କୁଆଁରମୁଣ୍ଡା,୭।୧୧(ଡି.ଏନ୍.ଏ.): ସୁନ୍ଦରଗଡ଼ ଜିଲା ବୀରମିତ୍ରପୁରଠାରେ ୧୪୩ ନମ୍ବର ଜାତୀୟ ରାଜପଥର ବୀରମିତ୍ରପୁର ତଲସରାଠାରୁ ଓଡ଼ିଶା-ଝାଡ଼ଖଣ୍ଡ ସୀମାନ୍ତ ଫାଟକ ପର୍ଯ୍ୟନ୍ତ ରାଜପଥ ଖାଲଖମା ପୂର୍ଣ୍ଣ ହୋଇ ପଡ଼ିଛି। ବିଭାଗ ପକ୍ଷରୁ ଏହାକୁ ମରାମତି କରାଯାଉ ନ ଥିବାରୁ ବୀରମିତ୍ରପୁର ସହରବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଏ ନେଇ ବୀରମିତ୍ରପୁର ବିକାଶ ମଞ୍ଚ ପକ୍ଷରୁ ସ୍ଥାନୀୟ ପ୍ରଶାସନଠାରୁ ଆରମ୍ଭକରି ରାଜପଥ ବିଭାଗକୁ ବାରମ୍ବାର ଲିଖିତ ଅଭିଯୋଗ କରିଥିଲେ ମଧ୍ୟ ଏଥିରେ କୌଣସି ସୁଫଳ ନ ମିଳିବାରୁ ବାଧ୍ୟହୋଇ ମଞ୍ଚ ପକ୍ଷରୁ ସୋମବାର ସକାଳ ୭ଟାରୁ ରାଜପଥ ଅବରୋଧ କରାଯାଇଛି। ଫଳରେ ରାଜପଥରେ ଯାନବାହନ ଚଳାଚଳ ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଛି। କେବଳ ଜରୁରିକାଳୀନ ଗାଡ଼ିଗୁଡ଼ିକ ବ୍ୟତୀତ ଅନ୍ୟ ଗାଡ଼ିଗୁଡିକ ଯାତାୟାତ ସମ୍ପୂର୍ଣ୍ଣ ଭାବେ ଠପ୍ ହୋଇଯାଇଛି । ବୀରମିତ୍ରପୁର ବିକାଶ ମଞ୍ଚ ପକ୍ଷରୁ ସଭାପତି ଜୟନ୍ତ ଶ୍ରୀବାସ୍ତବ, ବଲ୍ଲୁ ତିୱାରୀ, ବିକ୍ରମ ପଟ୍ଟନାୟକ, ଜଗଦୀଶ ଅଗ୍ରୱାଲ, ବୀରମିତ୍ରପୁର ପୌରାଧ୍ୟକ୍ଷ ସନ୍ଦୀପ ମିଶ୍ର, ଉପାଧ୍ୟକ୍ଷା ନିବେଦିତା ବାଗେଙ୍କ ସମେତ ଅନ୍ୟ କାଉନସିଲରଙ୍କ ସହ ଜନସାଧାରଣ ରାସ୍ତାରୋକୋକୁ ସମର୍ଥନ କରିଛନ୍ତି। ବୀରମିତ୍ରପୁର ବଜାର କମିଟି ମଧ୍ୟ ଆନ୍ଦୋଳନକୁ ସମର୍ଥନକରି ଦୋକାନ, ବଜାର ବନ୍ଦ ରଖିଛି ।
