ନୂଆଦିଲ୍ଲୀ,୬।୧: ଚାଇନାରେ ବ୍ୟାପିଥିବା ମାନବ ମେଟାପ୍ନୁମୋଭାଇରସ (HMPV) ସଂକ୍ରମଣ ଏବେ ଭାରତରେ ପହଞ୍ଚିଛି। ସୂଚନା ଦେଇ ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର) କହିଛି ଯେ କର୍ନାଟକରେ ଦୁଇଟି ଏଚଏମପିଭି ଭେଇରସ ସଂକ୍ରମିତ ହୋଇଛି।
ଏହା ବ୍ୟତୀତ ଗୁଜୁରାଟରେ ଏକ ମାମଲା ମଧ୍ୟ ସାମ୍ନାକୁ ଆସିଛି। ଶିଶୁଟିକୁ ଅହମ୍ମଦାବାଦର ଚାନ୍ଦକେଡା ଅଞ୍ଚଳର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଛି। କର୍ନାଟକ ସରକାର କହିଛନ୍ତି ଯେ ଏହି ଜୀବାଣୁକୁ ନେଇ ଆତଙ୍କିତ ହେବାର କୌଣସି ଆବଶ୍ୟକତା ନାହିଁ। ସୂଚନାଯୋଗ୍ୟ, ଯେ ଏହି ଦୁଇଟି କ୍ଷେତ୍ରରେ ଆନ୍ତର୍ଜାତୀୟ ଭ୍ରମଣର କୌଣସି ଇତିହାସ ନାହିଁ।
କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ସୋମବାର ଏହି ସୂଚନା ଦେଇଛି। ମନ୍ତ୍ରଣାଳୟ କହିଛି ଯେ ତିନି ମାସର ଝିଅଟି ‘ବ୍ରୋଙ୍କୋନ୍ୟୁମୋନିଆ’ରେ ପୀଡିତ ଥିଲା ଏବଂ ତାଙ୍କୁ ବେଙ୍ଗାଲୁରୁର ବାପଟିଷ୍ଟ ହସ୍ପିଟାଲରେ ଭର୍ତ୍ତି କରାଯାଇଥିଲା, ଯେଉଁଠାରେ ତାଙ୍କୁ ଏଚଏମପିଭି ସଂକ୍ରମିତ ହୋଇଥିବା ଜଣାପଡିଥିଲା। ସେ ପୂର୍ବରୁ ଡାକ୍ତରଖାନାରୁ ଡିସଚାର୍ଜ ହୋଇସାରିଛନ୍ତି। ବ୍ରୋଙ୍କୋପ୍ନୁମୋନିଆରେ ପୀଡିତ ଜଣେ ଆଠ ମାସର ଶିଶୁକୁ ଜାନୁୟାରୀ ୩ରେ ବାପଟିଷ୍ଟ ହସ୍ପିଟାଲରେ ଭର୍ତ୍ତି କରାଯାଇଥିଲା, ପରୀକ୍ଷଣ ପରେ ତାଙ୍କୁ HMPV ସଂକ୍ରମିତ ହୋଇଥିବା ଜଣାପଡିଛି। ବର୍ତ୍ତମାନ ଶିଶୁର ସ୍ବାସ୍ଥ୍ୟରେ ଉନ୍ନତି ଆସୁଛି ବୋଲି କୁହାଯାଉଛି। ମନ୍ତ୍ରଣାଳୟ ସୂଚାଇ ଦେଇଛି ଯେ ଉଭୟ ରୋଗୀଙ୍କ କୌଣସି ଆନ୍ତର୍ଜାତୀୟ ଭ୍ରମଣ ଇତିହାସ ନାହିଁ।
ମନ୍ତ୍ରଣାଳୟ କହିଛି ଯେ ସାରା ଦେଶରେ ହୋଇଥିବା ପ୍ରସ୍ତୁତିରୁ ଜଣାପଡିଛି ଯେ ଶ୍ୱାସକ୍ରିୟା ରୋଗର ସମ୍ଭାବ୍ୟ ବୃଦ୍ଧି ସହ ମୁକାବିଲା କରିବାକୁ ଭାରତ ପ୍ରସ୍ତୁତ ଏବଂ ଆବଶ୍ୟକ ସ୍ଥଳେ ଜନସ୍ବାସ୍ଥ୍ୟ ପଦକ୍ଷେପ ତୁରନ୍ତ କାର୍ଯ୍ୟକାରୀ କରାଯାଇପାରିବ।
