ଚେନ୍ନାଇ,୧୪।୧୧: ଚେନ୍ନାଇର ଭେଲାମାଲ ନେକ୍ସସ ସ୍କୁଲରେ ଆୟୋଜିତ ଏକ କାର୍ଯ୍ୟକ୍ରମରେ, ଛାତ୍ରମାନେ ହରମନପ୍ରୀତଙ୍କୁ ପ୍ରଶ୍ନ ପଚାରିବାର ସୁଯୋଗ ପାଇଥିଲେ। ପିଲାମାନେ ତାଙ୍କୁ ପଚାରିଥିଲେ, ତୁମେ ବିରାଟ କୋହଲିଙ୍କୁ ଅଧିକ ପସନ୍ଦ କର ନା ମହେନ୍ଦ୍ର ସିଂହ ଧୋନୀ? ହରମନ ବିନା ଦ୍ୱିଧାରେ ଏମ୍ସ୍ ଧୋନୀଙ୍କ ନାମ ନେଇଥିଲେ। ତାଙ୍କର ଉତ୍ତର ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଭିଡିଓଟି ସୋସିଆଲ ମିଡିଆରେ ଭାଇରାଲ ହେଉଛି ଏବଂ ପ୍ରଶଂସକମାନେ ହରମନଙ୍କ ପ୍ରତିକ୍ରିୟାକୁ ପସନ୍ଦ କରୁଛନ୍ତି।
ନଭେମ୍ବର ୨ରେ, ହରମନପ୍ରୀତଙ୍କ ଅଧିନାୟକତ୍ୱରେ, ଭାରତୀୟ ମହିଳା ଦଳ ଦକ୍ଷିଣ ଆଫ୍ରିକାକୁ ୫୨ ରନରେ ପରାସ୍ତ କରି ବିଶ୍ୱକପ ଟ୍ରଫି ଜିତିଥିଲା। ଏହି ବିଜୟ କେବଳ ଏକ ଟାଇଟଲ ନୁହେଁ ବରଂ ଭାରତୀୟ ମହିଳା କ୍ରିକେଟ ପାଇଁ ଏକ ସୁବର୍ଣ୍ଣ ମୁହୂର୍ତ୍ତ ଥିଲା। ଏହି ବିଜୟ ସହିତ ହରମନପ୍ରୀତ କପିଲ ଦେବ, ଏମଏସ ଧୋନୀ ଏବଂ ରୋହିତ ଶର୍ମାଙ୍କ ପରି କିମ୍ବଦନ୍ତୀ ଅଧିନାୟକଙ୍କ ମଧ୍ୟରେ ସାମିଲ ହୋଇଥିଲେ।
କାର୍ଯ୍ୟକ୍ରମ ସମୟରେ, ସେ କେଉଁ ଖେଳାଳିଙ୍କଠାରୁ ସବୁଠାରୁ ଅଧିକ ପ୍ରେରଣା ପାଆନ୍ତି ସେ ବିଷୟରେ ଆଉ ଏକ ପ୍ରଶ୍ନ ପଚରାଯାଇଥିଲା। ହରମନ ବିନା ଦ୍ୱିଧାରେ ବୀରେନ୍ଦ୍ର ସେହ୍ବାଗଙ୍କ ନାମ ନେଇଥିଲେ। ସେହ୍ବାଗଙ୍କ ନିର୍ଭିକ ଏବଂ ଆକ୍ରମଣାତ୍ମକ ବ୍ୟାଟିଂ ତାଙ୍କୁ ସର୍ବଦା ପ୍ରେରଣା ଦିଏ।
ହରମନପ୍ରୀତ ଯୁବ ଛାତ୍ରୀମାନଙ୍କୁ ପରାମର୍ଶ ଦେଇଥିଲେ ଯେ, ଯଦି ସେମାନେ ଏକ ଲକ୍ଷ୍ୟ ହାସଲ କରିବାକୁ ଚାହାଁନ୍ତି, ତେବେ କଠିନ ପରିଶ୍ରମ ଏବଂ ସ୍ଥିର ଅଭ୍ୟାସ ସଫଳତାର ପଥ। ଏହି ବିଶ୍ୱକପ କେବଳ ତାଙ୍କର ନୁହେଁ, ବରଂ ପ୍ରତ୍ୟେକ ଝିଅଙ୍କର ଯେଉଁମାନେ ବଡ଼ ସ୍ବପ୍ନ ଦେଖନ୍ତି ଏବଂ ତାହା ହାସଲ କରିବାକୁ ସାହସ ରଖନ୍ତି।
Dharitri – Odisha’s No.1 Odia Daily
