ଓ୍ବାଶିଂଟନ: ଆମେରିକା ରାଷ୍ଟ୍ରପତି ଟ୍ରମ୍ପ ପ୍ରଶାସନ ଦ୍ୱାରା ପ୍ରସ୍ତାବିତ ନୂଆ ଭିଜା ନିୟମ ଉପରେ ସେଠାକାର ଏକ ଡିଷ୍ଟ୍ରିକ୍ଟ କୋର୍ଟ ବୁଧବାର ରୋକ ଲଗାଇଛନ୍ତି। ପ୍ରମୁଖ ଆଇଟି କମ୍ପାନୀଗୁଡିକ ଏହି ଭିଜା ନିୟମକୁ ବିରୋଧ କରିବା ସହ ନ୍ୟାୟାଳୟଙ୍କ ହସ୍ତକ୍ଷେପ ଲୋଡିଥିଲେ। ନୂଆ ପ୍ରସ୍ତାବକୁ ଲାଗୁ କରିବାରୁ ବର୍ତ୍ତମାନ କୋର୍ଟ ରୋକ ଲଗାଇଛନ୍ତି। ଫଳରେ ଭାରତୀୟ ଆଇଟି ପ୍ରଫେଶନାଲ ଏବଂ ୟୁଏସ୍ର ପ୍ରମୁଖ ଆଇଟି କମ୍ପାନୀଗୁଡିକ ଏହା ଦ୍ୱାରା ଆଶ୍ୱସ୍ତି ଲାଭ କରିଛନ୍ତି। ଆମେରିକାରେ ଅବସ୍ଥିତ କମ୍ପାନୀଗୁଡିକ ବିଦେଶୀ କର୍ମଚାରୀଙ୍କୁ ନିଯୁକ୍ତି ପ୍ରଦାନ କ୍ଷେତ୍ରରେ ନୂଆ ଭିଜା ନିୟମ ବିଭିନ୍ନ ପ୍ରତିବନ୍ଧକ ସୃଷ୍ଟି କରୁଥିଲା। ସାଧାରଣତଃ ଏଚ୍-୧ବି ଭିଜା ଦ୍ୱାରା କମ୍ପାନୀଗୁଡିକ ବିଦେଶୀ କୁଶଳୀ କର୍ମଚାରୀଙ୍କୁ ନିଯୁକ୍ତି ଦେଇଥାନ୍ତି। ଟ୍ରମ୍ପ ଏହି ନିୟମ ଉପରେ କଟକଣା ଲଗାଇଥିଲେ।
ଆମେରିକା ପ୍ରତିବର୍ଷ ୮୫ ହଜାର ଏଚ୍-୧ବି ଭିଜା ଜାରି କରିଥାଏ। ସାଧାରଣତଃ ଏହି ଭିଜା ଅବଧି ୩ ବର୍ଷ ରହିଥିବା ବେଳେ ଏହାକୁ ନବୀକରଣ କରାଯାଇଥାଏ। ଏଚ୍୧ବି ଭିଜାର ପ୍ରାୟ ଅଧିକାଂଶ ଚାଇନା ଏବଂ ଭାରତୀୟ ମାନେ ଲାଭ କରିଥାନ୍ତି। ନର୍ଦର୍ଣ୍ଣ ଡିଷ୍ଟ୍ରିକ୍ଟ ଅଫ୍ କାଲିଫର୍ନିଆର ଡିଷ୍ଟ୍ରିକ୍ଟ ଜଜ୍ ଜେ.ହ୍ବାଇଟ ତାଙ୍କର ୨୩ ପୃଷ୍ଟା ବିଶିଷ୍ଟ ଆଦେଶରେ ଟ୍ରମ୍ପ ପ୍ରଶାସନ ଜାରି କରିଥିବା ନିୟମକୁ ରୋକ ଲଗାଇଛନ୍ତି। ସୂଚନାଯୋଗ୍ୟ, ଭିଜା ନିୟମରେ ପରିବର୍ତ୍ତନ ହେବା ଯୋଗୁ ଟେକ୍ନୋଲୋଜି କମ୍ପାନୀଗୁଡିକୁ କର୍ମଚାରୀଙ୍କୁ ନିଯୁକ୍ତିରେ ଅଧିକ ଖର୍ଚ୍ଚ କରିବାକୁ ପଡିଥାନ୍ତା। ଫଳରେ ସେମାନେ ବାଧ୍ୟ ହୋଇ ବିଦେଶୀ କର୍ମଚାରୀଙ୍କୁ ନିଯୁକ୍ତି କାଟ କରିଥାନ୍ତେ। ମାତ୍ର ଏହା ଦ୍ୱାରା ଟେକ୍ନୋଲୋଜି କମ୍ପାନୀଗୁଡିକ କ୍ଷତିଗ୍ରସ୍ତ ହେବା ଆଶଙ୍କା କରି କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ପ୍ରସ୍ତାବିତ ନିୟମ ଲାଗୁ ହୋଇଥିଲେ ଏଚ୍-୧ବି ଦ୍ୱାରା ଆମେରିକାରେ ନିଯୁକ୍ତି ଲାଭ କରିବାକୁ ଥିବା ଭାରତୀୟ ମାନେ କ୍ଷତିଗ୍ରସ୍ତ ହୋଇଥାନ୍ତେ।
୭ ସେପ୍ଟେମ୍ବରଠାରୁ ନୂଆ ନିୟମ ଲାଗୁ କରିବାକୁ କୁହାଯାଇଥିଲା। ମାତ୍ର ବର୍ତ୍ତମାନ ନ୍ୟାୟାଳୟ ଏହାକୁ ଲାଗୁ କରାଇବା ଉପରେ ରହିତାଦେଶ ଲାଗୁ କରିବାରୁ ଏହା କାର୍ଯ୍ୟକାରୀ ହେବନାହିଁ। ଅର୍ଥାତ ଆମେରିକାର ଶ୍ରମ ବିଭାଗପକ୍ଷରୁ ଲାଗୁ ହେବାକୁ ଥିବା ପ୍ରସ୍ତାବିତ ଏହି ନିୟମ ଆଉ ପ୍ରଭାବି ହୋଇ ରହିବ ନାହିଁ। ପ୍ରସ୍ତାବିତ ନିୟମ ଉପରେ ହସ୍ତକ୍ଷେପ କରିବା ଲାଗି ଫେସବୁକ, ଗୁଗଲ, ମାଇକ୍ରୋସଫ୍ଟ ଭଳି ଅନ୍ୟ ପ୍ରମୁଖ କମ୍ପାନୀ କୋର୍ଟଙ୍କ ଦ୍ୱାରସ୍ଥ ହୋଇଥିଲେ।
