ଲିଟଲ୍ ମାଷ୍ଟର ସୁନୀଲ ଗାଭାସ୍କର ଆଜି ୭୧ ବର୍ଷରେ ପଦାର୍ପଣ କରିଛନ୍ତି। ୧୯୪୯ ମସିହାରେ ଜୁଲାଇ ୧୦ରେ ସେ ମୁମ୍ବାଇରେ ଜନ୍ମ ଗ୍ରହଣ କରିଥିଲେ। ଅନେକ ରେକର୍ଡର ଅଧିକାରୀ ଥିବା ଗାଭାସ୍କର ଭାରତୀୟ କ୍ରିକେଟକୁ ଉଚ୍ଚ ଶିଖରରେ ପହଞ୍ଚାଇଥିଲେ। କେବଳ କ୍ରିକେଟ ନୁହେଁ ଫିଲ୍ମରେ ଅଭିନୟ କରିଥିଲେ ଗାଭାସ୍କର। ଏକ ମରାଠୀ ଫିଲ୍ମରେ ଲିଡ ରୋଲରେ ସେ ଅଭିନୟ କରିଥିଲେ। ଫିଲ୍ମଟିର ନାଁ- ସଭଲି ପ୍ରେମାଚି। ସେହିଭଳି ୧୯୮୮ ମସିହାରେ ନସୀରୁଦ୍ଦିନ ଶାହଙ୍କ ଫିଲ୍ମ ‘ମାଲାମାଲ’ରେ ସେ ଅତିଥି କଳାକାର ଭାବେ ଅଭିନୟ କରିଥିଲେ। ଗାଭାସ୍କର ‘ୟା ଦୁନିଆମଧ୍ୟେ ଥମ୍ବାୟାଲା ଭେଲ କୋନାଲା’ ନାଁରେ ଏକ ମରାଠୀ ଗୀତ ବି ଗାଇଥିଲେ। ୧୯୭୧ ମସିହା ମାର୍ଚ୍ଚ ୬ ତାରିଖରେ ୱେଷ୍ଟଇଣ୍ଡିଜ ବିପକ୍ଷରେ ଟେଷ୍ଟ ଡେବ୍ୟୁ କରିଥିଲେ। ପ୍ରଥମ କ୍ରିକେଟର ଭାବେ ସେ ଟେଷ୍ଟରେ ୧୦ ହଜାର ରନ (୧୦,୧୨୨) ପୂରଣ କରିଥିଲେ। ସେ ୧୨୫ଟି ଟେଷ୍ଟରୁ ୫୧.୧୨ ହାରରେ ଏହି ରନ ସଂଗ୍ରହ କରିଥିଲେ। ୧୯୮୭ ମସିହା ମାର୍ଚ୍ଚ ୧୩ ତାରିଖରେ ସେ ପାକିସ୍ତାନ ବିପକ୍ଷରେ ଶେଷ ଟେଷ୍ଟ ମ୍ୟାଚ ଖେଳିଥିଲେ। ସେହିପରି ଅନ୍ତର୍ଜାତୀୟ ୧୦୮ଟି ଦିନିକିଆ ମ୍ୟାଚ ଖେଳିଥିବା ଗାଭାସ୍କର ୧୯୭୪ରେ ଇଂଲଣ୍ଡ ବିପକ୍ଷରେ ଡେବ୍ୟୁ ମ୍ୟାଚ ଖେଳିଥିଲେ। ୧୯୮୭ରେ ସେହି ଇଂଲଣ୍ଡ ବିପକ୍ଷରେ ଶେଷ ଦିନିକିଆ ମ୍ୟାଚ ଖେଳିଥିଲେ। ଅନ୍ତର୍ଜାତୀୟ ଦିନିକିଆରେ ସେ ୩,୦୯୨ ରନ ସଂଗ୍ରହ କରିଥିଲେ।
