଇଠାରେ ୫୫୦ଜଣ ଆତ୍ମସମର୍ପଣ କରିଥିଲେ। ସେହିପରି ସେପ୍ଟେମ୍ବର ୧୭, ୨୦୨୨ରେ ଅଣ୍ଡ୍ରାହାଲଠାରେ ୩୦୦ ମିଲିସିଆଙ୍କ ସହ ମୋଟ ୭୦୦ ମାଓବାଦୀ ସମର୍ଥକ ଆତ୍ମସମର୍ପଣ କରିଥିଲେ। ସେହିପରି ନଭେମ୍ବର ୫, ୨୦୨୨ରେ ୪୧୦ ମିଲିସିଆଙ୍କ ସହ ମୋଟ ୬୫୦ ମାଓବାଦୀ ସମର୍ଥକ, ଡିସେମ୍ବର ୨୦, ୨୦୨୨ରେ ୪୬୭ ମିଲିସିଆଙ୍କ ସହ ମୋଟ ୯୦୭ ମାଓବାଦୀ ସମର୍ଥକ ଆତ୍ମସମର୍ପଣ କରିଥିଲେ। ସେହିପରି ଜାନୁୟାରୀ ୨୦୨୨ଠାରୁ ଜାନୁୟାରୀ ୨୦୨୩ ମଧ୍ୟରେ ମୋଟ ୨୦ ମାଓବାଦୀ କ୍ୟାମ୍ପ ଠାବକରି ବିପୁଳ ପରିମାଣର ସାମଗ୍ରୀ ଯଥା ଆଇଡି, ବନ୍ଧୁକ, ତାର, ଟିଫିନ୍ ବୋମା, ଜିଲୋଟିନ୍ ଷ୍ଟିକ୍, ଡିଟୋନେଟର ଓ ଅଫୁଟା ଗୁଳି ଇତ୍ୟାଦି ଜବତ କରିଥିବା ଓ୍ବାଧଓ୍ବାନି ସୂଚନା ଦେଇଛନ୍ତି।
