ହୃଦରୋଗୀଙ୍କୁ ମାଗଣାରେ ବିଶ୍ୱସ୍ତରୀୟ ଚିକିତ୍ସା ମିଳିବ
9:18 amMarch 26, 2023March 26, 2023 / 09

ଭୁବନେଶ୍ୱର, ୨୬।୩ (ବ୍ୟୁରୋ):  ହୃଦ୍‌ରୋଗୀଙ୍କୁ ରାଜ୍ୟ ସରକାର ମାଗଣାରେ ବିଶ୍ୱସ୍ତରୀୟ ଚିକିତ୍ସା ସେବା ଯୋଗାଇଦେବେ। ଏଥିପାଇଁ ଶନିବାର ପ୍ରଶାନ୍ତି ମେଡିକାଲ ସର୍ଭିସ ଆଣ୍ଡ୍‌ ରିସର୍ଚ୍ଚ ଫାଉଣ୍ଡେଶନ (ପିଏମ୍‌ଏସ୍‌ଆର୍‌ଏଫ୍‌) ସହ ଚୁକ୍ତି କରିଛନ୍ତି। ଏହି ୨ ବର୍ଷିଆ ଚୁକ୍ତିନାମା ଫଳରେ ରାଜ୍ୟର ୩ ମାସରୁ ୬୫ବର୍ଷ ପର୍ଯ୍ୟନ୍ତ ଥିବା ହୃଦ୍‌ରୋଗୀ ଉପକୃତ ହେବେ। ବର୍ଷକୁ ପ୍ରାୟ ୫୦୦ ଶିଶୁ (୩ମାସରୁ ୧୮ବର୍ଷ) ଏବଂ ୫୦୦ଜଣ ବଡ଼ ଲୋକ (୧୯ ରୁ ୬୫ବର୍ଷ)ଙ୍କୁ ପିଏମ୍‌ଏସ୍‌ଆର୍‌ଏଫ ମାଗଣାରେ ଅସ୍ତ୍ରୋପଚାର କରିବ। ପିଏମ୍‌ଏସ୍‌ଆର୍‌ଏଫ୍‌ ପକ୍ଷରୁ ଅହମ୍ମଦାବାଦସ୍ଥିତ ଶ୍ରୀ ସତ୍ୟ ସାଇ ହାର୍ଟ ହସ୍ପିଟାଲ ଏବଂ ରାଜକୋଟସ୍ଥିତ ଶ୍ରୀ ସତ୍ୟ ସାଇ ହାର୍ଟ ହସ୍ପିଟାଲରେ ଚିକିତ୍ସା ସେବା ଯୋଗାଇ ଦିଆଯିବ। ରୋଗୀଙ୍କ ପରିବହନ ଖର୍ଚ୍ଚ ରାଜ୍ୟ ସରକାର ବହନ କରିବେ। ସୂଚନାଯୋଗ୍ୟ, ଏହି ଚିକିତ୍ସା ସେବା ପାଇଁ ରାଜ୍ୟ ସରକାର ପୂର୍ବରୁ ୨୦୧୮ରୁ ୨୦୨୨ ପର୍ଯ୍ୟନ୍ତ ମଧ୍ୟ ପିଏମ୍‌ଏସ୍‌ଆର୍‌ଏଫ୍‌ ସହ ଚୁକ୍ତି କରିଥିଲେ। ଏହି ସମୟ ଭିତରେ ୯୪୦ ଶିଶୁ ଏବଂ ୨୫୬ ଜଣ ଆଡ଼ଲଟ ହୃଦ୍‌ରୋଗୀ ଉପକୃତ ହୋଇଛନ୍ତି।