ସୋନପୁର/ଉଲୁଣ୍ଡା, ୩୦।୮ (ମୃତ୍ୟୁଞ୍ଜୟ ଶତପଥୀ/ଉରୁକ୍ରମ ପାଣ୍ଡିଆ): ସୁବର୍ଣ୍ଣପୁର ବନଖଣ୍ଡ ଅନ୍ତର୍ଗତ ଉଲୁଣ୍ଡା ବନ କ୍ଷେତ୍ରାଞ୍ଚଳର ସିଂହାସନ ସଂରକ୍ଷିତ ଜଙ୍ଗଲରେ ଗୁରୁବାର ରାତିରେ ବନବିଭାଗର ଟିମ୍ ଚଢାଉ କରିଥିଲା। ଠିକ୍ ସମୟରେ ଚଢାଉ ଯୋଗୁ ଶିକାରୀ ବନ୍ୟପ୍ରାଣୀ ଶିକାର କରିବା ପୂର୍ବରୁ ବନ ବିଭାଗ ହାତରେ ଧରାପଡିଛନ୍ତି। ଏହି ଘଟଣାରେ ଉଲୁଣ୍ଡା ଥାନା ସୁଲିଆ ଅଞ୍ଚଳର ଶରତ ମହାନ୍ତ(୧୯) ଓ ମନାଲି ବାରିକ(୨୫)ଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ଏକ ଦେଶୀ ହାତ ତିଆରି ବନ୍ଧୁକ ଓ ପାଇପ୍ ଜବତ ହୋଇଛି। ଏ ସମ୍ପର୍କରେ ଉଲୁଣ୍ଡା ବନ ବିଭାଗ ପକ୍ଷରୁ ଏକ ମାମଲା ରୁଜୁ ହୋଇଛି। ଶିକାରୀ ଦ୍ୱୟଙ୍କୁ ଶୁକ୍ରବାର କୋର୍ଟଚାଲାଣ କରାଯାଇଛି।
ସୂଚନା ଅନୁଯାୟୀ, ସିଂହାସନ ସଂରକ୍ଷିତ ଜଙ୍ଗଲରେ ହରିଣ, କୁଟ୍ରା ଓ ବାର୍ହା ଆଦି ବନ୍ୟପ୍ରାଣୀ ଅଛନ୍ତି। ସେମାନଙ୍କ ଉପରେ ଶିକାରୀଙ୍କ ଲୋଲୁପ ଦୃଷ୍ଟି ପଡିଛି। ଶିକାରୀମାନେ ନିୟମିତ ଜଙ୍ଗଲରେ ପ୍ରବେଶ କରି ନିରୀହ ବନ୍ୟପ୍ରାଣୀଙ୍କୁ ଶିକାର କରିବା ପରେ ଜନବସତିରେ ଲୁଚାଛପାରେ ମାଂସ ବିକ୍ରି କରୁଛନ୍ତି।
ବନ ବିଭାଗର କର୍ମଚାରୀମାନେ ଶିକାରୀଙ୍କ ଗତିବିଧି ଉପରେ ନଜର ରଖିଥିଲେ। ଗୁରୁବାର ରାତିରେ ଶରତ ଓ ମନାଲି ସଂରକ୍ଷିତ ଜଙ୍ଗଲରେ ପ୍ରବେଶ କରି ବନ୍ୟପ୍ରାଣୀ ଶିକାର ପାଇଁ ଉଦ୍ୟମ କରୁଥିବା ବେଳେ ବନ ବିଭାଗର ଟିମ୍ ହାତରେ ଧରା ପଡିଥିଲେ। ଉଲୁଣ୍ଡା ବନକ୍ଷେତ୍ରାଧିକାରୀ ସଞ୍ଜିବ କୁମାର ରାଉତଙ୍କ ନିର୍ଦ୍ଦେଶ କ୍ରମେ ସୁଲିଆ ବନପାଳ ବିନୋଦ ବିହାରୀ ସାହୁ, ଯାଲୋଏ ବନପାଳ ପ୍ରଦୀପ କୁମାର ଜେନା, ବନରକ୍ଷୀ ରାଜୀବ ସାହୁ ଓ ଏଲିଫ୍ୟାଣ୍ଟ ସ୍କ୍ବାର୍ଡର କର୍ମଚାରୀ ଏହି ଚଢାଉରେ ସାମିଲ ହୋଇଥିଲେ।
