ଭବାନୀପାଟଣା,୧୭।୧(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଭବାନୀପାଟଣାସ୍ଥିତ ଲାଲବାହାଦୁର ଶାସ୍ତ୍ରୀ ଷ୍ଟାଡିୟମରେ ଚାଲିଥିବା ୨୭ତମ ଜିଲାସ୍ତରୀୟ କଳାହାଣ୍ଡି ଉତ୍ସବ ଘୁମୁରା ବୁଧବାର ଦ୍ୱିତୀୟ ଦିନରେ ପହଞ୍ଚିଛି। କଳାହାଣ୍ଡି ଜିଲାପାଳ ପାୱାର ସଚିନ ପ୍ରକାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ସାଂସ୍କୃତିକ ସଭାରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ମୁଖ୍ୟଅତିଥି ଓ କଳାହାଣ୍ଡି ସାଂସଦ ମାଳବିକା ଦେବୀ, ଧର୍ମଗଡ ବିଧାୟକ ସୁଧିର ରଞ୍ଜନ ପଟ୍ଟଯୋଷୀ, ଜିଲା ପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର ସିଂଦେଓ, ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଦୟାମୟ ପାଢୀ, ସାମାଜିକ କର୍ମୀ ଆର୍ତ୍ତତ୍ରାଣ ମହାପାତ୍ର, ଅତିରିକ୍ତ ଜିଲାପାଳ ତନ୍ମୟ କୁମାର ଦରୱାନ, ମା’ ମାଣିକେଶ୍ବରୀ ବିଶ୍ୱବିଦ୍ୟାଳୟର କୁଳପତି ଡ. ନିବେଦିତା ନାଥ, ଜିଲା ଭାଜପା ସଭାପତି ଆର୍ତ୍ତତ୍ରାଣ ମହାପାତ୍ର ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ମୁଖ୍ୟ ଅତିଥି ମନ୍ତ୍ରୀ ପୂଜାରୀ ତାଙ୍କ ଭାଷଣରେ କହିଥିଲେ, ମୁ ମୋ ଜୀବନରେ ଦେଖିଥିବା ସମସ୍ତ ଲୋକ ମହୋତ୍ସବ ମଧ୍ୟରୁ କଳାହାଣ୍ଡି ଉତ୍ସବ ସର୍ବୋତ୍ତମ। ଭବାନୀପାଟଣାରେ ମୋର ପାଠପଢା ମୂଳଦୁଆ ପଡିଥିଲା। ଏଠାରେ ମୁଁ ୫ବର୍ଷ ପାଠ ପଢିଛି। ତେଣୁ ମୁଁ କଳାହାଣ୍ଡିର ଋଣୀ। ଏବେ ଋଣ ପରିଶୋଧ କରିବି। ଏଠାକାର ଲୋକମାନେ ବେଶୀ ସରଳ, ଦୁନିଆରେ ଖୋଜିଲେ ମିଳିବେ ନାହଁି। ରାଜ୍ୟର ସାହିତ୍ୟ, କଳା, ସଂସ୍କୃତି କ୍ଷେତ୍ରରେ କଳାହାଣ୍ଡି ଲୋକଙ୍କ ଅବଦାନ ଅତୁଳନୀୟ। କଳାହାଣ୍ଡିରେ ଜଳସେଚନର ଅଗ୍ରଗତି ନେଇ ଖୁବ୍ଶୀଘ୍ର ଏକ ବୈଠକ କରାଯିବ ବୋଲି ସେ କହିଥିଲେ। କାର୍ଯ୍ୟକ୍ରମକୁ ବରିଷ୍ଠ ଖବରଦାତା ସତ୍ୟ ନାରାୟଣ ମହାପାତ୍ର ପରିଚାଳନା କରିଥିଲେ। ଏହି ଅବସରରେ ବିଭିନ୍ନ କ୍ଷେତ୍ରରେ କଳାହାଣ୍ଡି ପାଇଁ ଗୌରବ ଆଣିଥିବା ବିଦ୍ୱାନଶ୍ରୀ ପଣ୍ଡା, ଶୁଭଙ୍କର ରଥ, ପୁଷ୍ପେନ୍ଦ୍ର ବିଶ୍ୱାଳ, ସ୍ମୃତି ମଞ୍ଜରୀ ଦୀପ, ଶ୍ରୁତି ନାଗ, ହାବିଲଦାର ପ୍ରକାଶ ସାଗର, ବିଭୁତି ମଳ୍ଲିକ, ଚଶମିତ୍ କୌର, ଟିକଚନ୍ଦ ଗୌଡ, ଭୌମିକ ଭରଦ୍ୱାଜ ଭୋଇ, ବିକାଶ ବାଗ, କୁମ୍ କୁମ୍ ପ୍ରିୟଦର୍ଶିନୀ ସାହୁ ପ୍ରମୁଖଙ୍କୁ ଅତିଥିଙ୍କ ଦ୍ୱାରା ସମ୍ମାନିତ କରାଯାଇଥିଲା। ଏହାପରେ ମହ୍ଲାର କଳା ନିକେତନ, ଶ୍ରୀ ଜଗନ୍ନାଥ ସଂଗୀତ ବିଦ୍ୟାଳୟ, ଶିଶୁ ଘୁମୁରା, ଓଡିଶୀ ଶୁଭକ୍ଷିତା ମିଶ୍ର, ଦୁର୍ଗାଭରସୀ ନୃତ୍ୟ ସୁନ୍ଦରଗଡ, ବଜାଶାଲ ନୃତ୍ୟାଙ୍ଗନା, ଭବନୀପାଟଣା, କ୍ଲବିଭୂତି ବେଦାନ୍ତ ଆଲୁମିନା ଲିମିଟେଡ, ହିମାଚଲୀ ପାହାଡି ନୃତ୍ୟ ହିମାଚଳ, ଓଡିଶା କଳାକେନ୍ଦ୍ର, ଜୁନାଗଡ, ନୂତନ କଳାସଂସଦ କନ୍ଧମାଳ, ମାହାରୀ, ନଟରାଜ ଜ୍ୟାକ ଏକାଡେମୀ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
ଫଟୋ-କଳାହାଣ୍ଡି ଉତ୍ସବର ଦ୍ୱିତୀୟ ସନ୍ଧ୍ୟାରେ ଅତିଥିଗଣ।
