ବଲାଙ୍ଗୀର, ୫।୧୨( ସୁନିଲ କୁମାର ମହାନ୍ତି): ବଲାଙ୍ଗୀର-ପାଟଣାଗଡ଼ ୫୭ନମ୍ବର ରାଜ୍ୟ ରାଜପଥ ରାସ୍ତା ାଙ୍କରପାଲି ଆର୍.ଆର୍.କଲୋନୀ ନିକଟରେ ଗୁରୁବାର ରାତିରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଜଣେ ଯୁବ ବାଇକ ଚାଳକଙ୍କ ମୃତ୍ୟୁ ହୋଇଛି। ମୃତକ ଜଣକ ଲୋଇସିଂହା ଥାନା ସାନଟିକା ଗାଁର ଅଜୟ ଜୁଏଡ଼ (୩୦)। କୁଟୁମତୋଲା ଗ୍ରାମରୁ ବାଇକ ଯୋଗେ ବଲାଙ୍ଗୀର ଆସୁଥିବା ବେଳେ ଝାଙ୍କରପାଲି ଆର୍.ଆର୍.କଲୋନୀ ନିକଟରେ ଏକ ଆମ୍ବୁଲାନ୍ସକୁ ପଛପଟୁ ଧକ୍କା ଦେଇଥିଲେ। ଧକ୍କା ଦେବା ଫଳରେ ରାସ୍ତାକଡ଼ରେ ଥିବା ଗଛ ସହ ବାଇକ ବାଡେଇ ହୋଇଥଲା। ଯୁବକ ଜଣକ ଗୁରୁତର ହୋଇଥିଲେ । ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା । ବଲାଙ୍ଗୀର ସଦର ପୋଲିସ ଘଟଣାସ୍ଥଳରେ ପହଞ୍ଚି ଅଜୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରିଥିଲା। ହସ୍ପିଟାଲରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅଜୟ ତାଙ୍କର ସମ୍ପର୍କୀୟ ଘରକୁ କୁଣିଆ ହୋଇ ଆସିଥିଲେ। ପୋଲିସ ମୃତଦେହ ଓ ଦୁର୍ଘଟଣାଗ୍ରସ୍ତ ବାଇକ ଜବତ କରି ତଦନ୍ତ କରୁଥିବା ସଦର ଥାନା ପୋଲିସ ଅଧିକାରୀ ରାଜକୁମାର ବିଶାଳ ସୂଚନା ଦେଇଛନ୍ତି । ଆଜି ତାଙ୍କର ମୃତଦେହ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ଜଣାପଡିଛି।
