ନୂଆଦିଲ୍ଲୀ,୧୯ା୭: ଭାରତୀୟ କ୍ରିକେଟର ହାର୍ଦ୍ଦିକ ପାଣ୍ଡ୍ୟା ଇତିମଧ୍ୟରେ ସ୍ତ୍ରୀ ନତାଶା ଷ୍ଟାନ୍କୋଭିକଙ୍କୁ ଛାଡ଼ପତ୍ର ଦେଇଛନ୍ତି। ଗୁରୁବାର ସୋସିଆଲ ମିଡିଆରେ ପୋଷ୍ଟ କରି ହାର୍ଦ୍ଦିକ ତାଙ୍କ ସ୍ତ୍ରୀଙ୍କଠାରୁ ଅଲଗା ହେବା ଘୋଷଣା କରିଛନ୍ତି। ହାର୍ଦ୍ଦିକ କହିଛନ୍ତି, ୪ ବର୍ଷ ଏକାଠି ରହିବା ପରେ ମୁଁ ଏବଂ ନତାଶା ପାରସ୍ପରିକ ସହମତିରେ ଅଲଗା ହେବାକୁ ନିଷ୍ପତ୍ତି ନେଇଛୁ। ଏହା ପରେ କୁହାଯାଉଛି ଯେ, ହାର୍ଦ୍ଦିକଙ୍କୁ ୧୭୦କୋଟି ଟଙ୍କା ମୂଲ୍ୟର ୭୦ ପ୍ରତିଶତ ସମ୍ପତ୍ତି ନତାଶାଙ୍କୁ ଦେବାକୁ ପଡ଼ିବ।
ସୂଚନାଯୋଗ୍ୟ, ହାର୍ଦ୍ଦିକ ପାଣ୍ଡ୍ୟା ଏବଂ ଅଭିନେତ୍ରୀ ତଥା ମଡେଲ ନତାଶାଙ୍କୁ ଦୀର୍ଘଦିନ ଧରି ଏକାଠି ଦେଖାଯାଇ ନ ଥିଲା। ଆଇପିଏଲ ୨୦୨୪ରେ ନତାଶା କୌଣସି ମ୍ୟାଚ୍ରେ ଷ୍ଟାଡିୟମରେ ପହଞ୍ଚି ନ ଥିଲେ। ଏହାପୂର୍ବରୁ ପ୍ରତିବର୍ଷ ନତାଶା ହାର୍ଦ୍ଦିକ ଏବଂ ତାଙ୍କ ଦଳକୁ ଖୁସି କରିବା ପାଇଁ ଷ୍ଟାଡିୟମରେ ପହଞ୍ଚୁଥିଲେ। ଏଥି ସହିତ ହାର୍ଦ୍ଦିକ ମଧ୍ୟ ଏଥର ନତାଶାଙ୍କୁ ତାଙ୍କ ଜନ୍ମଦିନରେ ଶୁଭେଚ୍ଛା ଜଣାଇ ନ ଥିଲେ। ଏଭଳି ପରିସ୍ଥିତିରେ ଉଭୟଙ୍କ ମଧ୍ୟରେ ସମ୍ପର୍କ ଭଲ ନାହିଁ ବୋଲି ପୂର୍ବରୁ ଏକପ୍ରକାର ସ୍ପଷ୍ଟ ହୋଇଥିଲା।
ବର୍ତ୍ତମାନ ଛାଡ଼ପତ୍ର ଚର୍ଚ୍ଚା ଖବର ସତ ହୋଇଛି। ହାର୍ଦ୍ଦିକଙ୍କୁ ତାଙ୍କ ସମ୍ପତ୍ତିର ୭୦ ପ୍ରତିଶତ ନତାଶାଙ୍କୁ ଦେବାକୁ ପଡ଼ିବ ଚର୍ଚ୍ଚା ହେଉଛି। ତେବେ ଏ ସମ୍ପର୍କରେ ଏପର୍ଯ୍ୟନ୍ତ କୌଣସି ସରକାରୀ ସୂଚନା ପ୍ରକାଶ କରାଯାଇ ନାହିଁ। ରିପୋର୍ଟ ମାଧ୍ୟମରେ ଛାଡ଼ପତ୍ର ଖବର ଆସିବା ପରେ ଏହି ଖବର ମଧ୍ୟ ସାମ୍ନାକୁ ଆସିଥିଲା। ଏବେ ପୁଣି ପ୍ରଶଂସକମାନେ ସୋସିଆଲ ମିଡିଆରେ ଏଭଳି କଥା ଶେୟାର କରୁଛନ୍ତି।
୨୦୧୮ରେ ହାର୍ଦ୍ଦିକ ଏକ ସାକ୍ଷାତକାରରେ କହିଥିଲେ, ସେ ତାଙ୍କର ସମସ୍ତ ସମ୍ପତ୍ତି ତାଙ୍କ ମା’ଙ୍କ ନାମରେ ରଖିଛନ୍ତି, କାରଣ ସେ ଆୟର ୫୦ ପ୍ରତିଶତ ଭବିଷ୍ୟତରେ କାହାକୁ ଦେବାକୁ ଚାହୁଁନାହାନ୍ତି। ମାତ୍ର ନିୟମ ଅନୁଯାୟୀ, ହାର୍ଦ୍ଦିକଙ୍କୁ ରକ୍ଷଣାବେକ୍ଷଣ ଭାବରେ ନତାଶାଙ୍କୁ କିଛି ଅର୍ଥ ଦେବାକୁ ପଡ଼ିବ। କିନ୍ତୁ ଏହି ଟଙ୍କାର ପରିମାଣ କେତେ ହେବ ସେନେଇ ଏପର୍ଯ୍ୟନ୍ତ କୌଣସି ସରକାରୀ ସୂଚନା ନାହିଁ।
