ବଅଁରପାଳ, ୫ ।୨(ଡି.ଏନ୍.ଏ.) ପାଖେଇ ଆସୁଛି ପଞ୍ଚାୟତ ନିର୍ବାଚନ ମତଦାନ ତାରିଖ। ପ୍ରଥମ ପର୍ଯ୍ୟାୟ ଭୋଟଗ୍ରହଣକୁ ଆଉ ଦିନ କେଇଟା ବାକି ଥିବାବେଳେ ସରଗରମ ହୋଇଉଠିଛି ଗ୍ରାମାଞ୍ଚଳ ରାଜନୀତି। ସରପଞ୍ଚ, ସମିତି ସଭ୍ୟ ଓ ଓ୍ବାର୍ଡସଭ୍ୟ ପ୍ରାର୍ଥୀମାନେ ସମର୍ଥକଙ୍କ ସହ ଘର ଘର ବୁଲି ଭୋଟ ଭିକ୍ଷା କରୁଛନ୍ତି। ଜିଲା ପରିଷଦ ପ୍ରାର୍ଥୀମାନେ ପ୍ରଚାର ମାଧ୍ୟମରେ ଲୋକଙ୍କ ନିକଟରେ ପହଞ୍ଚିବାକୁ ଅଧିକ ଗୁରୁତ୍ୱ ଦେଉଛନ୍ତି। ଅନୁଗୋଳ ଜିଲା ବଅଁରପାଳ ବ୍ଲକରେ ଥିବା ୪ଟି ଜିଲା ପରିଷଦ ଜୋନ୍ ହାତେଇବାକୁ ୩ ପ୍ରମୁଖ ଦଳ ବିଜେଡି, ଭାଜପା ଓ କଂଗ୍ରେସ ପକ୍ଷରୁ ଅଙ୍କକଷା ଆରମ୍ଭ ହୋଇଛି। ପୂର୍ବାପେକ୍ଷା ଚଳିତ ନିର୍ବାଚନରେ ଭଲ ପ୍ରଦର୍ଶନ ନେଇ ଦଳୀୟ ନେତାମାନେ ଆଶାବାଦୀ ଅଛନ୍ତି। ଜିଲା ପରିଷଦ ପ୍ରାର୍ଥୀମାନଙ୍କ ସହ ବ୍ଲକର ୩୫ ପଞ୍ଚାୟତରୁ ମୋଟ୍ ୧୦୫୧ ପ୍ରାର୍ଥୀ ଆସନ୍ତା ୧୬ ତାରିଖରେ ସେମାନଙ୍କ ଭାଗ୍ୟ ପରୀକ୍ଷା କରିବେ।
ଅନୁଗୋଳ ଜିଲା ରାଜନୀତିରେ ବଅଁରପାଳ ବ୍ଲକ ସର୍ବଦା ପ୍ରମୁଖ ଭୂମିକା ଗ୍ରହଣ କରି ଆସିଛି। ଚଳିତ ପଞ୍ଚାୟତ ନିର୍ବାଚନରେ ବ୍ଲକର ୩୫ ପଞ୍ଚାୟତରୁ ଓ୍ବାର୍ଡସଭ୍ୟ ପାଇଁ ୮୨୪ ପ୍ରାର୍ଥୀ ରହିଛନ୍ତି। ସରପଞ୍ଚ ପଦବୀ ପାଇଁ ୧୨୧ ଜଣ ଲଢ଼ୁଛନ୍ତି। ସମିତିସଭ୍ୟ ପଦବୀ ଲାଗି ୯୩ଜଣ ନିର୍ବାଚନ ରଣାଙ୍ଗନରେ ଅଛନ୍ତି। ଏହାକୁ ନେଇ ପଞ୍ଚାୟତ ରାଜନୀତି ଜୋର୍ ଧରିଛି। ସେହିପରି ବ୍ଲକରେ ଥିବା ୪ ଜିଲା ପରିଷଦ ଜୋନ୍ ୨୫, ୨୬, ୨୭ ଓ ୨୮ନଂ.ରେ ୧୩ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ନିଜ ପ୍ରାର୍ଥୀମାନଙ୍କୁ ବିଜୟୀ କରିବାକୁ ୩ ପ୍ରମୁଖ ଦଳ ବିଜେଡି, ଭାଜପା, କଂଗ୍ରେସ ପକ୍ଷରୁ ଜୋରଦାର ପ୍ରୟାସ ଜାରି ରହିଛି। ୨୫ ନଂ. ଜୋନ୍ରେ ଭାଜପାରୁ ସରୋଜ ଦେବତା, ବିଜେଡିରୁ ଦିଲୀପ କୁମାର ପ୍ରଧାନ ଓ କଂଗ୍ରେସରୁ ରାଜେଶ କୁମାର ସାହୁଙ୍କୁ ଦଳ ପ୍ରାର୍ଥୀ କରିଛି। ୨୬ନଂ. ଜୋନ୍ରେ ଭାଜପାରୁ ଗୀତାଞ୍ଜଳି ବେହେରା, ବିଜେଡିରୁ ସୁଶୀଳା ନାଏକ, କଂଗ୍ରେସରୁ ପଦ୍ମିନୀ ନାଏକ, ୨୭ନଂ. ଜୋନ୍ରେ ଭାଜପାରୁ ଦାଶରଥି ନାଏକ, ବିଜେଡିରୁ ଗୋପାଳ ନାଏକ, କଂଗ୍ରେସରୁ ବିକ୍ରମ ନାଏକ ଏବଂ ୨୮ନଂ. ଜୋନ୍ରେ ଭାଜପାରୁ ଅମିତା ସିଂହ, ବିଜେଡିରୁ ମୀରା ଗଡ଼ନାୟକ ଓ କଂଗ୍ରେସରୁ ରଶ୍ମିତା ଦେହୁରୀ ପ୍ରାର୍ଥୀ ରହିଛନ୍ତି। ୨୦୧୭ ନିର୍ବାଚନରେ ବିଜେଡି ୨୬, ୨୭, ୨୮ନଂ. ଜୋନ୍ ଅକ୍ତିଆର କରିଥିବା ବେଳେ ଭାଜପା ୨୫ନଂ. ଜୋନ୍ରେ ବିଜୟୀ ହୋଇଥିଲା। ତେଣୁ ଚଳିତ ନିର୍ବାଚନରେ ବିଜେଡି ସମସ୍ତ ଜୋନ୍ ଅକ୍ତିଆର କରିବାକୁ ଉଦ୍ୟମ କରୁଛି। ଭାଜପା ମଧ୍ୟ ପୂର୍ବପରି ଗୋଟିଏ ଜୋନ୍ରେ ସନ୍ତୁଷ୍ଟ ରହିବାକୁ ଚାହଁୁନାହିଁ। କଂଗ୍ରେସ ଏଠାରେ ଖାତା ଖୋଲିବା ଲକ୍ଷ୍ୟ ରଖି ଜୋରଦାର ପ୍ରଚାର ଚଳାଇଥିବା ଦେଖିବାକୁ ମିଳୁଛି।
