ଫୁଲବାଣୀ ଅଫିସ,୮ା୫: କନ୍ଧମାଳ ଜିଲା ଫିରିଙ୍ଗିଆ ବ୍ଲକ ସୁମରବନ୍ଧ ପଞ୍ଚାୟତରେ ଆଜି ପର୍ଯ୍ୟନ୍ତ ଉଚ୍ଚ ବିଦ୍ୟାଳୟ ନାହିଁ। ବଣ ପାହାଡ଼ ଘେରା ଏହି ପଞ୍ଚାୟତରେ ଉଚ୍ଚ ବିଦ୍ୟାଳୟ ନ ଥିବାରୁ ଛାତ୍ରୀଛାତ୍ରମାନେ ପାଠ ଛାଡିବାକୁ ବାଧ୍ୟ ହେଉଛନ୍ତି। ଏ ଦିଗରେ ଜିଲା ପ୍ରଶାସନ ଆଦୌ ଆନ୍ତରିକାତା ଦେଖାଉନାହିଁ। ଉଚ୍ଚ ବିଦ୍ୟାଳୟ ଶିକ୍ଷାରୁ ବଞ୍ଚତ୍ତ ହେଉଥିବା ପିଲାମାନେ ବାଧ୍ୟହୋଇ ମୂଲ ଲାଗିବା ସହ ବାହାର ରାଜ୍ୟକୁ ଦାଦନ ଖଟି ଯିବାକୁ ବାଧ୍ୟ ହେଉଛନ୍ତି।
ଫିରିଙ୍ଗିଆ ବ୍ଲକର ସୁମରବନ୍ଧ ପଞ୍ଚାୟତ ପୂର୍ବରୁ ସାଡିଙ୍ଗିଆ ପଞ୍ଚାୟତରେ ଥିଲା। ବିଗତ ପଞ୍ଚାୟତ ନିର୍ବାଚନ ବେଳେ ସୁମରବନ୍ଧକୁ ପଞ୍ଚାୟତ କରାଯାଇଥିଲା। ଏହି ଅଞ୍ଚଳ ମାଓବାଦୀ ଅଧ୍ୟୁଷିତ ଭାବେ ଜଣାଶୁଣା। କିନ୍ତ୍ୁ ପ୍ରଶାସନ ଏଠାର ଛାତ୍ରୀଛାତ୍ରୀଙ୍କ ଶିକ୍ଷାର ଉନ୍ନତି ପାଇଁ କିଛି ପଦକ୍ଷେପ ନେଉ ନାହାନ୍ତି। ସମର୍ଥିତ ସୁତ୍ର ଅନୁସାରେ ଶିକ୍ଷା ବିଭାଗର ଅଧିକାରୀଙ୍କ ଗୋଡ ଏହି ଅଞ୍ଚଳରେ ପଡେ ନାହିଁ। ଯାହା ଫଳରେ ଏହି ଅଞ୍ଚଳର ପିଲାମାନେ କିପରି ଭଲ ପାଠ ପଢ଼ି ଉନ୍ନତି କରିବେ ସେଥିଲାଗି କେହି ଦୃଷ୍ଟି ଦିଅନ୍ତିି ନାହିଁ। କିଛି ଉଚ୍ଚାଭିଳାସୀ ପିଲା କୌଣସି ପ୍ରତିବନ୍ଧକକୁ ଖାତିର ନ କରି ନିଜ ପଞ୍ଚାୟତରୁ ୧୫ କିମି ଦୂର ସାଡିଙ୍ଗିଆରେ ଥିବା ଉଚ୍ଚ ବିଦ୍ୟାଳୟକୁ ଯାଇ ଅଧ୍ୟୟନ କରୁଛନ୍ତି। କିନ୍ତୁ ସବୁ ବେଳେ ବିଦ୍ୟାଳୟ ଯିବା ଏମାନଙ୍କ ପକ୍ଷେ ସମ୍ଭବ ହୁଏ ନାହିଁ।
ସୁମରବନ୍ଧ ପଞ୍ଚାୟତଠାରୁ ସାଡିଙ୍ଗିଆ ପଞ୍ଚାୟତର ଦୂରତା ୧୫ କିମିରୁ ଊର୍ଦ୍ଧ୍ୱ ହେବ। ଯାତାୟତ ପାଇଁ ସେଭଳି ଭଲ ରାସ୍ତା ନାହିଁ। ବଣ ପାହାଡ ଘେରା ତଥା ଘାଟି ଅଞ୍ଚଳ ହୋଇଥିବାରୁ ପିଲାମାନେ ଏତେଦୂର ଯାଇ ପାଠ ପଢ଼ିବା ସମ୍ଭବପର ନୁହେଁ। ଫଳରେ ବହୁ ଛାତ୍ରୀଛାତ୍ର ଅଧାରୁ ପାଠ ଛାଡି ଘରେ ରହିବାକୁ ବାଧ୍ୟ ହେଉଛନ୍ତି। ସେମାନଙ୍କ ମଧ୍ୟରୁ ଅନେକ ପିଲା ବାହାରକୁ ଦାଦାନ ଖଟି ଯିବାକୁ ବାଧ୍ୟ ହେଉଛନ୍ତି। ଶିକ୍ଷାର ଆବଶ୍ୟକତା ପାଇଁ ସୁମରବନ୍ଧରେ ଏକ ଉଚ୍ଚ ବିଦ୍ୟାଳୟର ନିହାତି ଆବାଶ୍ୟକତା ଅଛି ବୋଲି ଗ୍ରାମବାସୀ ପ୍ରକାଶ କରିଛନ୍ତି। ସୁମରବନ୍ଧ ପଞ୍ଚାୟତରେ ମୋଟ ୧୧ଟି ୱାର୍ଡ ରହିଛି। ଜନ ସଂଖ୍ୟା ୧୦୦୦ରୁ ଊର୍ଦ୍ଧ୍ୱ ହେବ। ଏହି ପଞ୍ଚାୟତରେ ୫ଟି ବିଦ୍ୟାଳୟ ଏବଂ ୬ଟି ଅଙ୍ଗନୱାଡି ରହିଛି। ହେଲେ ଗୋଟିଏ ବି ଉଚ୍ଚ ବିଦ୍ୟାଳୟ ନାହିଁ। ୨୦୧୭ ପୂର୍ବରୁ ସୁମରବନ୍ଧ ସାଡିଙ୍ଗିଆ ପଂଚାୟତରେ ଥିଲା। ୨୦୧୭ରୁ ସୁମରବନ୍ଧକୁ ନୂତନ ପଞ୍ଚାୟତ ଘୋଷଣା କରାଗଲା। ପଞ୍ଚାୟତ ସିନା ହେଲା, ହେଲେ ଶିକ୍ଷାର ଅଗ୍ରଗତିକୁ ଦୃଷ୍ଟି ଦିଆଗଲା ନାହିଁ। ତେଣୁ ସରକାର ଏବଂ ଜିଲା ପ୍ରଶାସନ ଏସବୁ ଦିଗକୁ ଦୃଷ୍ଟିରେ ରଖି ଏକ ନୂତନ ଉଚ୍ଚ ବିଦ୍ୟାଳୟ ଖୋଲିବାକୁ ଗ୍ରାମର ସୁଶୀଳା କହଁର, ସଶ୍ମିତା କହଁର, ଶାନ୍ତି ଦିଗାଲ, ଶ୍ରଦ୍ଧାଞ୍ଜଳୀ ଦିଗାଲଙ୍କ ସମେତ ଅନ୍ୟମାନେ ଦାବି କରିଛନ୍ତି।
