ନୂଆଦିଲ୍ଲୀ,୮।୯: ସଞ୍ଚୟ ଖାତାରେ (Savings Account) ନଗଦ ଟଙ୍କା ଜମା କରିବା ଏକ ସାଧାରଣ ପ୍ରକ୍ରିୟା, କିନ୍ତୁ ଆପଣ ଜାଣନ୍ତି କି ଏକ ନିର୍ଦ୍ଦିଷ୍ଟ ସୀମାରୁ ଅଧିକ ନଗଦ ଜମା କଲେ ବ୍ୟାଙ୍କ ଏହାର ସୂଚନା ସିଧାସଳଖ ଆୟକର ବିଭାଗକୁ (Income Tax Department) ଦେଇଥାନ୍ତି?
ସରକାର ଏବଂ ଆୟକର ବିଭାଗର ମୁଖ୍ୟ ଉଦ୍ଦେଶ୍ୟ ହେଉଛି ବଡ଼ ଧରଣର ନଗଦ କାରବାର ଉପରେ ନଜର ରଖିବା ସହ ଅଘୋଷିତ ଆୟ (Unaccounted Money), ଟିକସ ଫାଙ୍କି ଏବଂ ମନି ଲଣ୍ଡ୍ରିଂ ଭଳି କାର୍ଯ୍ୟକଳାପ ଉପରେ ରୋକ ଲଗାଇବା। ଯଦି ଆପଣ ମଧ୍ୟ ଆପଣଙ୍କ ଖାତାରେ ବାରମ୍ୱାର ମୋଟା ଅଙ୍କର ନଗଦ ଟଙ୍କା ଜମା କରୁଛନ୍ତି, ତେବେ ବ୍ୟାଙ୍କ ଏବଂ ଟିକସ ନିୟମ ବିଷୟରେ ସଠିକ ସୂଚନା ରହିବା ଅତ୍ୟନ୍ତ ଜରୁରୀ।
ପ୍ରଚଳିତ ଆୟକର ନିୟମ ଅନୁଯାୟୀ, ଯଦି କୌଣସି ବ୍ୟକ୍ତି ଗୋଟିଏ ଆର୍ଥିକ ବର୍ଷ ମଧ୍ୟରେ ତାଙ୍କର ଗୋଟିଏ କିମ୍ୱା ଏକାଧିକ ସଞ୍ଚୟ ଖାତାରେ ମୋଟ ୧୦ ଲକ୍ଷ ଟଙ୍କା ବା ତା’ଠାରୁ ଅଧିକ ନଗଦ ଜମା କରନ୍ତି, ତେବେ ବ୍ୟାଙ୍କଗୁଡ଼ିକ ପାଇଁ ଏହାର ସୂଚନା ଆୟକର ବିଭାଗକୁ ଦେବା ବାଧ୍ୟତାମୂଳକ। ଏହା ମଧ୍ୟ ମନେ ରଖନ୍ତୁ ଯେ ଏହି ସୀମା କୌଣସି ଗୋଟିଏ ର୍ନିଦ୍ଦିଷ୍ଟ କାରବାର ଉପରେ ନୁହେଁ, ବରଂ ପୂରା ବର୍ଷ ସାରା କରାଯାଇଥିବା ସମସ୍ତ ନଗଦ ଜମାର ସମୁଦାୟ ରାଶି ଉପରେ ଲାଗୁ ହୋଇଥାଏ। ତେବେ ୧୦ ଲକ୍ଷରୁ ଅଧିକ ନଗଦ ଜମା କରିବା ମାନେ ଏହା ନୁହେଁ ଯେ ଆପଣଙ୍କୁ ତୁରନ୍ତ ଟ୍ୟାକ୍ସ ନୋଟିସ ଆସିଯିବ। ଯଦି ଆପଣଙ୍କ ପାଖରେ ଜମା କରାଯାଇଥିବା ଟଙ୍କାର ସଠିକ ହିସାବ ଏବଂ ବୈଧ ଉତ୍ସ (Valid Source) ରହିଛି, ତେବେ ବ୍ୟସ୍ତ ହେବାର କୌଣସି ଆବଶ୍ୟକତା ନାହିଁ।
