ପାଟଣା,୨୬।୫(ସ୍ବ.ପ୍ର): କାଳବୈଶାଖୀ ପ୍ରଭାବରେ କେନ୍ଦୁଝର ଜିଲା ପାଟଣା ଅଞ୍ଚଳରେ ଶୁକ୍ରବାର ମଧ୍ୟାହ୍ନରେ ଘଡ଼ଘଡି ସହ ବର୍ଷା ହୋଇ ବିଭିନ୍ନ ସ୍ଥାନରେ କୁଆ ପଥର ମାଡ଼ ହୋଇଛି। ଏପରିକି ଜିଲାର ପାଟଣା ବ୍ଲକ ତୁରୁମୁଙ୍ଗା ଅଞ୍ଚଳରେ ପ୍ରବଳ ବର୍ଷା ସହ ଝଡ଼ ତୋଫାନ ଯୋଗୁ କଇଣ୍ଡା ଗ୍ରାମରେ ୧୨ରୁ ଊର୍ଦ୍ଧ୍ୱ ଘରର ଆଜବେଷ୍ଟସ ସହ ଛପର ଉଡିଯାଇଛି। ପବନର ବେଗ ଏତେ ପ୍ରଖର ଥିଲା ଯେ, ବିଭିନ୍ନ ସ୍ଥାନରେ ବଡ଼ବଡ଼ ଗଛ ସବୁ ଉପୁଡି ପଡିଛି। ଏପରିକି କେତେକ ସ୍ଥାନରେ ଗଛ ପଡି ଘରର ଛପର ସହ ଆଜବେଷ୍ଟସ ଭାଙ୍ଗି ନଷ୍ଟ ହୋଇଛି। ଏଥିରେ ଗୋରୁ ମଧ୍ୟ ଚାପି ହୋଇଥିବା ସୂଚନା ମିଳିଛି। ଟିଣ ଛପର ଉଡି ଗଛ ଡାଳରେ ଲଟକି ରହିଥିବା ଦେଖିବାକୁ ମିଳିଛି। କାଳ ବୈଶାଖୀ ଯୋଗୁ ବିଦ୍ୟୁତ୍ ଖୁଣ୍ଟ ଉପଡିବାରୁ ଅଞ୍ଚଳରେ ବିଦ୍ୟୁତ୍ ସେବା ମଧ୍ୟ ଠପ୍ ହୋଇଯାଇଛି।
ଖବର ପାଇ ତୁରୁମୁଙ୍ଗା ସରପଞ୍ଚ ସୁଲେଖା ନାଏକ ଘଟଣାସ୍ଥଳରେ ପହଞ୍ଚି କ୍ଷତିପୂରଣ ଯୋଗାଇ ଦେବାକୁ ପ୍ରଶାସନ ନିକଟରେ ଦାବି କରିଛନ୍ତି। ଗ୍ରାମର ଗୋବିନ୍ଦ ଦେହୁରୀ, ଚିତ୍ରସେନ ବେହେରା, କଂସଲା ବେହେରା, ସରସ୍ବତୀ ବେହେରା, ଭାଗବତ ବେହେରା, ଧ୍ୟାନ ବେହେରା, ରବୀନ୍ଦ୍ର ବେହେରା, କୃଷ୍ଣଚନ୍ଦ୍ର ବେହେରା, ଉଗ୍ରସେନ ବେହେରା, ମଣ୍ଟୁ ବେହେରାଙ୍କ ଘର ଛପର ଉଡି ଯାଇଥିବା ବେଳେ ଜନ୍ମେଜୟ ବେହେରାଙ୍କ ଖପର ଘର ଉପରେ ଏକ ବିରାଟ ଶିମିଳି ଗଛ ପଡିଥିବାରୁ ଦୁଇ ବଖରା ଘର ସମ୍ପୂର୍ଣ୍ଣ ନଷ୍ଟ ହୋଇଯାଇଛି l
