ନୂଆଦିଲ୍ଲୀ,୩ା୧:ଦେଶବ୍ୟାପୀ ୪୪୦ ଜିଲାର ଭୂତଳଜଳରେ ନାଇଟ୍ରେଟ୍ ମାତ୍ରା ଅଧିକ ରହିଛି। ତନ୍ମଧ୍ୟରେ ଓଡ଼ିଶାର ୧୫ ଜିଲା ରହିଛି। ଏହି ଜିଲାଗୁଡ଼ିକ ହେଲା ଅନୁଗୋଳ, ବଲାଙ୍ଗୀର, ବରଗଡ଼, କଟକ, ଢେଙ୍କାନାଳ, କେନ୍ଦୁଝର, ଖୋର୍ଦ୍ଧା, କୋରାପୁଟ, ମୟୂରଭଞ୍ଜ, ନୟାଗଡ଼, ନୂଆପଡ଼ା, ପୁରୀ, ସମ୍ବଲପୁର, ସୁବର୍ଣ୍ଣପୁର ଓ ସୁନ୍ଦରଗଡ଼। ସଂଗୃହୀତ ନମୁନାଗୁଡ଼ିକ ମଧ୍ୟରୁ ୨୦ ପ୍ରତିଶତରେ ଅନୁମତିଯୋଗ୍ୟ ନାଇଟ୍ରେଟ୍ ସାନ୍ଦ୍ରତାଠାରୁ ଅଧିକ ଉପାଦାନ ରହିଛି, ଯାହାକି ଜନସ୍ବାସ୍ଥ୍ୟ ପାଇଁ ବିପଜ୍ଜନକ। ବିଶେଷକରି ଶିଶୁ ଓ ଗର୍ଭବତୀ ମହିଳାଙ୍କ ପାଇଁ ଏହା ହାନିକାରକ ବୋଲି ସେଣ୍ଟ୍ରାଲ ଗ୍ରାଉଣ୍ଡ୍ଓ୍ବାଟର ବୋର୍ଡ (ସିଜିଡବ୍ଲ୍ୟୁବି) ପକ୍ଷରୁ ସଦ୍ୟ ପ୍ରକାଶିତ ଏକ ରିପୋର୍ଟରେ କୁହାଯାଇଛି। ଭୂତଳଜଳରେ ନାଇଟ୍ରେଟ୍ଜନିତ ପ୍ରଦୂଷଣ କେବଳ ମାନବ ସମାଜ ପାଇଁ ନୁହେଁ, ପରିବେଶ ଲାଗି ମଧ୍ୟ କ୍ଷତିକାରକ। ବିଶେଷକରି ନାଇଟ୍ରୋଜେନ୍ଯୁକ୍ତ ସାର ବ୍ୟବହାର ଓ ପ୍ରାଣୀଙ୍କ ବର୍ଜ୍ୟ ବ୍ୟବହୃତ କୃଷିପ୍ରଧାନ ଅଞ୍ଚଳରେ ନାଇଟ୍ରେଟ୍ର ମାତ୍ରା ବେଶି ରହିଲେ ବିପଦ ଆଶଙ୍କା ମଧ୍ୟ ଅଧିକ ରହିଥାଏ। ଏହି ବିଷୟ ଆନୁଆଲ ଗ୍ରାଉଣ୍ଡ୍ଓ୍ବାଟର କ୍ୱାଲିଟି ରିପୋର୍ଟ-୨୦୨୪ରେ ପ୍ରଘଟ ହୋଇଛି। ଏହି ବାର୍ଷିକ ରିପୋର୍ଟରେ ଆହୁରି କୁହାଯାଇଛି, ୯.୦୪% ନମୁନାରେ ଫ୍ଲୋରାଇଡ୍ ସ୍ତର ନିରାପତ୍ତା ସୀମାଠାରୁ ଅଧିକ ରହିଛି। ଅନୁମତିଯୋଗ୍ୟ ମାତ୍ରାଠାରୁ ଅଧିକ ଫ୍ଲୋରାଇଡ୍ ଉପାଦାନ ମିଳିଥିବା ଓଡ଼ିଶାର ୧୦ ଜିଲା ହେଲା, ଅନୁଗୋଳ, ବଲାଙ୍ଗୀର ବରଗଡ଼, ଝାରସୁଗୁଡ଼ା, ନୟାଗଡ଼, ନୂଆପଡ଼ା, ପୁରୀ, ସମ୍ବଲପୁର, ସୁବର୍ଣ୍ଣପୁର ଓ ସୁନ୍ଦରଗଡ଼। ସେହିପରି ୩.୫୫% ସାମ୍ପୁଲରେ ଆର୍ସେନିକ୍ ମାତ୍ରା ଅଧିକ ରହିଥିବା ଜଣାପଡ଼ିଛି।
୨୦୨୩ ମେ’ରେ ସାରା ଦେଶର ୧୫,୨୫୯ ସ୍ଥାନକୁ ଭୂତଳଜଳ ଅନୁଧ୍ୟାନ କେନ୍ଦ୍ର ପ୍ରତିଷ୍ଠା ପାଇଁ ଚୟନ କରାଯାଇଥିଲା। ସେଗୁଡ଼ିକ ମଧ୍ୟରୁ ୨୫% କୂଅ (ବିଆଇଏସ୍ ୧୦୫୦୦ ଅନୁସାରେ ଅଧିକାଂଶ ବିପଦପୂର୍ଣ୍ଣ) ରହିଥିବା ଉକ୍ତ ରିପୋର୍ଟରେ ଦର୍ଶାଯାଇଛି। ୪,୯୮୨ ଟ୍ରେଣ୍ଡ୍ ଷ୍ଟେଶନ୍ରେ ଭୂତଳଜଳକୁ ମୌସୁମୀ ପୂର୍ବରୁ ଓ ପରେ ଏହାର ପ୍ରଭାବ ସମ୍ପର୍କିତ ପରୀକ୍ଷା କରାଯାଇଥିଲା। ରିପୋର୍ଟରୁ ଜଣାପଡ଼ିଛି ଯେ, ଜଳର ୨୦% ନମୁନାରେ ନାଇଟ୍ରେଟ୍ ସୀମା ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ଏବଂ ବ୍ୟୁରୋ ଅଫ୍ ଇଣ୍ଡିଆନ୍ ଷ୍ଟାଣ୍ଡାଡର୍ସ (ବିଆଇଏସ୍) ଦ୍ୱାରା ପାନୀୟ ଜଳ ସକାଶେ ନିର୍ଦ୍ଧାରିତ ଲିଟର ପିଛା (ଏମ୍ଜି/ଏଲ୍) ୪୫ ମିଲିଗ୍ରାମଠାରୁ ଅଧିକ ରହିଛି।
