ଆଙ୍କାରା: ତୁର୍କୀର ରାଜଧାନୀ ଆଙ୍କାରାରେ କାର୍ଯ୍ୟରତ ଜଣେ ଘରୋଇ ସୁରକ୍ଷା କର୍ମୀ ଓସ୍ମାନ ଗୁରଚୁ(୪୩) ରବିବାର ଏକ ବିଶ୍ୱ ରେକର୍ଡ କରି
ଗିନିଜ ବୁକ୍ ଅଫ୍ ୱାଲର୍ଡ ରେକର୍ଡ (ଜିଡବ୍ଲ୍ୟୁଆର୍)ରେ ନିଜ ନାମକୁ ସ୍ଥାନିତ କରିଛନ୍ତି। ସେ ୧୮୩ ଫୁଟ ୮.୭୨ ଇଞ୍ଚ୍ ଦୂରରୁ କୁରାଢିକୁ ଠିକ୍ ଭାବେ ଲକ୍ଷ୍ୟର ସହ ଫିଙ୍ଗି ଟାର୍ଗେଟରେ ପକାଇଥିଲେ। ‘ଲଙ୍ଗେଷ୍ଟ ଆକ୍ସ ଥ୍ରୋ’ ଶ୍ରେଣୀରେ ଓସ୍ମାନ ଜିଡବ୍ଲ୍ୟୁଆର୍ ରେକର୍ଡକୁ ହାତେଇଛନ୍ତି। ଏହି ଦୂରତା କୌଣସି ମଧ୍ୟ ଅଲିମ୍ପିକ୍ ସୁଇମିଂ ପୁଲ୍ (୧୬୪ ଫୁଟ) ଠାରୁ ମଧ୍ୟ ଅଧିକ ହେବ। ପୂର୍ବରୁ ଏହି ରେକର୍ଡ ଆମେରିକୀୟ ଜେସି ରୁଡ୍ଙ୍କ ନାମରେ ରହିଥିଲା। ସେ ୧୪୩ ଫୁଟ ଦୂରରୁ କୁରାଢିକୁ ଫିଙ୍ଗି ଟାର୍ଗେଟରେ ପକାଇଥିଲେ। ଏବେ ଓସ୍ମାନ ଏହି ରେକର୍ଡକୁ ଭାଙ୍ଗି ଇତିହାସ ରଚିଛନ୍ତି।
ଓସ୍ମାନ ୧୮୩ ଫୁଟ ଦୂରରୁ କୁରାଢି ଫିଙ୍ଗିବା ସହ ନିଜ ଜୀବନର ଅଷ୍ଟମ ଜିଡବ୍ଲ୍ୟୁଆର୍ ହାସଲ କରିଛନ୍ତି। ଏହି ଅବସରରେ ଓସ୍ମାନ କହିଛନ୍ତି, ସେ ସର୍ବଦା ଜିଡବ୍ଲ୍ୟୁଆର୍ ୱେବ୍ସାଇଟ୍ ଏବଂ ଏହାର ସୋସିଆଲ ମିଡିଆ ପେଜ୍ ଉପରେ ନିରନ୍ତର ନଜର ରଖିଥାନ୍ତି। ଏହା ତାଙ୍କୁ ବିଭିନ୍ନ ନୂତନ ଚ୍ୟାଲେଞ୍ଜକୁ ଗ୍ରହଣ କରି ରେକର୍ଡ ସୃଷ୍ଟି କରିବାରେ ସହାୟକ ହୋଇଥାଏ। ତେବେ ଏହି ରେକର୍ଡ ସୃଷ୍ଟି କରିବା ତାଙ୍କ ପାଇଁ ଏକ ଅବିଶ୍ୱସନୀୟ ଅନୁଭବ ଥିଲା ବୋଲି ଓସ୍ମାନ କହିଛନ୍ତି ।
କୁରାଢ଼ିକୁ ଏତେ ଦୂରରୁ ଫିଙ୍ଗି ଏହାକୁ ଟାର୍ଗେଟରେ ପକାଇବା ସହଜ ନ ଥିଲା। ଏଥିପାଇଁ ତାଙ୍କୁ ବହୁ ପରିଶ୍ରମ କରିବାକୁ ପଡ଼ିଥିଲା। ଏଥିପାଇଁ ସେ ଅନେକଥର ପ୍ରୟାସ କରି ବିଫଳ ହୋଇଥିଲେ। କିନ୍ତୁ ସେ ହାର ନ ମାନି ଶେଷରେ ସଫଳତା ପାଇଛନ୍ତି ବୋଲି ଓସ୍ମାନ କହିଛନ୍ତି।
ଆଗାମୀ ଦିନରେ ବାସ୍କେଟବଲ, ଶୁଟିଂ ଆଦି କ୍ରାଡ଼ା ସହ ଜଡିତ ଆହୁରି ଅନେକ ରେକର୍ଡ ଭାଙ୍ଗିବାକୁ ପ୍ରସ୍ତୁତ ହେଉଛନ୍ତି। ଓସ୍ମାନ କହିଛନ୍ତି, ଜିଡବ୍ଲ୍ୟୁଆର୍ରେ ସ୍ଥାନ ପାଇବା ତାଙ୍କ ପାଇଁ ଅତ୍ୟନ୍ତ ଗର୍ବର ବିଷୟ। ପ୍ରତିବର୍ଷ ଜିଡବ୍ଲ୍ୟୁଆର୍ରେ ନିଜ ନାମ ସ୍ଥାନିତ କରିବା ତାଙ୍କର ଲକ୍ଷ୍ୟ। ସେ ଆଗକୁ ଆହୁରି ଅନେକ ଆକର୍ଷଣୀୟ ରେକର୍ଡ ଭାଙ୍ଗିବାକୁ ଚେଷ୍ଟା କରିବେ। ଏହା କେବଳ ଆରମ୍ଭ ମାତ୍ର ବୋଲି ଓସ୍ମାନ କହିଛନ୍ତି।
