ନୂଆଦିଲ୍ଲୀ,୮।୧୦: ଦେଶର ପ୍ରମୁଖ ଦୁଇଚକିଆ ଯାନ ନିର୍ମାତା ହିରୋ ମୋଟକର୍ପର ବହୁ ପ୍ରତୀକ୍ଷିତ ଇଲେକ୍ଟ୍ରି ଭେଇକିଲ (ଇଭି) ଯାନର ବଜାର ପ୍ରବେଶ ସମ୍ପର୍କରେ ଘୋଷଣା କରାଯାଇଛି। ଏପରିକି କମ୍ପାନୀ ଶୁକ୍ରବାର ତା’ର ପ୍ରଥମ ଇଲେକ୍ଟ୍ରିକ୍ ସ୍କୁଟର ଭିଡା ଭି୧ର ଉନ୍ମୋଚନ କରିଛି। ବିଶେଷକରି କମ୍ପାନୀ ତା’ର ଇଲେକ୍ଟ୍ରିକ୍ ଗାଡ଼ି ଭିଡା ଭି୧ର ୨ଟି ଭାରିଆଣ୍ଟର ଶୁଭାରମ୍ଭ କରିଛି। ଗୋଟିଏ ଭିଡା ଭି୧ ପ୍ରୋ ଓ ଅନ୍ୟଟି ଭିଡା ଭି୧ ପ୍ଲସ୍ ବୋଲି ଜଣାପଡ଼ିଛି। କମ୍ପାନୀର ଉକ୍ତ ଦୁଇଟି ମଡେଲର ଶୁଭାରମ୍ଭ ସମ୍ପର୍କରେ ହିରୋ ମୋଟକର୍ପର ସିଇଓ ତଥା ଏମ୍ଡି ପବନ ମୁଞ୍ଜାଲ କହିଛନ୍ତି, ଏହା ଏକ ପ୍ରତିଜ୍ଞା ଓ ପ୍ରତିବଦ୍ଧତାର ଫଳ, ଯାହା ଆମେ ଚଳିତ ବର୍ଷ ମାର୍ଚ୍ଚରେ ପୂରା ଦୁନିଆ ସମ୍ମୁଖରେ ଉଲ୍ଲେଖ କରିଥିଲୁ। ଏହି ସ୍କୁଟରରେ ସ୍ପାପେବଲ୍ ବ୍ୟାଟେରି ସୁବିଧା ରହିଛି। ଅପରପକ୍ଷରେ ଭିଡା ଭି୧ ପ୍ଲସ୍ର ଦର ୧,୪୫,୦୦୦ ଟଙ୍କା ରହିଥିବା ବେଳେ ଭିଡା ଭି୧ ପ୍ରୋର ଦର ୧,୫୯,୦୦୦ ଟଙ୍କା ରହିଛି।
