ସାହାରନ୍ପୁର(ୟୁପି),୧୭ା୨: ଏକ ଏକ୍ସୟୁଭି କାର୍ ଏବଂ ୨୫ ଲକ୍ଷ ଟଙ୍କା ଯୌତୁକ ଦାବି କରି ଶାଶୁଘର ଲୋକେ ଝିଅକୁ ଶାରୀରିକ ଓ ମାନସିକ ନିର୍ଯାତନା ଦେଉଥିଲେ। ଏପରି କି ଦାବି ପୂରଣ ନ ହେବାରୁ ସେମାନେ ଝିଅକୁ ଏଚ୍ଆଇଭି ସଂକ୍ରମିତ ଛୁଞ୍ଚିରେ ଇଞ୍ଜେକ୍ଶନ ଦେଇଦେଲେ। ଝିଅ ଏବେ ଏଚ୍ଆଇଭି ପଜିଟିଭ ସଂକ୍ରମିତ ବୋଲି ସଙ୍ଗିନ ଅଭିଯୋଗ ଆଣିଛନ୍ତି ଜଣେ ବାପା। ଏଭଳି ଏକ ଘଟଣା ଘଟିଛି ଉତ୍ତରପ୍ରଦେଶ ସାହାରନ୍ପୁର ଅଞ୍ଚଳରେ। ପୋଲିସ ଅଭିଯୋଗକୁ ପ୍ରଥମେ ଗ୍ରହଣ କରି ନ ଥିଲା। ମାତ୍ର ପରେ କୋର୍ଟଙ୍କ ନିର୍ଦ୍ଦେଶ ପରେ ମାମଲା ରୁଜୁ ସହ ଅଭିଯୁକ୍ତ ସ୍ବାମୀ, ଶାଶୁ, ଶ୍ୱଶୁର ଏବଂ ଅନ୍ୟମାନଙ୍କୁ ଧରିବାକୁ ଉଦ୍ୟମ ଚଳାଇଛି।
ମିଳିଥିବା ସୂଚନାନୁସାରେ, ସାହାରନ୍ପୁର ଅଞ୍ଚଳରେ ରହୁଥିବା ଜଣେ ବ୍ୟକ୍ତି ତାଙ୍କ ଝିଅ ରଶ୍ମି(ଛଦ୍ମନାମ)ଙ୍କ ଉତ୍ତରାଖଣ୍ଡର ହରିଦ୍ୱାରରେ ରହୁଥିବା ଅଭିଷେକ ଓରଫ ସଚିନ୍ଙ୍କ ସହିତ ୨୦୨୩ ଫେବୃଆରୀ ୧୫ରେ ବିବାହ ଦେଇଥିଲେ। ବିବାହ ସମୟରେ ଏକ କାର୍ ଏବଂ ୧୫ଲକ୍ଷ ଟଙ୍କା ଯୌତୁକ ଭାବେ ବର ପକ୍ଷଙ୍କୁ ଦିଆଯାଇଥିଲା। ଏହା ସତ୍ତ୍ୱେ ଶ୍ୱଶୁର ଘର ଲୋକେ ରଶ୍ମିଙ୍କ ଉପରେ ସନ୍ତୁଷ୍ଟ ନ ଥିଲେ। ଅଧିକ ଯୌତୁକ ଦାବି କରି ବିଭିନ୍ନ ସମୟରେ ତାଙ୍କୁ ଶାରୀରିକ ଏବଂ ମାନସିକ ଯନ୍ତ୍ରଣା ଦେଇଆସୁଥିଲେ। ଏପରି କି ବାପଘରୁ ଏକ ଏକ୍ସୟୁଭି କାର୍ ଏବଂ ୨୫ଲକ୍ଷ ଟଙ୍କା ଯୌତୁକ ଆଣିବାକୁ ରଶ୍ମିଙ୍କ ଉପରେ ଚାପ ପକାଉଥିଲେ।
ଯେତେବେଳେ ରଶିଙ୍କ ବାପା ଏତେ ଅଧିକ ଡିମାଣ୍ଡ ଦେବାକୁ ମନା କଲେ, ଶାଶୁଘର ଲୋକ ରଶ୍ମିଙ୍କୁ ଘରୁ ବାହାର କରିଦେଇଥିଲେ। ପରେ ହରିଦ୍ୱାରର ଜଶ୍ୱଓ୍ବାଲା ପଞ୍ଚାୟତର ନିଷ୍ପତ୍ତି କ୍ରମେ ରଶ୍ମିଙ୍କୁ ଶାଶୁଘର ଲୋକ ଗ୍ରହଣ କରିଥିଲେ। ହେଲେ ଏହାର କିଛି ଦିନ ପରଠାରୁ ପୁଣି ନିର୍ଯାତନା ଆରମ୍ଭ ହୋଇଥିଲା। ଏପରି କି ଝିଅକୁ ମାରିଦେବାକୁ ଷଡ଼ଯନ୍ତ୍ର କରି ଶ୍ୱଶୁରଘର ଲୋକେ ଏଚ୍ଆଇଭି ସଂକ୍ରମିତ ଛୁଞ୍ଚିରେ ଇଞ୍ଜେକ୍ଶନ ଦେଇଥିଲେ ବୋଲି ରଶି୍ମଙ୍କ ବାପା ଅଭିଯୋଗ କରିଥିଲେ। ଯେତେବେଳେ ରଶ୍ମିଙ୍କ ସ୍ବାସ୍ଥ୍ୟବସ୍ଥା ବିଗିଡ଼ିଲା, ପରିବାର ଲୋକେ ତାଙ୍କୁ ହସ୍ପିଟାଲ ନେଇଥିଲେ। ସେଠାରେ ପରୀକ୍ଷା କରିବା ପରେ ରଶ୍ମି ଏଚ୍ଆଇଭି ପଜିଟିଭ୍ ଥିବା ଜଣାପଡ଼ିଥିଲା। ଏହା ଶୁଣି ପରିବାର ଲୋକେ ଆଶ୍ଚର୍ଯ୍ୟ ହୋଇଯାଇଥିଲେ। ପରେ ଅଭିଷେକଙ୍କ ରକ୍ତ ପରୀକ୍ଷା କରାଯାଇଥିଲା, ହେଲେ ତାଙ୍କର ରିପୋର୍ଟ ନେଗେଟିଭ ଆସିଥିଲା। ଏନେଇ ରଶ୍ମିଙ୍କ ବାପା ଝିଅର ଶ୍ୱଶୁର ଘର ଲୋକଙ୍କ ନାମରେ ପ୍ରଥମେ ଥାନାର ଦ୍ୱାରସ୍ଥ ହୋଇଥିଲେ। ମାତ୍ର ପୋଲିସ ଅଭିଯୁକ୍ତଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନେଇ ନ ଥିଲା। ପରେ ସେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। କୋର୍ଟଙ୍କ ନିର୍ଦ୍ଦେଶ ପରେ କୋଟଓ୍ବାଲି ଥାନାରେ ଅଭିଷେକ ଏବଂ ତାଙ୍କ ମା’ବାପା ଏବଂ ସମ୍ପର୍କୀୟଙ୍କ ନାମରେ ଯୌତୁକ ନିର୍ଯାତନା, ହତ୍ୟା ଉଦ୍ୟମ ଆଦି ଦଫାରେ ଏକ ମାମଲା ରୁଜୁ କରାଯାଇଛି।
