ଆମେରିକାର ୨୦୨୪ ରାଷ୍ଟ୍ରପତି ନିର୍ବାଚନରେ ଡୋନାଲ୍ଡ ଟ୍ରମ୍ପଙ୍କୁ ଜିତାଇବାରେ ଅନ୍ୟତମ ପ୍ରମୁଖ ବ୍ୟକ୍ତି ଭାବେ ଟେସ୍ଲା ଓ ସ୍ପେସ୍ଏକ୍ସ ସିଇଓ ତଥା ‘ଏକ୍ସ’ (ପୂର୍ବରୁ ଟୁଇଟର ଭାବେ ପରିଚିତ)ର ମାଲିକ ଏଲନ୍ ମସ୍କଙ୍କ ଭୂମିକା ସର୍ବାଗ୍ରେ ଥିବା ସମସ୍ତେ ଜାଣନ୍ତି। ଟ୍ରମ୍ପ କିଭଳି ଜିତାପଟ ନେବେ ସେଥିପାଇଁ ମସ୍କ ତାଙ୍କ ସୋସିଆଲ ମିଡିଆକୁ ବହୁଳ ଭାବେ ବ୍ୟବହାର କରିଥିଲେ। ହେଲେ ଏବେ ମସ୍କ ଓ ଟ୍ରମ୍ପଙ୍କ ସମର୍ଥକଙ୍କ ମଧ୍ୟରେ ସେହି ‘ଏକ୍ସ’ରେ ଆଉ ଗୋଟିଏ ପ୍ରସଙ୍ଗ ଆପ୍ରବାସନ ବା ଇମିଗ୍ରେଶନକୁ ନେଇ ବିତର୍କ ସର୍ବୋଚ୍ଚରେ ପହଞ୍ଚତ୍ଛି। ଏହାର ମୂଳ ବିନ୍ଦୁରେ ଅଛନ୍ତି ନିକଟରେ ଟ୍ରମ୍ପଙ୍କ ନବନିଯୁକ୍ତ ସରକାରୀ ଦକ୍ଷତା ବିଭାଗର ସହ-ଅଧ୍ୟକ୍ଷ ବିବେକ ରାମସ୍ବାମୀ। ତାଙ୍କ ନିଯୁକ୍ତିକୁ ନେଇ ମେକ୍ ଆମେରିକା ଗ୍ରେଟ୍ ଏଗେନ୍ (ମାଗା) ଅଭିଯାନରେ ଫାଟ ସୃଷ୍ଟି ହୋଇଛି। ପ୍ରବାସୀଙ୍କୁ ଆମେରିକାରେ ଅଧିକ ଗୁରୁତ୍ୱ ଦିଆଯାଉଥିବାରୁ ଟ୍ରମ୍ପ ସମର୍ଥକମାନେ ତାହାକୁ ବିରୋଧ କରିଛନ୍ତି। ଭାରତୀୟ ପ୍ରବାସୀଙ୍କ ପୁଅ ରାମସ୍ବାମୀ କୁଶଳୀ ପ୍ରବାସୀଙ୍କ ପ୍ରତିଭା ସପକ୍ଷରେ କହି ଆସୁଥିବାରୁ ଟ୍ରମ୍ପ ସମର୍ଥକମାନେ ତାଙ୍କୁ ବିରୋଧ କରୁଛନ୍ତି। ଆମେରିକୀୟଙ୍କ ଆଶଙ୍କା ହେଉଛି ଯେ, ପ୍ରବାସୀମାନେ ସେମାନଙ୍କ ଚାକିରି ଛଡ଼ାଇ ନେଉଛନ୍ତି। ତେଣୁ ଏଚ୍-୧ବି ଭିଜା ଉପରେ କଟକଣା ରଖିବାକୁ ନୂଆ ଟ୍ରମ୍ପ ସରକାର ଉପରେ ଚାପ ରହିଛି। ଉଲ୍ଲେଖଯୋଗ୍ୟ ଯେ, ଆମେରିକୀୟ କମ୍ପାନୀଗୁଡ଼ିକ ସ୍ବତନ୍ତ୍ର