ନୂଆଦିଲ୍ଲୀ,୨୭।୧: ଆରାବଲିର ଏକ ଲୋକପ୍ରିୟ ପିକ୍ନିକ୍ ସ୍ପଟ୍ରେ ଗୁରୁଗ୍ରାମର ଲିଓପାର୍ଡ ଟ୍ରେଲ୍ରୁ ଜଣେ ୨୩ ବର୍ଷୀୟ ମହିଳାଙ୍କୁ ଜଣେ ଦୁର୍ବୃତ୍ତ ଅପହରଣ କରିବା ଘଟଣା ଚାଞ୍ଚଲ୍ୟ ସୃଷ୍ଟି କରିଛି। ଅଭିଯୁକ୍ତ ଯୁବତୀଙ୍କୁ ସ୍କୋର୍ପିଓ SUVରେ ଜୋରଜବରଦସ୍ତ ବସାଇ ଜଙ୍ଗଲକୁ ନେଇଯାଇଥିଲେ। ସେପଟେ ପୋଲିସ ଗାଡ଼ିଟିକୁ ପିଛା କରିଥିଲା। କାରଟି କାଦୁଅରେ ଫସିଯିବା ପରେ ଯୁବତୀଙ୍କୁ ଉଦ୍ଧାର କରାଯାଇଥିଲା ଏବଂ ଅଭିଯୁକ୍ତ ଫେରାର୍ ଥିବାବେଳେ ତାଙ୍କୁ ଗିରଫ କରାଯାଇଛି।
ଅଭିଯୁକ୍ତ ହେଉଛନ୍ତି ଗୌରବ ଭାଟି (୨୫)। ଯିଏ ସେହି ଅଞ୍ଚଳରେ କାମ କରୁଥିବା ଜଣେ ଖାଦ୍ୟ ବିକ୍ରେତା। ପୋଲିସ କହିଛି ଯେ ତାଙ୍କ ବିରୁଦ୍ଧରେ ଅପହରଣ ଏବଂ ନିର୍ଯାତନା ଅଭିଯୋଗ କରାଯାଇଛି। ମହିଳା ଜଣକ ମାଜିଷ୍ଟ୍ରେଟ୍ଙ୍କ ସମ୍ମୁଖରେ ତାଙ୍କ ବୟାନ ରେକର୍ଡ କରିବା ପରେ ଯୌନ ନିର୍ଯାତନା ଅଭିଯୋଗ ଯୋଡା ଯାଇପାରେ।
ପୋଲିସ ଅନୁଯାୟୀ, ଯୁବତୀ ଜଣକ ତାଙ୍କ ପୁରୁଷ ସହକର୍ମୀଙ୍କ ସହିତ ଶନିବାର ବିଳମ୍ବିତ ରାତିରେ ଲିଓପାର୍ଡଟ୍ରେଲ ଯାଇଥିଲେ। ଦୁଇଜଣ ପ୍ରାୟ ୧.୩୦ ସମୟରେ ଘଟଣାସ୍ଥଳରେ ପହଞ୍ଚିଥିଲେ ଏବଂ ସେଠାରେ ପ୍ରାୟ ଦେଢ଼ ଘଣ୍ଟା ବିତାଇ ସେମାନଙ୍କ କାର୍ ଭିତରେ ବସିଥିଲେ। ଏହି ସମୟରେ, ଅଭିଯୁକ୍ତ ଜଣଙ୍କ ସେମାନଙ୍କ ପାଖକୁ ଯାଇ ସେମାନଙ୍କୁ ହଇରାଣ କରିବା ଆରମ୍ଭ କରିଥିଲେ।
ଯେତେବେଳେ ମହିଳା ଏବଂ ତାଙ୍କ ସହକର୍ମୀ ବିରୋଧ କଲେ, ସେତେବେଳେ ଯୁକ୍ତିତର୍କ ଆରମ୍ଭ ହୋଇଥିଲା। ଉତ୍କ୍ଷିପ୍ତ କଥାବାର୍ତ୍ତା ସମୟରେ, ଅଭିଯୁକ୍ତ ଜଣଙ୍କ ଯୁବତୀଙ୍କ ମୋବାଇଲ ଫୋନ ଛଡ଼ାଇ ନେଇ ଏକ ସ୍କୋର୍ପିଓ SUV ଆଡ଼କୁ ଦୌଡ଼ି ପଳାଇଥିଲେ। ଯେତେବେଳେ ଯୁବତୀ ଜଣଙ୍କ ତାଙ୍କ ଫୋନ ଫେରାଇବା ପାଇଁ ତାଙ୍କୁ ପିଛା କରିଥିଲେ, ସେତେବେଳେ ସେ ତାଙ୍କୁ ଧରି ନେଇ ଜୋରଜବରଦସ୍ତି ଗାଡ଼ିରେ ବସାଇ ଜଙ୍ଗଲକୁ ନେଇଯାଇଥିଲେ। ସେପଟେ ଯୁବତୀଙ୍କୁ ବଞ୍ଚାଇବା ପାଇଁ ପ୍ରାୟ ୩ କିଲୋମିଟର ଯାଏ କାର୍ ପଛରେ ଦୌଡିଥିଲେ ବୟଫ୍ରେଣ୍ଡ।
Dharitri – The Largest & Most Trusted Odia Daily
