ଜିନ୍ଦ୍(ହରିୟାଣା): ଜାତି, ଧର୍ମ ଭୁଲି ଭାଇଚାରା ଓ ମାନବିକତାର ପରିଚୟ ଦେଇଛନ୍ତି ଏକ ହିନ୍ଦୁ ପରିବାର। ମୃତ୍ୟୁ ପରେ କବର ଦେବା ପାଇଁ ଜମି ମିଳୁ ନ ଥିବାବେଳେ ଜଣେ ହିନ୍ଦୁ ବ୍ୟକ୍ତି ନିଜ ଜମି ଯୋଗାଇଦେଇ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ହରିୟାଣାର ଜିନ୍ଦ୍ ଜିଲା ଅନ୍ତର୍ଗତ ଗୁଲ୍କାନି ଗ୍ରାମରୁ ଆସିଛି ଏପରି ଖବର। ଘଟଣା ହେଲା, ବର୍ଷା ହେଲେ ଗାଁ କବରସ୍ଥାନରେ ପାଣି ଜମି ରହୁଛି; ଯଦ୍ଦ୍ବାରା କାହାର ମୃତ୍ୟୁ ଘଟିଲେ କବର ଦେବାରେ ବହୁ ଅସୁବିଧା ହେଉଛି। ୧୦ ବର୍ଷ ହେଲା ଏପରି ସମସ୍ୟା ଲାଗିରହିଛି। ଏଠାରେ ଅନେକ ମୁସଲମାନ ପରିବାର ରହୁଥିବାବେଳେ ଅସୁବିଧା ବିଷୟରେ ସରପଞ୍ଚ ଏବଂ ଜିଲା ପ୍ରଶାସନକୁ ଅନେକ ଥର ଅବଗତ କରାଯାଇଛି। ହେଲେ ସମାଧାନ ହୋଇପାରୁନି। ନିକଟରେ ଏକ ମୁସଲମାନ ପରିବାରର ୧୩ ବର୍ଷୀୟା ଝିଅଙ୍କ ମୃତ୍ୟୁ ଘଟିଥିଲା। ଏ ସମୟରେ କବରସ୍ଥାନରେ ବର୍ଷାଜଳ ଭର୍ତ୍ତି ଯୋଗୁ ତାଙ୍କୁ କବର ଦେବା ଅସମ୍ଭବ ହୋଇପଡ଼ିଥିଲା। ପରିବାର ଲୋକେ ବହୁ ଚେଷ୍ଟାକରି ଉପାୟ ପାଉ ନ ଥିଲେ। ଏହି ସମୟରେ ଜଣେ ହିନ୍ଦୁ ପଡ଼ୋଶୀ ସହଯୋଗର ହାତ ବଢ଼ାଇଥିଲେ। ଝିଅର ଅନ୍ତିମ କାର୍ଯ୍ୟ ନିମନ୍ତେ କବରସ୍ଥାନ ନିକଟରେ ଥିବା ନିଜର ଜମି ଯୋଗାଇ ଦେଇଥିଲେ। ଏ ନେଇ ମୃତ ଝିଅଙ୍କ ବାପା ଯୋଗିନ୍ଦର କହିଛନ୍ତି, ଦୀର୍ଘ ବର୍ଷ ଧରି ଗାଁରେ ଏହି ସମସ୍ୟା ଲାଗିରହିଛି। ପ୍ରଶାସନ ଏ ଦିଗରେ ବିଫଳ ହୋଇଥିବାବେଳେ ଜଣେ ପଡ଼ୋଶୀଙ୍କ ସାହାଯ୍ୟ ଯୋଗୁ ଝିଅର ଅନ୍ତିମ କାର୍ଯ୍ୟ କରିପାରିଛି। ତେବେ ଆମେ ସ୍ଥାୟୀ ସମାଧାନ ଚାହୁଁ ବୋଲି ଯୋଗିନ୍ଦର କହିଛନ୍ତି।