କ୍ଷେତ୍ରରେ ବିଦେଶୀ ବିଶେଷଜ୍ଞମାନଙ୍କୁ ନିଯୁକ୍ତି ଦେବା ଲାଗି ଉପରୋକ୍ତ ଭିଜାଧାରୀଙ୍କୁ ଗ୍ରହଣ କରିଥାଆନ୍ତି। ବିଶେଷକରି ବୈଷୟିକ ତଥା ପ୍ରଯୁକ୍ତି କ୍ଷେତ୍ରରେ କାର୍ଯ୍ୟରତ କମ୍ପାନୀ ଦକ୍ଷ ବ୍ୟକ୍ତିଙ୍କୁ ନିଯୁକ୍ତି ଦେବାରେ ଏଚ୍-୧ବି ଭିଜାକୁ ଅନୁମତି ମିଳିଥାଏ। ଏହାର ସମର୍ଥନକାରୀଙ୍କ ଯୁକ୍ତି ହେଉଛି ଯେ, ଏହାଦ୍ୱାରା ଆମେରିକାକୁ ପ୍ରତିଭାସମ୍ପନ୍ନ ବ୍ୟକ୍ତିମାନେ ଆସିପାରିଥାଆନ୍ତି। ଏଠାରେ ମନେରଖିବାକୁ ହେବ ଯେ, ପୃଥିବୀର ପ୍ରତ୍ୟେକଟି ଦେଶରୁ ସବୁଠାରୁ ଅଧିକ ବୁଦ୍ଧିମାନ, କୁଶଳୀ ଏବଂ ଗବେଷଣାକାରୀ ଯୁବକମାନେ ଆମେରିକା ଯିବାକୁ ପସନ୍ଦ କରିଥାନ୍ତି। ଏହି ଉଚ୍ଚକୋଟୀର ଲୋକମାନେ ‘ଆମେରିକା ସ୍ବପ୍ନ’ ଦେଖିଥାନ୍ତି, ଯେଉଁଥିପାଇଁ ଅନ୍ୟ କୌଣସି ଦେଶ ଆମେରିକା ସହିତ ଭବିଷ୍ୟତରେ ମଧ୍ୟ ସମକକ୍ଷ ହୋଇପାରିବ ନାହିଁ। ଅନେକ ଲୋକ କୁହନ୍ତି ଯେ ଆସନ୍ତା କିଛି ଦଶନ୍ଧି ମଧ୍ୟରେ ଚାଇନାର ଶକ୍ତି ଯେଉଁମାତ୍ରାରେ ବୃଦ୍ଧି ପାଇବ ସେଥିରେ ଆମେରିକା ଦବିଯିବ। କିନ୍ତୁ ତାହା ସମ୍ଭବପର ଏଇଥିପାଇଁ ହେବନାହିଁ କାରଣ ବୁଦ୍ଧି ଓ ଗବେଷଣାରେ ଆମେରିକା ସବୁବେଳେ ଆଗରେ ରହିଆସିଛି ଓ ଆଗରେ ରହିବ। ଏହା ପଛରେ ଏକମାତ୍ର କାରଣ ହେଉଛି ପୃଥିବୀର ସବୁଠାରୁ ଭଲ ମସ୍ତିଷ୍କ ସବୁବେଳେ ଆମେରିକାକୁ ଆକର୍ଷିତ ହେବେ, ଚାଇନା କିମ୍ବା ରୁଷିଆ ଭଳି ଦେଶକୁ ନୁହେଁ।