ବ୍ୟାଙ୍କ ଖାତାରେ ଟଙ୍କା ଜମା କରିବା ଉପରେ ସିଧାସଳଖ କୌଣସି ଟିକସ ଲାଗେ ନାହିଁ। ତଥାପି, ଯଦି କୌଣସି ନଗଦ ଜମା ୧୦ ଲକ୍ଷ ଟଙ୍କାର ର୍ନିଦ୍ଧାରିତ ସୀମା ଛୁଇଁଯାଏ, ତେବେ ଆପଣଙ୍କୁ ସେହି ରାଶିର ଉତ୍ସର ପ୍ରମାଣ ଦେବାକୁ ପଡ଼ିପାରେ। ଯଦି ସେହି ଟଙ୍କା ଆପଣଙ୍କ ଦରମା, ବ୍ୟବସାୟ, ଭଡ଼ା ବାବଦ ଆୟ କିମ୍ୱା କୃଷିଜାତ ଆୟରୁ ଆସିଛି ଏବଂ ଆପଣ ତାହାକୁ ଆପଣଙ୍କ ଇନକମ ଟ୍ୟାକ୍ସ ରିଟର୍ଣ୍ଣରେ (ITR) ଦର୍ଶାଇଛନ୍ତି, ତେବେ କୌଣସି ସମସ୍ୟା ହେବ ନାହିଁ। ବଡ଼ ଧରଣର ନଗଦ କାରବାର ସମୟରେ ଆୟର ପ୍ରମାଣପତ୍ର ଯେପରିକି ସାଲାରୀ ସ୍ଲିପ, ବ୍ୟବସାୟର ବିକ୍ରୟ ରେକର୍ଡ, ଭଡ଼ା ଚୁକ୍ତିପତ୍ର (Rent Agreement) କିମ୍ୱା ଜମି ବିକ୍ରିର କାଗଜପତ୍ର ସବୁବେଳେ ସାଇତି ରଖନ୍ତୁ, ଯାହାଫଳରେ ବିଭାଗ ପକ୍ଷରୁ ପଚରାଉଚରା କରାଗଲେ ଆପଣ ସହଜରେ ଉତ୍ତର ଦେଇପାରିବେ।
ଯଦି ଆପଣ କୌଣସି ବ୍ୟାଙ୍କରେ ଗୋଟିଏ ଦିନରେ ୫୦,୦୦୦ ଟଙ୍କାରୁ ଅଧିକ ନଗଦ ଜମା କରୁଛନ୍ତି, ତେବେ ଆପଣଙ୍କୁ ଆପଣଙ୍କର ପ୍ୟାନ (PAN) କାର୍ଡ ନମ୍ୱର ଦେବା ବାଧ୍ୟତାମୂଳକ। ଯଦି ଆପଣଙ୍କ ପାଖରେ ପ୍ୟାନ ନମ୍ୱର ନାହିଁ, ତେବେ ଆପଣଙ୍କୁ ଫର୍ମ ୬୦ ପୂରଣ କରି ଜମା କରିବାକୁ ହେବ। ଏହି ନିୟମର ମୁଖ୍ୟ ଉଦ୍ଦେଶ୍ୟ ହେଉଛି ନଗଦ କାରବାରର ରେକର୍ଡ ରଖିବା।
ଆୟକର ଅଧିନିୟମର ଧାରା ୨୬୯ST ଆଉ ଏକ ଅତ୍ୟନ୍ତ କଠୋର ନିୟମ। ଏହି ନିୟମ ଅନୁଯାୟୀ ଆପଣ ଗୋଟିଏ ଦିନରେ କୌଣସି ଜଣେ ବ୍ୟକ୍ତିଙ୍କଠାରୁ ଦୁଇ ଲକ୍ଷ ବା ତା’ଠାରୁ ଅଧିକ ନଗଦ ଟଙ୍କା ଗ୍ରହଣ କରିପାରିବେ ନାହିଁ। ଯଦି କୌଣସି ବ୍ୟକ୍ତି ଏହି ନିୟମର ଉଲ୍ଲଂଘନ କରନ୍ତି, ତେବେ ତାଙ୍କ ଉପରେ ଗ୍ରହଣ କରାଯାଇଥିବା ନଗଦ ରାଶି ସହିତ ସମାନ (୧୦୦ ପ୍ରତିଶତ) ଜୋରିମାନା ଲାଗୁ କରାଯାଇପାରେ।
