କରାଚୀ,୧୪।୧୧: ଅଷ୍ଟ୍ରେଲିଆ ବିପକ୍ଷ ଟି୨୦ ବିଶ୍ୱକପ୍ ସେମିଫାଇନାଲରେ ପାକିସ୍ତାନ ପେସର ହାସନ ଅଲି ମ୍ୟାଚ୍ର ଗୁରୁତ୍ୱପୂର୍ଣ୍ଣ ସମୟରେ ଛାଡ଼ିଥିଲେ ମାଥ୍ୟୁ ଓ୍ବେଡ୍ଙ୍କ କ୍ୟାଚ୍। ଏହା ତାଙ୍କ ଦଳକୁ ଖୁବ୍ ମହଙ୍ଗା ପଡ଼ିଥିଲା। ଏଥିଲାଗି ସେ କ୍ଷମାପ୍ରାର୍ଥନା କରିଛନ୍ତି।
ମ୍ୟାଚ୍ର ୧୯ତମ ଓଭରରେ ଶାହୀନ ଶାହ ଆଫ୍ରିଦୀଙ୍କ ବଲରେ ମିଡ୍ ଉଇକେଟ ଅଞ୍ଚଳରେ ଅଲି ଛାଡ଼ିଥିଲେ ଓ୍ବେଡ୍ଙ୍କ କ୍ୟାଚ୍। ସେହି ଓଭରରେ ଅଷ୍ଟ୍ରେଲିଆ ଉଇକେଟକିପର ବ୍ୟାଟର ଲଗାତାର ୩ ଛକା ଲଗାଇ ପାକିସ୍ତାନ ହାତରୁ ମ୍ୟାଚ୍ ଛଡ଼ାଇ ନେଇଥିଲେ।
ମୁଁ ଜାଣିଛି ମୋ ପ୍ରଦର୍ଶନ ପାଇଁ ସମସ୍ତେ ଦୁଃଖିତ। ଆଶା ଅନୁଯାୟୀ ମୁଁ ପ୍ରଦର୍ଶନ କରିପାରି ନାହିଁ। ଏଥିଯୋଗୁ ମୋ ଠାରୁ କେହି ଅଧିକ ଦୁଃଖିତ ନୁହେଁ। ମୋ ଉପରେ ଭରସା ରଖନ୍ତୁ। ଅନ୍ତର୍ଜାତୀୟ ସ୍ତରରେ ମୁଁ ପାକିସ୍ତାନ କ୍ରିକେଟର ସେବା କରିବାକୁ ଚାହେଁ। ମୋ କ୍ୟାରିୟରରେ ଆସିଥିବା ଏହି ଖରାପ ସମୟ ମୋତେ ଆହୁରି ଶକ୍ତିଶାଳୀ କରିବ। ମୋ ସମର୍ଥନରେ ମେସେଜ, କଲ, ଟୁଇଟ୍ କରିବା ପାଇଁ ଧନ୍ୟବାଦ୍ ବୋଲି ଅଲି ଟୁଇଟ୍ କରିଛନ୍ତି।
୨୦୧୭ ଚାମ୍ପିୟନ୍ସ ଟ୍ରଫି ଫାଇନାଲର ହିରୋ ଅଲି ସେମିଫାଇନାଲରେ କ୍ୟାଚ୍ ଛାଡ଼ିବା ପରେ ଦେଶ ପାଇଁ ଭିଲିଆନ ପାଲଟିଯାଇଥିଲା। ଏଥି ନେଇ ତାଙ୍କୁ ସୋସିଆଲ ମିଡିଆରେ ପ୍ରବଳ ଟ୍ରୋଲିଂର ସମ୍ମୁଖୀନ ହେବାକୁ ପଡ଼ିଥିଲା।
