ଭୁବନେଶ୍ୱର,୧୩।୪(ବ୍ୟୁରୋ): ଓଡ଼ିଆ ନବବର୍ଷ ତଥା ପଣାସଂକ୍ରାନ୍ତି ଓ ରମଜାନ୍କୁ ନେଇ କଟକ ମ୍ୟୁନିସିପାଲ କର୍ପୋରେଶନ(ସିଏମ୍ସି) ଏବଂ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ନୂଆ ଗାଇଡଲାଇନ୍ ଜାରି କରାଯାଇଛି। ବୁଧବାରଠାରୁ ରମ୍ଜାନ ଆରମ୍ଭ ହେଉଥିବାରୁ ଗହଳିକୁ ଏଡ଼ାଇବା ଲାଗି ସିଏମ୍ସି କଠୋର ଗାଇଡ୍ଲାଇନ୍ କରିଛି।
ତଦନୁଯାୟୀ ମସଜିଦ୍ କିମ୍ବା ବାହାରେ କୌଣସି ଗହଳି ନ କରିବାକୁ ବିଭାଗ ନିର୍ଦ୍ଦେଶ ଦେଇଛି। ସେହିଭଳି ମସଜିଦ୍ ଭିତରେ ୧୦୦ଜଣ କିମ୍ବା ହଲ୍ କ୍ଷମତାନୁଯାୟୀ ୫୦ ପ୍ରତିଶତ ଶ୍ରଦ୍ଧାଳୁଙ୍କୁ ନମାଜ ପଢ଼ିବାକୁ ଅନୁମତି ମିଳିବ। ମସଜିଦ୍ରେ ପ୍ରବେଶ କରିବା ସମୟରେ ଟୋକନ ବ୍ୟବସ୍ଥା ଆପଣାଇବାକୁ ମଧ୍ୟ ପରାମର୍ଶ ଦିଆଯାଇଛି। ଭିତରେ ଓ ବାହାରେ ହ୍ୟାଣ୍ଡ ସାନିଟାଇଜର, ଥର୍ମାଲ ସ୍କ୍ରିନିଂ ଓ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି। ପ୍ରାର୍ଥନା ସମୟରେ ସାମାଜିକ ଦୂରତା ବଜାୟ ରଖିବାକୁ କୁହାଯାଇଛି। ବୟସ୍କ ଓ ୫ ବର୍ଷରୁ କମ୍ ପିଲାଙ୍କୁ ମସଜିଦ ଭିତରକୁ ପ୍ରବେଶ କରିବାକୁ ଅନୁମତି ମିଳିବ ନାହିଁ। ଗାଇଡ୍ଲାଇନ୍ ଉଲ୍ଲଂଘନ କଲେ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିଏମ୍ସି ପକ୍ଷରୁ କୁହାଯାଇଛି।
ସେହିଭଳି ପଣା ସଂକ୍ରାନ୍ତି ପାଇଁ ବିଏମ୍ସିର ଗାଇଡଲାଇନ୍ ଅନୁଯାୟୀ, ରାଜଧାନୀ ଭୁବନେଶ୍ୱରରେ ସର୍ବସାଧାରଣରେ ପଣା ବଣ୍ଟନ କରାଯିବ ନାହିଁ। କେବଳ ଧାର୍ମିକ ଅନୁଷ୍ଠାନରେ ରୀତିନୀତି ଅନୁଯାୟୀ ସେବାୟତ ବା ପୂଜକମାନେ ପୂଜା କରିପାରିବେ। ତେବେ ପଣା ସଂକ୍ରାନ୍ତି ପାଇଁ ଭକ୍ତମାନଙ୍କୁ ସମ୍ପୂର୍ଣ୍ଣ ବାରଣ କରାଯାଇଛି। ଏହାଛଡ଼ା ରମ୍ଜାନ ପାଇଁ ମଧ୍ୟ ସମାନ ଗାଇଡ୍ଲାଇନ୍ ଜାରି କରାଯାଇଛି। ଖୁବ୍ଶୀଘ୍ର ଏନେଇ ଏସ୍ଓପି ଜାରି କରାଯିବ ବୋଲି କୁହାଯାଇଛି।
