ନୂଆଦିଲ୍ଲୀ,୨୨।୭: ପ୍ରମୁଖ ଟେକ୍ନୋଲୋଜି କମ୍ପାନୀ ଏଚ୍ସିଏଲ୍ ଚଳିତ ବର୍ଷ ୧୫ ହଜାର ନିଯୁକ୍ତି ଦେବ। ଗତ ବର୍ଷ କମ୍ପାନୀ ୯ ହଜାର ଲୋକଙ୍କୁ ନିଯୁକ୍ତି ପ୍ରଦାନ କରିଥିଲା। ଚଳିତ ବର୍ଷ ଏହା ତୁଳନାରେ ଅଧିକ ୬ ହଜାର ଲୋକଙ୍କୁ ନିଯୁକ୍ତି ଯୋଗାଣ ଲାଗି କମ୍ପାନୀ ନିଷ୍ପତ୍ତି ଗ୍ରହଣ କରିଥିବା ଜଣାପଡିଛି। କମ୍ପାନୀ ନିକଟକୁ କିଛି ପ୍ରୋଜେକ୍ଟ ଆସିବ କିମ୍ବା ବର୍ତ୍ତମାନ ରହିଥିବା ଅଧିକ କାମକୁ ସାରିବାକୁ ଏଭଳି ନିଷ୍ପତ୍ତି କମ୍ପାନୀ ହୁଏତ ଗ୍ରହଣ କରିଛି ବୋଲି ଆଭାସ ମିଳୁଛି। କମ୍ପାନୀର ଲାଭ ୩୨% ବଢ଼ିଥିବା ଜଣାପଡ଼ିଛି। ୧୭ ଜୁନ୍ରେ କମ୍ପାନୀର ତ୍ରୈମାସ ରିପୋର୍ଟ ପ୍ରକାଶ ପାଇଥିଲା। ଲାଭରେ ୩୧.୭୦% ବୃଦ୍ଧି ଘଟି ୨୯୨୫ କୋଟି ଟଙ୍କା ରହିଛି। ଗୋଟିଏ ବର୍ଷ ତଳେ ଜୁନ୍ ତ୍ରୈମାସରେ କମ୍ପାନୀ ୨୨୨୦ କୋଟି ଟଙ୍କା ଲାଭ ଅର୍ଜନ କରିଥିଲା। କମ୍ପାନୀର ଶେୟାର ବର୍ତ୍ତମାନ ୫୨ ସପ୍ତାହର ସର୍ବୋଚ୍ଚ ସ୍ତରରେ ରହିଛି। ଏଚ୍ସିଏଲ୍ ଟେକ୍ନୋଲୋଜିର ନୂଆ ଅଧ୍ୟକ୍ଷ ଭାବେ ରୋଶନୀ ନାଦାର ନିକଟରେ ଦାୟିତ୍ୱ ଭାର ସମ୍ଭାଳିଥିବା ଜଣାପଡିଛି। ସେ କମ୍ପାନୀକୁ ଏକ ନୂଆ ଦିଗନ୍ତ ଦେବେ ବୋଲି ବଜାର ବିଶେଷଜ୍ଞ ମତ ପ୍ରକାଶ କରିଛନ୍ତି। ଆଇଆଇଏମ୍ ଛାତ୍ରୀଛାତ୍ରଙ୍କୁ କମ୍ପାନୀ ବାର୍ଷିକ ୨୦-୨୩ ଲକ୍ଷ ପ୍ୟାକେଜ ଦେଉଥିବା ଜଣାପଡ଼ିଛି। ଏଭଳି ସ୍ଥିତିରେ ଦେଶର ଅନ୍ୟତମ ପ୍ରମୁଖ ଟେକ୍ନୋଲୋଜି କମ୍ପାନୀ ଟିସିଏସ୍ ୪୦ ହଜାର ନିଯୁକ୍ତି ସୁଯୋଗ ସୃଷ୍ଟି କରିବା ନେଇ ଏକ ଖବର ସାମ୍ନାକୁ ଆସିଛି। ଏ ସମ୍ପର୍କରେ କମ୍ପାନୀ ଚଳିତ ବର୍ଷ ଜାନୁୟାରୀରେ ଘୋଷଣା କରିଥିଲା।