ଅନ୍ୟପକ୍ଷରେ ଏଭଳି ଇମିଗ୍ରେଶନ ପଲିସି ଦ୍ୱାରା ଆମେରିକୀୟ ବ୍ୟକ୍ତିମାନେ ନିଯୁକ୍ତି ହରାଉଛନ୍ତି ବୋଲି ବିରୋଧୀ ଅଭିଯୋଗ କରୁଛନ୍ତି। ଏହି ସନ୍ଧିକ୍ଷଣରେ ଦକ୍ଷିଣ ଆଫ୍ରିକାରେ ଜନ୍ମିତ ଆମେରିକୀୟ ଉଦ୍ୟୋଗପତି ମସ୍କଙ୍କ ଯୁକ୍ତି ହେଲା କୌଣସି ଦେଶରେ ଅଭିନବତ୍ୱ ଓ ଅର୍ଥନୈତିକ ଅଭିବୃଦ୍ଧି ଆଣିବାକୁ ହେଲେ କୁଶଳୀ ପ୍ରବାସୀଙ୍କ ଆବଶ୍ୟକତା ରହିଥାଏ। ଯେଉଁମାନେ ପ୍ରତିଭାଧାରୀ ସେହିମାନଙ୍କୁ ବ୍ୟବହାର କରାଗଲା ଉନ୍ନତି ସମ୍ଭବ ହୋଇଥାଏ। ମସ୍କଙ୍କ ଯୁକ୍ତି ପଛରେ ତାଙ୍କ ନିଜସ୍ବ ଉଦାହରଣ ମଧ୍ୟ ଦଣ୍ଡାୟମାନ। ଦକ୍ଷିଣ ଆଫ୍ରିକାର ପ୍ରିଟୋରିଆରେ ଜନ୍ମିତ ମସ୍କ ଆମେରିକା ଆସି ତାଙ୍କ ପ୍ରଯୁକ୍ତି ସମ୍ବନ୍ଧୀୟ ପ୍ରଜ୍ଞାର ବଳୟ ବିସ୍ତାରିତ କରି ନ ଥିଲେ ଆମେରିକା ମଧ୍ୟ ତାଙ୍କୁ ନେଇ ଗର୍ବ କରିବାର ସୁଯୋଗ ପାଇ ନ ଥାଆନ୍ତା।
ମେଧାବୀଙ୍କ ସମ୍ପର୍କରେ ମସ୍କଙ୍କ ଉପରିଲିଖିତ ଯୁକ୍ତି ନିଶ୍ଚିତ ଭାବେ ସ୍ବାଗତଯୋଗ୍ୟ। ବିଶେଷକରି କର୍ପୋରେଟ ବା କମ୍ପାନୀଗୁଡ଼ିକରେ ସେମାନଙ୍କ ଚାହିଦା ରହିଥାଏ। ଭାରତ ଭଳି ଦେଶରେ ସରକାରୀ ଚାକିରିରେ ସଂରକ୍ଷଣ ବ୍ୟବସ୍ଥା ରହିଥିବାରୁ କମ୍ ଦକ୍ଷ ବ୍ୟକ୍ତି ପଦବୀ ମାଡ଼ି ବସିଥାଆନ୍ତି। ଫଳରେ ସମ୍ପୃକ୍ତ ବ୍ୟକ୍ତିଙ୍କ କାର୍ଯ୍ୟଦକ୍ଷତାକୁ ନେଇ ପ୍ରଶ୍ନ ଉଠୁଥିଲେ ମଧ୍ୟ କିଛି କରାଯାଇପାରି ନ ଥାଏ। ଘରୋଇ ସଂସ୍ଥାରେ ଦକ୍ଷତା ଆଗ। ଆମେରିକାରେ ଯେଉଁମାନେ ନିଜ ନାଗରିକଙ୍କ ସପକ୍ଷରେ ଯୁକ୍ତି ବାଢ଼ୁଛନ୍ତି, ସେମାନେ ଅନ୍ୟ ବିଦେଶୀ ପ୍ରତିଭାଧାରୀଙ୍କ ସହ ସମକକ୍ଷ ହେବାକୁ ଚେଷ୍ଟା କରିବା ଦରକାର। ଆଜିର ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ବିଶ୍ୱରେ ଡାରଉଇନ୍ଙ୍କ ବିବର୍ତ୍ତନବାଦ ତତ୍ତ୍ୱର ଏକ ବାକ୍ୟାଂଶ ‘ସର୍ଭାଇଭାଲ ଅଫ୍ ଦି ଫିଟେଷ୍ଟ’ ବା ଯୋଗ୍ୟତମର ଉତ୍ତରଜୀବିତ କଥା ଉଦ୍ଧାର କରାଯାଇପାରେ। ଯିଏ ସର୍ବଦା ନିଜକୁ କୌଣସି କାର୍ଯ୍ୟ ପାଇଁ ସମ୍ପୂର୍ଣ୍ଣ ଯୋଗ୍ୟ ରଖିପାରିବେ ସେ ହିଁ ତିଷ୍ଠି ରହିପାରିବେ।
ଆମେରିକାରେ ପ୍ରବାସୀ ପ୍ରସଙ୍ଗକୁ ନେଇ ଆଗକୁ କେଉଁଭଳି ସ୍ଥିତି ସୃଷ୍ଟି ହେବ ତାହା ଟ୍ରମ୍ପ ପ୍ରଶାସନର ଦ୍ୱିତୀୟ ଶାସନ କାଳରେ ଜଣାପଡ଼ିବ। ହେଲେ ଯେଉଁ ବିଷୟ ଆର୍ଗୁମେଣ୍ଟେଟିଭ୍ ଇଣ୍ଡିଆନ୍ସ ବା ଯୁକ୍ତିସକଳ ଭାରତୀୟଙ୍କୁ ଚିନ୍ତା କରିବାକୁ ସୁଯୋଗ ଦେଇଛି ତାହା ହେଲା, ନିଜ ପ୍ରିୟ ବ୍ୟକ୍ତିଙ୍କୁ ସମ୍ମାନ ଦେଉଥିବା ସମର୍ଥନକାରୀ ଅନ୍ଧ ଭକ୍ତ ପାଲଟିବା ଉଚିତ କି ନୁହେଁ। ଅର୍ଥାତ୍ ଜଣଙ୍କ ଆଦର୍ଶକୁ ଅନୁସରଣ କରାଯାଇପାରେ, କିନ୍ତୁ ତାଙ୍କଠାରେ ତ୍ରୁଟିବିଚ୍ୟୁତି ଦେଖାଦେଲେ ଦୋଷ ମଧ୍ୟ ଦର୍ଶାଯିବା କଥା। ଭାରତୀୟ ସମାଜରେ ସେଭଳି ମୂଲ୍ୟବୋଧକୁ ଗ୍ରହଣ କରାଯାଏ ନାହିଁ। ଆମେରିକାରେ ଟ୍ରମ୍ପଙ୍କୁ ମସ୍କ ସମର୍ଥନ କରୁଥିଲେ ମଧ୍ୟ ‘ପ୍ରବାସୀ’ ପ୍ରସଙ୍ଗରେ ଭିନ୍ନ ମତ ରଖିବା ସେଠାକାର ସ୍ବାଧୀନଚେତା ଚିନ୍ତାଧାରାକୁ ଦର୍ଶାଉଛି। ଯେଉଁ ଦେଶରେ ନେତାଙ୍କ ଦୋଷତ୍ରୁଟିକୁ ସମାଲୋଚନା କରିବାର ସୁଯୋଗ ଦିଆଯାଏ ନାହିଁ, ସେହି ରାଷ୍ଟ୍ର ସବୁବେଳେ ପଛୁଆ ହୋଇରହିବ। ପ୍ରଶ୍ନ ପଚାରିବା ହେଉଛି ସ୍ବାଧୀନତାର ମୂଳ। ସେହିଭଳି ସ୍ବାଧୀନତାକୁ ପ୍ରୋତ୍ସାହିତ କରିପାରିଲେ ଅର୍ଥନୈତିକ ଏବଂ ସାମାଜିକ ଉନ୍ନତି ସମ୍ଭବପର ହୋଇଥାଏ।
