ଦାରିଙ୍ଗବାଡ଼ି,୬ା୧୦(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଏବଂ ତା’ର ଆଖପାଖରେ ସୋମବାର ଅପରାହ୍ନରେ ବର୍ଷା ଛେଚିଛି। ପ୍ରାୟ ୧ ଘଣ୍ଟା ଧରି ବର୍ଷା ପ୍ରବଳ ମାତ୍ରାରେ ଲାଗିରହିବାରୁ ଚାରିଆଡ଼େ ବର୍ଷା ଜଳ ଭର୍ତ୍ତି ହୋଇଗଲା। ଫଳରେ ବନ୍ୟାର ଭ୍ରମ ସୃଷ୍ଟି କରିଛି ଦାରିଙ୍ଗବାଡ଼ି। ତେବେ ଦାରିଙ୍ଗବାଡ଼ି ବଜାର ଦେଇ ଯାଇଥିବା ଗୋପାଳପୁର-ରାଇପୁର ୫୯ନଂ ଜାତୀୟ ରାଜପଥ ଉପରେ ଆଣ୍ଠୁଏ ପାଣି ଜମା ହୋଇଯାଇଛି ରାଜପଥର ଉଭୟ ଡ୍ରେନ୍ ଉପରେ ଉଠା ଦୋକାନୀମାନେ ଦୋକାନ ପକାଇଥିବା ବେଳେ ଦୀର୍ଘଦିନ ହେଲା ଉକ୍ତ ଡ୍ରେନ ସଫେଇ କରାଯାଇନାହିଁ। ଫଳରେ ବର୍ଷାଜଳ ନିଷ୍କାସନ ହୋଇପାରି ନ ଥିବା ଓ ରାଜପଥ ଉପରେ ବର୍ଷା ଜଳ ଲହଡ଼ି ମାରୁଥିବା ଦେଖିବାକୁ ମିଳିଛି। ରାଜପଥ ଉପରେ ଗାଡ଼ିମୋଟର ଯାତାୟାତ ସମସ୍ୟା ଉପୁଜିଥିବା ବେଳେ ବାଇକ୍ ଆରୋହୀ ଏବଂ ପାଦରେ ଚାଲି ଯାତାୟାତ ବହୁତ ସମସ୍ୟା ଦେଖାଯାଇଛି।
