ଥିରୁଭାନନ୍ତପୁରମ୍,୧୩।୧୦: ଭାରତୀୟ ହକି ତାରକା ପି ଆର୍ ଶ୍ରୀଜେଶ କେରଳ ସରକାରଙ୍କ ଉପରେ ଖେଳାଳି ଏବଂ ଆଥଲେଟମାନଙ୍କୁ ଅବହେଳା କରିଥିବା ଅଭିଯୋଗ କରିଛନ୍ତି। ସେ କହିଛନ୍ତି, ଚାଇନାରୁ ଫେରିବା ପରଠାରୁ କେହି ତାଙ୍କୁ ଭେଟିବାକୁ ଆସିନାହାଁନ୍ତି।
ହକି ଖେଳାଳିଙ୍କ ଦାବିକୁ ମୁଖ୍ୟମନ୍ତ୍ରୀ ପିନାରାଇ ବିଜୟନ ଖାରଜ କରିଛନ୍ତି ଏବଂ କହିଛନ୍ତି ବାମପନ୍ଥୀ ସରକାର ରାଜ୍ୟର ଖେଳାଳି ଏବଂ ଆଥଲେଟମାନଙ୍କୁ ସମସ୍ତ ପ୍ରକାର ସମର୍ଥନ ଏବଂ ପ୍ରୋତ୍ସାହନ ପ୍ରଦାନ କରୁଛନ୍ତି।
ଗୁରୁବାର ଖବରଦାତାଙ୍କ ସହ କଥାବାର୍ତ୍ତା କରି ଶ୍ରୀଜେଶ କହିଛନ୍ତି, ଖେଳାଳିମାନଙ୍କୁ ଏବେ ଯେଉଁ ବ୍ୟବହାର ମିଳୁଛି, ତାହାକୁ ପରବର୍ତ୍ତୀ ପିଢି ଦେଖୁଛନ୍ତି। ସେ ଯୁକ୍ତି ଦର୍ଶାଇଛନ୍ତି ଯେ, ଏପରି ଆଚରଣ ସେମାନଙ୍କୁ ନିରାଶ କରିପାରେ ଏବଂ କ୍ରୀଡ଼ା ପରିବର୍ତ୍ତେ ଚାକିରି ପାଇବା ପାଇଁ ଅଧ୍ୟୟନକୁ ବିକଳ୍ପ ବାଛିପାରନ୍ତି।
ପଶ୍ଚିମବଙ୍ଗର ରାଜ୍ୟପାଳ ସି.ଭି ଆନନ୍ଦ ବୋଷ ଗୁରୁବାର କୋଚିସ୍ଥିତ ଶ୍ରୀଜେଶଙ୍କ ବାସଭବନରେ ତାଙ୍କୁ ଭେଟି ଏସିଆନ ଗେମ୍ସରେ ପ୍ରଦର୍ଶନ ପାଇଁ ଭାରତୀୟ ହକି ଦଳକୁ ଅଭିନନ୍ଦନ ଜଣାଇବା ପରେ ଶ୍ରୀଜେଶ ରାଜ୍ୟର ରାଜନୈତିକ ଶ୍ରେଣୀର ସମାଲୋଚନା କରିଛନ୍ତି। ଶ୍ରୀଜେଶ ଜାତୀୟ ହକି ଦଳର ଏକ ଅଂଶ ଯିଏକି ଚାଇନାରେ ଅନୁଷ୍ଠିତ ଏସିଆନ ଗେମ୍ସ ୨୦୨୩ରେ ସ୍ବର୍ଣ୍ଣ ପଦକ ଜିତିଥିଲେ।
